Read Hmong Njua Phoo Ntawv Nkauj 57 Bible Online

Phoo Ntawv Nkauj 57 - Hmong Njua bible

Phoo Ntawv Nkauj 57

¹Vaajtswv, thov koj taabncuab kuv! Thov koj taabncuab kuv lauj, rua qhov kuv lug cuag koj ua tug paab cawm kuv dlim. Kuv nrhav tau qhov chaw roog kuv huv koj ob phob tis moog txug thaus tej khaub zeeg cua dlhau lawm.

²Kuv tsaa ncauj thov Vaajtswv tug kws muaj Fwjchim Luj tshaaj plawg, thov tug Vaajtswv kws pub kuv muaj txhua yaam tsi tu.

³Nwg yuav teb kuv tej lug thov sau ntuj tuaj hab cawm kuas kuv dlim; nwg yuav yeej cov tuabneeg kws tsimtxom kuv. Vaajtswv yuav qha nwg txujkev hlub kws tsi paub kawg hab nwg txujkev ncaaj nceeg rua kuv.

⁴Kuv cov yeebncuab nyob puag puagncig kuv, puab zoo ib yaam le tej tsuv ntxhuav tog tum tuabneeg noj. Puab tej nav ntse ib yaam le tej muv hab tej xub vug, puab tej nplaig ntse zuag plag ib yaam le nav ntaaj.

⁵Vaajtswv, thov qha koj lub fwjchim kws luj kawg nkaus rua sau nruab ntug, hab qha koj tej txujci kuas puv nkaus huv nplajteb nuav.

⁶Kuv cov yeebncuab cuab vaag yuav khwb kuas tau kuv, kuv muaj kev nyuaj sab kawg le. Puab khawb qhov tog kuv kev, tabsis puab rov poob taag rua huv lub qhov ntawd lawm.

⁷Vaajtswv, kuv tso sab plhuav lawm lauj! Kuv yuav hu nkauj hab qhuas koj moog le!

⁸Kuv lub sab, ca le tsim dlheev! Kuv tej nkauj nogncaas hab tej raaj, ca le raag dlheev! Kuv yuav tsaa kuas lub nub sawv.

⁹Tug TSWV, kuv yuav ua koj tsaug taabmeeg txhua lub tebchaws; kuv yuav qhuas koj taabmeeg txhua tsaav tuabneeg.

¹⁰Koj txujkev hlub kws tsi paub kawg sab moog nto ntuj, koj txujkev ncaaj nceeg sab moog txug sau nruab ntug.

¹¹Vaajtswv, thov qha koj lub fwjchim kws luj kawg nkaus rua sau nruab ntug hab qha koj tej txujci kuas puv nkaus rua huv nplajteb nuav.