Read Hmong Njua Phoo Ntawv Nkauj 58 Bible Online

Phoo Ntawv Nkauj 58 - Hmong Njua bible

Phoo Ntawv Nkauj 58

¹Puas yog mej cov numtswv yeej ibtxwm txav txim tsi ncaaj nceeg? Mej puas txav txim ncaaj rua txhua tug?

²Tsi yog le ntawd! Mej tsuas xaav ntsoov rua txujkev ua phem xwb hab ua limham kawg nkaus rua lub tebchaws.

³Cov tuabneeg ua phem yeej ua kev txhum moog taag puab simneej; puab yeej dlaag txij thaus yug tau puab lug.

⁴Puab muaj taug ib yaam le naab; puab ntsaws qhovntsej kuas tsi nov lug ib yaam le tug naab raaj kubsai laag ntseg

⁵kws yeej tsi nov tug dlib naab lub suab lossis nov tug kws txawj ua khawvkoob tej lug ntxag hlo le.

⁶Vaajtswv, thov koj ca le muab cov tsuv ntxhuav nuav tej kaug tsoo kuas luv.

⁷Thov kuas puab pluj moog ib yaam le tej dlej kws muab nqug povtseg, thov kuas puab raug luas tsuj ib yaam le tej nroj tsuag rua huv plawv kev.

⁸Thov kuas puab zoo le cov qwj kws yaaj taag rua huv lub plhaub lawm. Thov kuas puab zoo ib yaam le tug mivnyuas mog kws yug tau lug xwb tub tuag lawm tsi tau pum lub nub.

⁹Thaus puab tsi tau paub tej nuav, puab tub raug muab txav tu taag ib yaam le tej nroj tsuag lawm. Thaus Vaajtswv chim heev, nwg yuav muab puab tshuab moog povtseg thaus puab tseem muaj sa nyob.

¹⁰Cov tuabneeg ncaaj nceeg yuav zoo sab heev thaus puab pum cov tuabneeg txhum raug txim. Puab yuav kwm cov tuabneeg sab phem tej ntshaav moog.

¹¹Tej tuabneeg yuav has zum zawg tas, “Cov tuabneeg ncaaj nceeg yeej tau txais nqe zug, tseeb tag, Vaajtswv yuav txav txim rua tuabneeg nplajteb.”