Read Hmong Njua Phoo Ntawv Nkauj 59 Bible Online

Phoo Ntawv Nkauj 59 - Hmong Njua bible

Phoo Ntawv Nkauj 59

¹Kuv tug Vaajtswv, thov cawm kuas kuv dlim ntawm kuv cov yeebncuab, thov tsomkwm kuv kuas kuv dlim ntawm cov tuabneeg kws tawmtsaam kuv!

²Thov cawm kuas kuv dlim ntawm cov tuabneeg sab phem, thov paab kuas kuv dlim ntawm cov tuabneeg tua tuabneeg!

³Taamsim nuav puab yeej zuv rawv tog tua kuv povtseg, cov tuabneeg limham sis sau tuaj tawmtsaam kuv. Tug TSWV, tsi yog vim kuv lub txim lossis tej kev txhum kws kuv ua.

⁴Kuv yeej tsi tau ua txhum, puab ca le maaj ceev nrooj tuaj tawmtsaam kuv xwb. Thov koj tsaa qhovmuag saib kuv hab lug paab kuv.

⁵Tug TSWV kws yog Vaajtswv tug muaj fwjchim luj kawg nkaus, ca le sawv tseeg hab lug paab kuv; cov Yixalayees tug Vaajtswv, thov koj tsaa qhovmuag saib zaaj nuav! Thov koj ca le sawv tseeg lug hab rau txim rua cov tuabneeg nruj tsiv, thov tsi xob taabncuab txug cov tuabneeg ntxeev sab ntawd le.

⁶Thaus tsaus ntuj puab rov qaab lug hab qw zum zawg ib yaam le cov dlev kws tum ncig lub nroog.

⁷Ca le noog puab tej lug thuam hab tej lug tshev. Puab tej nplaig ntse zuag plag le nav ntaaj huv puab qhovncauj, puab tseem xaav has tas yeej tsi muaj tuabneeg nov puab tej lug le.

⁸Tabsis tug TSWV, koj luag puab plig kawg le; koj thuam cov tuabneeg kws nruj tsiv.

⁹Vaajtswv, kuv ca sab ntsoov rua koj tug zug luj zug nchaav, koj yog kuv qhov chaw cawm sav.

¹⁰Kuv tug Vaajtswv yeej hlub kuv hab yuav lug paab kuv, nwg yuav ca kuv saib ntsoov kuv cov yeebncuab swb.

¹¹Vaajtswv, thov koj tsi xob tua puab povtseg, nyob tsaam kuv tsaav tuabneeg tsi ncu qaab puab lawm. Tug TSWV kws yog tug tsomkwm peb, thov koj tug zug luj zug nchaav ua kuas puab swb hab tawg tsiv moog.

¹²Kev txhum nyob ntawm puab dlaim tawv ncauj, puab tej lug puavleej yog kev txhum xwb, thov kuas puab raug nteg vim puab txujkev khaavtheeb! Rua qhov puab tej lug yog lug tsawm hab lug dlaag xwb.

¹³Koj ca le ua kuas puab puamtsuaj, vim koj chim, thov ua kuas puab puamtsuaj tu noob nrho moog. Ces suavdlawg txhaj paub has tas Vaajtswv yog tug kws kaav tsaav tuabneeg Yixalayees hab nwg kaav thoob plawg huv nplajteb nuav.

¹⁴Thaus tsaus ntuj, kuv cov yeebncuab rov lug, puab qw zum zawg ib yaam le cov dlev tsej ncig lub nroog,

¹⁵puab zoo ib yaam le cov dlev kws nrhav noj hab nyooj sis txeeb noj.

¹⁶Tabsis kuv yuav hu nkauj qhuas koj tug zug luj zug nchaav, txhua taagkig kuv hu nkauj qhuas koj txujkev hlub kws tsi paub kawg. Koj yog kuv lub chaw cawm sav, yog lub tsev rua kuv nkaum thaus kuv raug kev txomnyem.

¹⁷kuv yuav qhuas koj, koj yog tug tsomkwm kuv. Vaajtswv yog kuv lub chaw cawm sav. Vaajtswv txhaj yog tug hlub kuv.