Read Hmong Njua Phoo Ntawv Nkauj 60 Bible Online

Phoo Ntawv Nkauj 60 - Hmong Njua bible

Phoo Ntawv Nkauj 60

¹Vaajtswv, koj muab peb tso tseg hab koj ua rua peb swb lawm, koj tau chim heev rua peb, tabsis nwgnuav thov koj tig rov lug paab peb.

²Koj tau muab lub tebchaws cu ua zug koog, hab koj muab phua tawg rhe lawm, thov koj ca le khu nwg tej qhov txhaab taamsim nuav, rua qhov nwg tawg ua ntau dlaim lawm.

³Koj ua rua koj tsaav tuabneeg raug kev txomnyem luj kawg le, peb dlaa ntxeev laj khwb rwg ib yaam le peb qaug cawv.

⁴Koj tsaa ib tug chij rua cov kws fwm koj kuas puab tsiv dlim ntawm txujkev puamtsuaj.

⁵Thov koj lub fwjchim cawm kuas peb dlim, thov teb peb tej lug thov, kuas cov tuabneeg kws koj hlub txhaj yuav tau txais kev cawm dlim.

⁶Vaajtswv has lug ntawm chaav pehawm nwg tuaj has tas, “Ntawm txujkev muaj yeej kuv yuav muab lub nroog Sekhees faib hab muab lub Haav Xukaus pub rua kuv tsaav tuabneeg.

⁷Nkile-as yog kuv tug, hab Manaxes los yog kuv tug ib yaam nkaus, Efalayees yog kuv lub mom hlau hab Yudas yog kuv tug cwj.

⁸Cov Mau-am yog kuv lub taig ntxuav taw; hab kuv yuav hle kuv txhais khau pov moog rua sau Edoos; kuv yuav qw has tas, kuv yeej cov Filitees lawm.”

⁹Vaajtswv, leejtwg yuav coj kuv moog rua huv lub nroog kws muaj ntsaa yeej khov kho? Leejtwg yuav coj kuv moog rua huv Edoos?

¹⁰Tsi yog koj tub muab peb tso povtseg lawm los? Tsi yog koj tsi kaam tawm nrug peb cov tubrog moog lawm los?

¹¹Thov paab peb tawmtsaam peb cov yeebncuab, yog noobneej paab xwb tsi muaj qaabhau le.

¹²Yog has tas Vaajtswv tuaj peb tog peb txhaj yuav yeej, nwg yuav kovyeej peb cov yeebncuab.