Read Hmong Njua Phoo Ntawv Nkauj 62 Bible Online

Phoo Ntawv Nkauj 62 - Hmong Njua bible

Phoo Ntawv Nkauj 62

¹Kuv ua sab ntev tog Vaajtswv ua tug cawm kuv, kuv muab sab npuab nwg tuab leeg xwb.

²Nwg tuab leeg txhaj yog tug tsomkwm kuv hab cawm kuv dlim, nwg yog tug tiv thaiv kuv, hab kuv yuav tsi swb ib zag le.

³Mej suavdlawg tseem yuav tawmtsaam tug tuabneeg ntawd moog txug thaus twg? nwg tub tsi muaj zug npaum le tug ntsaa laajkaab kws tub qaug taag lawm los sav.

⁴Mej tsuas xaav txu tug tuabneeg kws muaj koob meej, hab mej nyam has tej lug dlaag xwb. Mej lub ncauj foom koob moov, tabsis mej lub sab foom tsi zoo.

⁵Kuv muab sab npuab Vaajtswv tuab leeg xwb, nwg txhaj yog tug kws kuv ca sab.

⁶Nwg tuab leeg txhaj yog tug tsomkwm hab cawm kuv dlim, nwg yog tug tiv thaiv kuv, hab kuv yuav tsi swb ib zag le.

⁷Vaajtswv yog tug cawm kuv dlim hab pub kuv muaj koob meej, nwg yog tug tsomkwm kuv zoo heev hab nwg yog kuv lub chaw nkaum.

⁸Kuv tsaav tuabneeg, mej yuavtsum ca sab rua Vaajtswv txhua lub sijhawm. Qha mej lub sab rua nwg, rua qhov nwg yog peb lub chaw cawm sav.

⁹Tej tuabneeg zoo ib yaam le luas ua paa xwb, tug hlub tug yau los tsi muaj nqes dlaabtsi le. Muab puab tso rua sau teev luj los puab tsi tsuam teev le, puab tseem sib tshaaj tej paa hab.

¹⁰Mej tsi xob xaav has tas ua nruj ua tsiv ces yuav tau luas tug yuav, tsi xob ca sab has tas, moog nyag luas tug ces yuav tau dlawb tau dlo. Txawm yog mej yuav muaj txag npluanuj ntau zuj zug los tsi xob qaug rua tej ntawd.

¹¹Kuv nov Vaajtswv has ntau zag has tas, lub fwjchim yog nwg le,

¹²hab nwg txujkev hlub yeej tsi paub kawg. Tug TSWV, koj yog tug kws yuav muab nqe zug rua txhua tug lawv le nyag teg num.