Read Hmong Njua Phoo Ntawv Nkauj 64 Bible Online

Phoo Ntawv Nkauj 64 - Hmong Njua bible

Phoo Ntawv Nkauj 64

¹Vaajtswv, kuv taabtom raug kev nyuaj sab, thov koj noog kuv tej lug thov! Kuv ntshai kuv cov yeebncuab kawg le! Thov koj cawm kuv txujsa.

²Thov tsomkwm kuas kuv dlim ntawm cov tuabneeg sab phem tej tswvyim kws tuavhuv ua phem, hab dlim ntawm cov tuabneeg sab phem kws yuam cai.

³Puab tej nplaig ntse ib yaam le nav ntaaj, hab puab tej lug ab lug dlaw zuag ib yaam le tej xub vug.

⁴Puab maaj nrooj has tej lug dlaag, puab tsi txaajmuag, puab txobthuam cov tuabneeg zoo, puab tsi ntshai leejtwg.

⁵Puab ib leeg txhawb ib leeg kuas tuavhuv ua phem, puab sis thaam saib puab yuav moog cuab hlua rua qhov twg. Puab has tas, “Yeej tsi muaj leejtwg pum peb le.”

⁶Puab tuav tswvyim ua phem hab has tas, “Peb npaaj tau tswvyim zoo kawg nkaus.” Tuabneeg lub sab hab lub hlwb xaav txug tej kws phem kawg le.

⁷Tabsis Vaajtswv tua nwg tej xub vug tuaj rua puab, hab tuab plag ntshis xwb puab raug mob taag.

⁸Nwg yuav ua kuas puab puamtsuaj taag vim puab tej kev xaav ntawd, txhua tug kws pum puab, yuav cu hau nyo.

⁹Ces puab yuav ntshai kawg, puab txhaj yuav xaav txug tej kws Vaajtswv ua taag lug hab qha rua suavdlawg paub txug Vaajtswv teg num.

¹⁰Cov tuabneeg ncaaj nceeg txhua tug yuav zoo sab kawg le, vim tej kws tug TSWV tau ua taag lug. Puab yuav tau txujkev cawm dlim ntawm nwg, cov tuabneeg sab zoo yuav qhuas nwg.