Read Hmong Njua Phoo Ntawv Nkauj 66 Bible Online

Phoo Ntawv Nkauj 66 - Hmong Njua bible

Phoo Ntawv Nkauj 66

¹Txhua tsaav tuabneeg, ca le qw zoo sab hab ua Vaajtswv tsaug!

²Ca le hu nkauj qhuas nwg lub npe hab nwg tug tshwjchim, thov kuas tej lug qhuas ua rua nwg tau koob meej.

³Has rua Vaajtswv has tas, “Teg num kws koj ua xaav tsi thoob le! Koj lub fwjchim luj kawg nkaus ua rua koj cov yeebncuab ntshai hab pehawm koj ntawm koj xubndlag.

⁴Txhua tug kws nyob huv nplajteb nuav puavleej pehawm koj, puab hu nkauj qhuas koj, puab hu nkauj qhuas koj lub npe.”

⁵Mej ca le saib tej kws Vaajtswv tub ua taag lug lawm, nwg ua tej num kws zoo kawg nkaus rua suavdlawg pum.

⁶Nwg muab dlej havtxwv hloov ua aav qhuav; peb cov yawmkoob txhaj moog kutaw hlaa dlhau dlej. Peb txhaj zoo sab vim tej kws nwg tau ua.

⁷Nwg lub fwjchim kaav moog ib txhis hab nwg tsaa qhovmuag saib ntsoov txhua tsaav tuabneeg. Tsi pub leejtwg ntxeev sab tawmtsaam nwg.

⁸Txhua tsaav tuabneeg, ca le qhuas peb tug Vaajtswv, ca peb nov mej tej suab qhuas Vaajtswv.

⁹Nwg yog tug tuav peb txujsa hab tsi pub peb qaug le.

¹⁰Vaajtswv, koj tau sim peb sab; koj sim peb ib yaam le nchuav nyaj huv qhovcub.

¹¹Koj ca peb moog maag luas lub vuj hlua hab koj tsuam nraa nyaav rua nrau peb lub nrausqaum.

¹²Koj ca peb cov yeebncuab tsuj peb, peb txhaj raug suavtawg kub hab dlej nyaab, tabsis nwgnuav koj coj peb rov lug nyob rua qhov chaw kaaj sab.

¹³Kuv yuav coj khoom tuaj hlawv fij rua huv koj lub tsev; kuv yuav muab khoom fij rua koj lawv le kuv tau coglug tseg lawm.

¹⁴Kuv yuav muab rua koj lawv le kuv tau has thaus kuv raug kev txomnyem.

¹⁵Kuv yuav muab yaaj tuaj tua hlawv fij rua sau lub thaaj, kuv yuav muab nyuj hab tshis tuaj tua hlawv fij hab tej paa yuav nchu moog rua sau nruab ntug.

¹⁶Cov tuabneeg kws fwm Vaajtswv, mej ca le lug ntawm nuav, kuv yuav pav tej kws tug TSWV has rua kuv lawm rua mej noog.

¹⁷Kuv quaj thov nwg paab, kuv yuav hu nkauj qhuas nwg.

¹⁸Yog kuv tsi leeg kuv tej kev txhum, tug TSWV yuav tsi noog kuv tej lug thov.

¹⁹Tabsis Vaajtswv yeej tig qhovntsej noog kuv tej lug; nwg yeej nov kuv tej lug thov.

²⁰Kuv qhuas Vaajtswv, rua qhov nwg tsi tau muab kuv tej lug thov tso tseg, hab tsi tau rhu nwg txujkev hlub kws tsi paub kawg ntawm kuv moog.