Read Hmong Njua Phoo Ntawv Nkauj 68 Bible Online

Phoo Ntawv Nkauj 68 - Hmong Njua bible

Phoo Ntawv Nkauj 68

¹Vaajtswv sawv tseeg ua rua nwg cov yeebncuab tsiv ri sua. Cov tuabneeg kws ntxub Vaajtswv swb hab tsiv tsi yeej ua nwg ntej.

²Vaajtswv ntab puab tawm ib yaam le cua ntsawj tej paa tawg, hab ib yaam le suavtawg txhab cab ntaab yaaj, yog le ntawd, cov tuabneeg sab phem yuav pluj ntawm Vaajtswv lub xubndlag moog.

³Tabsis cov tuabneeg ncaaj nceeg txaus sab hab zoo sab nyob ntawm Vaajtswv xubndlag, puab xyivfaab hab qw zoo sab.

⁴Hu nkauj qhuas Vaajtswv, hu nkauj qhuas nwg lub npe; khu kev tog tug kws caij rawv sau tauv fuab lug, nwg lub npe yog tug TSWV, ca le zoo sab hlo nyob ntawm nwg lub xubndlag.

⁵Vaajtswv tug kws nyob huv lub Tuamtsev dlawbhuv, nwg tu cov mivnyuas ntsuag hab tsomkwm cov puj ntsuag.

⁶Nwg pub cov tuabneeg kws txomnyem muaj vaaj muaj tsev nyob, hab nwg tso cov tuabneeg raug txim tawm moog nyob ywj sab, tabsis cov tuabneeg ntxeev sab yuav tau nyob huv lub tebchaws kws qhuav nkig nkuav.

⁷Vaajtswv, thaus koj coj koj tsaav tuabneeg, hab thaus koj tawm moog hlaa taj suabpuam.

⁸Lub nplajteb ua zug koog, hab lub ntuj tso naag laub lug lug, rua qhov tug Vaajtswv kws nyob ntawm roob Xinais nqeg lug, yog cov Yixalayees tug Vaajtswv taabtom nqeg lug.

⁹Vaajtswv, koj tso tuamtsaam naag lug hab ua rua koj lub tebchaws kws tsuag taag kuas rov ua tau noj.

¹⁰Koj tsaav tuabneeg lug nyob huv lub tebchaws ntawd, koj ua zoo koj txhaj npaaj pub rua cov pluag.

¹¹Tug TSWV yog tug has tej lug nuav, hab muaj coob leej moog qha:

¹²“Cov vaajntxwv hab puab tej tubrog dlha tsiv lawm!” Cov quaspuj kws nyob huv tsev muab tej khoom kws txeeb tau lug sis faib:

¹³tej tis nquab puavleej vuam nyaj thoob plawg, hab tej plaub tis puavleej vuam tej tseem kub. (Vim le caag nub kws taabtom ntaus rog mej qee leej moog nkaum huv tej nkuaj yaaj?)

¹⁴Thaus Vaajtswv tug kws muaj fwjchim luj kawg nkaus lawv cov vaajntxwv tawg ri sua, nwg ua kuas muaj dlaus lug rua sau Roob Zalemoos.

¹⁵Lub roob huv lub nroog Npasaas yog lub roob kws luj sab; lub roob ntawd muaj ntau lub ncov!

¹⁶Lub roob luj sab, vim le caag koj khib hab saib tsi taug lub roob kws Vaajtswv xaiv ua nwg qhov chaw nyob? Tug TSWV yeej yuav nyob sau moog ibtxhis le.

¹⁷Nwg cov tsheb neeg ntau txheeb ntau vaam lub nrug tug TSWV nqeg sau roob Xinais lug rua huv nwg qhov chaw dlawbhuv.

¹⁸Thaus koj nce moog rua sau qhov chaw sab, koj coj cov tuabneeg kws raug luas nteg coob leej nrug koj moog, koj tau txais tej khoom pub lug ntawm tej tuabneeg, hab txawm yog cov tuabneeg kws ntxeev sab rua koj los muab khoom pub rua koj, tug TSWV kws yog Vaajtswv yuav nyob sau ntuj.

¹⁹Ca le qhuas tug TSWV, nwg yog tug kws ris peb lub nraa ib nub dlhau ib nub, nwg yog Vaajtswv tug kws cawm peb dlim ntaag.

²⁰Peb tug Vaajtswv yog tug Vaajtswv kws cawm peb dlim; nwg yog Vaajtswv, peb tug TSWV kws cawm peb dlim txujkev tuag.

²¹Vaajtswv yeej yuav muab nwg cov yeebncuab taubhau tsoo kuas tawg, puab yog cov tuabneeg kws tsi kaam thau hau tawm ntawm puab tej kev txhum le.

²²Tug TSWV has tas, “Kuv yuav coj mej cov yeebncuab tawm huv Npasaas rov qaab lug; kuv yuav coj puab tawm huv qaab thu havtxwv qhov kws tub tshaaj plawg lug,

²³yog le ntawd, mej txhaj raus kutaw rua huv yeebncuab cov ntshaav, hab mej tej dlev txhaj tau yaim tej ntshaav ntawd.”

²⁴Vaajtswv, suavdlawg puavleej pum koj cov tuabneeg moog ua tsheej paab, Vaajtswv kws yog kuv tug Vaajntxwv, koj cov tuabneeg moog tsheej kev rua huv koj lub tuamtsev.

²⁵Cov hu nkauj moog ua ntej, cov ntaus nkauj nogncaas moog ua qaab, hab cov hluas nkauj kws ntaus nruag tuaj nruab nraab.

²⁶“Nwg tsaav tuabeeg kws tuaj saablaaj ua ke, ca le qhuas Vaajtswv, taagnrho Yakhauj cov xeebntxwv ca le qhuas tug TSWV!”

²⁷Npeenyamees yog cov kws xub lug, puab yog xeem tsawg tshaaj plawg, ces xeem Yudas cov thawjcoj txhaj lug nrug puab paab ntawd, xeem Xenpuloos hab xeem Nathalis cov thawjcoj txhaj tawm lawv qaab.

²⁸Vaajtswv, qha koj lub fwjchim rua peb, lub fwjchim kws koj siv tuaj peb tog.

²⁹Rua qhov koj lub Tuamtsev nyob huv lub nroog Yeluxalees, cov vaajntxwv txhaj nqaa khoom tuaj pub rua koj.

³⁰Ca le tshev cov tsaj qus kws nkaum tom tej haav lojkov, Ca le tshev cov txiv nyuj kws nyob nrug cov mivnyuas nyuj kws yog txhua tsaav tuabneeg moog txug thaus puab qhau cev pe hab muab nyaj fij rua koj. Thov muab cov tuabneeg kws nyam ua tsuv ua rog ntab tawm moog!

³¹Cov xeebcom yuav tuaj nraag tebchaws Iziv tuaj, cov tuabneeg Eti-aupias yuav tsaa puab tej teg thov Vaajtswv.

³²Txhua lub tebchaws huv nplajteb nuav, ca le hu nkauj qhuas Vaajtswv, hu nkauj txhawb nqaa tug TSWV,

³³qhuas tug kws kaav nyob sau nruab ntug kws yog lub ntuj kws ibtxwm nyob thaus u lug lawm. Ca le noog nwg lub suab nthe nyooj lawg kws muaj fwjchim.

³⁴Tshaajtawm Vaajtswv lub fwjchim, nwg lub koob meej nrov nchaa thoob plawg tsaav tuabneeg Yixalayees, nwg lub fwjchim puv nkaus sau nruab ntug.

³⁵Vaajtswv tug kws txaus ntshai nyob huv nwg lub Tuamtsev, nwg yog cov Yixalayees tug Vaajtswv! Nwg muab tug zug luj zug nchaav hab lub fwjchim pub rua nwg tsaav tuabneeg. Ca le qhuas Vaajtswv!