Read Hmong Njua Phoo Ntawv Nkauj 69 Bible Online

Phoo Ntawv Nkauj 69 - Hmong Njua bible

Phoo Ntawv Nkauj 69

¹Vaajtswv, thov koj paab cawm kuv! Dlej nyaab nto plawg sau kuv cejdlaab lawm;

²kuv zum rua huv lub paag haav av tub heev kws tsi muaj chaw tag taw le; kuv poob rua huv lub paag dlej kws tub heev, hab dlej nphau lug nyaab kuv taag.

³Kuv hu koj paab, kuv qaug zug hab kuv lub qaa qhuav taag. Kuv tog koj ntev heev ua rua kuv qhovmuag lig taag.

⁴Cov tuabneeg kws laam ntxub kuv, ntau tshaaj kuv cov plaubhau lawm. Kuv cov yeebncuab ua timkhawv tsi tseeb kom kuv; puab muaj zug heev hab xaav tua kuv povtseg. Puab yuam kuas kuv xaa tej khoom kws tsi yog kuv nyag rov qaab huv tuabsi.

⁵Vaajtswv, kuv tsi tau muab kuv tej kev txhum zais tsi pub koj pum, koj yeej paub kuv yog ib tug tuabneeg ruag kawg nkaus le.

⁶Tug TSWV kws muaj fwjchim luj kawg nkaus, thov tsi xob ca kuv coj kev txaajmuag lug rua cov tuabneeg kws ca sab rua koj. Kuv lub sab kub cuag suavtawg, vim kuv mob sab rua koj lub Tuamtsev.

⁷Tub yog vim koj kuv txhaj raug luas thuam hab kuv raug kev txaajmuag.

⁸Kuv zoo ib yaam le tug qhua rua kuv cov kwvtij, hab zoo ib yaam le tug tuabneeg txawv tebchaws rua kuv tsev tuabneeg.

⁹Kuv mob sab rua koj lub Tuamtsev ib yaam le suavtawg kub huv kuv lub sab, tej lug kws luas thuam koj poob rua kuv huv tuabsi.

¹⁰Thaus kuv txu fwjchim hab ua kevcai yoo mov, mas tej tuabneeg thuam kuv kawg le.

¹¹Thaus kuv naav tej rig tsho kws tau kev quaj ntsuag, mas puab luag kuv plig kawg.

¹²Puab xyaav kuv moo tom tej kev hab puab lomtxwm haus cawv kuas qaug hab hu nkauj luag kuv plig.

¹³Tabsis tug TSWV, kuv yuav thov koj xwb, Vaajtswv, thov koj teb kuv thaus lub sijhawm kws koj teem tseg. Vim koj txujkev hlub kws luj kawg nkaus, thov koj teb kuv, rua qhov koj coglug tseg lawm has tas, koj yuav cawm kuas kuv dlim.

¹⁴Thov cawm kuv tsi xob ca kuv zum rua huv paag haav av, thov paab kuas kuv dlim ntawm kuv cov yeebncuab, hab dlim ntawm lub paag dlej kws tub heev.

¹⁵Thov tsi xob pub dlej lug nyaab kuv, thov tsi xob pub kuv tog rua huv qaab thu dlej kws tub, lossis poob rua huv lub qhov ntxaa.

¹⁶Tug TSWV, koj yog tug muaj txujkev hlub tsi paub kawg, koj yog tug muaj txujkev hlub luj kawg nkaus, thov koj tig lug rua ntawm kuv.

¹⁷Thov koj tsi xob tsiv nkaum koj tug tubkhai; kuv ntxhuv sab kawg nkaus, thov koj teb kuv taamsim nuav lauj!

¹⁸Thov koj lug cuag kuv hab cawm kuas kuv dlim, hab tso kuv dlim ntawm kuv cov yeebncuab.

¹⁹Koj yeej paub kuv raug luas txobthuam, raug txaajmuag hab raug luas saib tsi taug kag le; koj pum taagnrho kuv cov yeebncuab.

²⁰Kev txobthuam ua rua kuv sab ntsws puag taag hab kuv taag kev ca sab; kuv ca sab tog txujkev hlub, tabsis tsi muaj le; kuv nrhav tug kws nplig kuv sab, tabsis nrhav tsi tau le.

²¹Thaus kuv tshaib plaab, puab muab tej tshuaj muaj taug rua kuv noj, thaus kuv nqhes dlej, puab muab kua txiv maab qaub rua kuv haus.

²²Thov kuas puab rooj mov ua rua puab raug kev puamtsuaj, thov kuas puab rooj mov tseemceeb ua rua puab qaug taag.

²³Thov ua rua puab qhovmuag tsi pum kev! Thov ua kuas puab lub nrausqaum tsi muaj zug!

²⁴Laub koj txujkev chim rua puab; thov ca koj txujkev nruj tsiv kaav taagnrho puab.

²⁵Thov kuas puab tej yeej ua taj suabpuam taag, thov tsi xob ca ib tug seem nyob huv puab tej tsevntaub le.

²⁶Puab tsimtxom cov tuabneeg kws koj tub rau txim rua lawm, puab has cov tuabneeg raug mob kws tiv tej kev txomnyem plig.

²⁷Thov muab puab tej kev txhum teev huv tuabsi rua huv koj phoo ntawv, tsi xob pub kuas puab muaj feem rua koj txujkev cawm dlim.

²⁸Thov muab puab tej npe tshem tawm huv koj phoo ntawv kws teev cov tuabneeg muaj sa nyob tej npe, thov kuas puab tsi xob muaj npe nyob nrug koj tsaav tuabneeg.

²⁹Tabsis Vaajtswv, kuv mob nyaav heev hab taag kev ca sab lawm, thov koj tsaa kuv hab cawm kuv!

³⁰Kuv yuav hu nkauj qhuas Vaajtswv, kuv yuav qha nwg lub fwjchim kws luj kawg nkaus hab ua nwg tsaug.

³¹Ua le nuav txaus tug TSWV sab dlua le muab nyuj tua hlawv taagnrho ua khoom fij.

³²Thaus cov tuabneeg kws raug tsimtxom pum tej nuav, puab zoo sab heev; hab yuav txhawb cov tuabneeg kws muab sab rau pehawm Vaajtswv tug zug.

³³Tug TSWV yeej noog cov tuabneeg txomnyem tej lug thov, hab nwg ncu ntsoov nwg tsaav tuabneeg kws nyob huv tsev lojcuj.

³⁴Lub ntuj hab lub teb, tej havtxwv hab txhua yaam tsaj huv havtxwv ca le qhuas Vaajtswv;

³⁵nwg yuav cawm lub nroog Yeluxalees hab txhim khu cov Yudas tej nroog dlua tshab. Nwg tsaav tuabneeg yuav nyob huv cov nroog hab kaav lub tebchaws ntawd.

³⁶Lub tebchaws ntawd yuav yog nwg cov tubkhai tej xeebntxwv tug, hab cov kws hlub nwg yuav tau nyob huv lub tebchaws ntawd moog le.