Read Hmong Njua Phoo Ntawv Nkauj 7 Bible Online

Phoo Ntawv Nkauj 7 - Hmong Njua bible

Phoo Ntawv Nkauj 7

¹Tug TSWV kws yog kuv tug Vaajtswv, kuv tuaj thov koj tiv thaiv kuv; thov koj cawm kuas kuv dlim ntawm cov tuabneeg kws caum nteg kuv,

²lossis puab yuav dlua kuas kuv ndluag taag ib yaam le tsuv ntxhuav dlua, puab yuav caab kuv moog kuas tsi muaj leejtwg cawm tau.

³Tug TSWV kws yog kuv tug Vaajtswv, yog kuv tau ua txhum rua leejtwg, yog kuv tau ntxeev sab rua kuv tug phoojywg, lossis kuv txhobtxwm ua limham rua kuv cov yeebncuab, yog kuv tau ua tej kev txhum nuav ib yaam twg lawm,

⁵thov ca kuv cov yeebncuab caum hab nteg kuas tau kuv, ca puab muab kuv tua hab txav ua tej thooj povtseg. Tsi xob pub kuas kuv muaj sa nyob huv lub nplajteb nuav le.

⁶Tug TSWV, ca le sawv tseeg nrug koj txujkev npautawg lug, thov sawv nreg nroog tawmtsaam kuv cov yeebncuab tej kev chim; koj ca le sawv lug paab kuv! Kev ncaaj nceeg yog koj saamfwm kuas muaj.

⁷Ca le sau txhua tsaav tuabneeg lug nyob puagncig koj, hab nyob sau koj lub zwmtxwv kws nyob sau ntuj lug tswj fwm puab.

⁸Tug TSWV, koj yog tug kws txav txim rua tuabneeg, thov koj ca le txav txim ncaaj rua kuv, rua qhov koj paub has tas kuv tsi tau ua txhum dlaabtsi.

⁹Koj yog Vaajtswv tug kws ncaaj nceeg, koj txav txim rua peb tej kev xaav kws peb lub sab ntshaw. Thov muab cov tuabneeg sab phem tej kev ua phem tshem moog hab muab nqe zug rua cov tuabneeg kws ua zoo.

¹⁰Vaajtswv yog tug tiv thaiv kuv, nwg cawm cov tuabneeg kws fwm nwg.

¹¹Vaajtswv yog tug txav txim ncaaj nceeg hab rau txim tsi tseg rua cov tuabneeg kws ua phem ua qas.

¹²Yog puab pheej tsi tso puab tej kev ua phem tseg, Vaajtswv yuav huv nwg raab ntaaj kuas ntse. Nwg yuav ntaa nwg raab neevnti hab npaaj tog tua xwb;

¹³Nwg yuav npaaj nwg cov cuabyeej kws tua tuabneeg tuag, hab taw nwg tej xub vug nplaim tawg rua puab.

¹⁴Saib maj, cov tuabneeg sab phem tsim kev phem kev qas lawm; puab nrhav kev ua phem hab xyum ua tej kws tsi ncaaj xwb.

¹⁵Tabsis puab yuav poob taag rua huv lub qhov kws puab khawb cuab tog lwm tug kev.

¹⁶Yog le ntawd, puab txhaj raug txim, vim puab tej kev phem kev qas, hab raug mob vim qhov kws puab hlaa txuj kevcai.

¹⁷Kuv ua tug TSWV tsaug rua nwg txujkev ncaaj nceeg, kuv hu nkauj qhuas tug TSWV, tug kws nyob sau qhov chaw sab tshaaj plawg.