Read Hmong Njua Phoo Ntawv Nkauj 71 Bible Online

Phoo Ntawv Nkauj 71 - Hmong Njua bible

Phoo Ntawv Nkauj 71

¹Tug TSWV, kuv lug cuag koj, thov koj ua tug tsomkwm kuv, thov tsi xob pub kuv swb luas ib zag le!

²Rua qhov koj yog tug ncaaj nceeg, thov paab kuv hab cawm kuas kuv dlim. Thov noog kuv tej lug thov hab cawm kuv lauj!

³Thov kuas koj yog kuv lub chaw nkaum hab ua lub chaw faajxwm kws tiv thaiv kuv, koj yog kuv qhov chaw cawm sav hab tiv thaiv kuv.

⁴Kuv tug Vaajtswv, thov cawm kuas kuv dlim ntawm cov tuabneeg sab phem, dlim ntawm cov tuabneeg limham hab cov tuabneeg ua phem ua qas.

⁵Vaajtswv tug kws kaav txhua tsaav yaam, kuv muab kuv txujkev ca sab tso plhuav rua koj, kuv yeej ibtxwm ca sab rua koj thaus kuv tseem hluas lug lawm.

⁶Kuv ca sab rua koj taag kuv simneej, koj yeej tsomkwm kuv txij thaus yug kuv poob nthaav lug lawm. Kuv yuav naj nub qhuas koj.

⁷Kuv lub neej tub ua yaam ntxwv rua coob leej xyum, rua qhov koj yog kuv lub chaw nkaum kws ruaj khov.

⁸Kuv qhuas koj ib nub tsaus ntuj hab pav txug koj tug tshwjchim.

⁹Txawm yog taamsim nuav kuv laug lawm los thov koj tsi xob tso kuv tseg, taamsim nuav kuv qaug zug heev los thov koj ncu ntsoov kuv.

¹⁰Kuv cov yeebncuab xaav nrhav kuv tua povtseg, puab sis thaam hab tuav tswvyim tawmtsaam kuv.

¹¹Puab has tas, “Vaajtswv tub tso nwg tseg lawm, ca le moog soj nwg qaab hab nteg kuas tau nwg, yeej tsi muaj leejtwg cawm nwg hlo le.”

¹²Vaajtswv, thov tsi xob nyob nrug dleb ntawm kuv, kuv tug Vaajtswv, ca le maaj nrooj lug paab kuv lauj!

¹³Thov kuas cov tuabneeg kws tuaj tua kuv ca le swb hab raug kev puamtsuaj. Thov kuas cov tuabneeg kws pheej nrhav kev ua kuas kuv raug mob ca le txaajmuag hab poob ntsejmuag.

¹⁴Kuv yuav naj nub ca sab rua koj moog tsi tso tseg le.

¹⁵Kuv yuav qha koj lub sab dlawb sab zoo rua luas paub, kuv yuav naj nub qha koj txujkev cawm dlim, txawm yog kuv paub tsi txhua los kuv yuav qha.

¹⁶Tug TSWV kws kaav txhua tsaav yaam, kuv yuav qhuas koj lub fwjchim, kuv yuav pav koj txujkev ua sab dlawb sab zoo nkaus xwb.

¹⁷Koj yeej ibtxwm qha kuv thaus kuv tseem hluas lug, hab kuv tseem pheej tshaajtawm koj teg num kws zoo kawg nkaus lug txug naj nub nua.

¹⁸Vaajtswv, nwgnuav kuv laug hab kuv tej plaubhau tub dlawb taag lawm, thov koj tsi xob tso kuv tseg.

¹⁹Vaajtswv, koj txujkev ncaaj nceeg sab nto ntuj plawg. Koj tau ua ntau yaam txujci tseemceeb lug lawm, yeej tsi muaj ib tug zoo cuag koj lawm.

²⁰Koj tso kev nyuaj sab ntxhuv plawv hab kev txomnyem lug rua kuv, tabsis koj yuav txhawb kuv tug zug dlua ntxiv, koj yuav paab kuas kuv dlim ntawm txujkev tuag rov qaab lug.

²¹Koj yuav tsaa kuv ua tug muaj fwjchim luj dlua qhov qub, hab koj yuav nplig kuv sab dlua ib zag ntxiv.

²²Kuv yuav ntaus nkauj nogncaas qhuas koj, kuv tug Vaajtswv, kuv yuav qhuas koj txujkev ncaaj nceeg. Cov Yixalayees tug Vaajtswv kws dlawbhuv, kuv yuav ntaus nkauj nogncaas hu nkauj qhuas koj.

²³Thaus kuv ntaus nkauj nogncaas, kuv yuav hu nkauj zoo sab, kuv yuav hu nkauj kawg kuv lub sab lub ntsws, rua qhov koj tau cawm kuv dlim lawm.

²⁴Kuv yuav pav koj txujkev ncaaj nceeg taag nub, rua qhov cov tuabneeg kws pheej nrhav kev ua kuas kuv raug kev txomnyem tub swb hab txaajmuag kawg le lawm.