Read Hmong Njua Phoo Ntawv Nkauj 72 Bible Online

Phoo Ntawv Nkauj 72 - Hmong Njua bible

Phoo Ntawv Nkauj 72

¹Vaajtswv, thov koj qha rua vaajntxwv kuas txav txim lawv le koj txujkev ncaaj nceeg, thov muab koj txujkev txav txim ncaaj nceeg pub rua nwg,

²nwg txhaj yuav muab txujkev txav txim ncaaj nceeg lug kaav koj tsaav tuabneeg hab muab txujkev ncaaj nceeg lug tswj cov kws raug kev tsimtxom.

³Thov kuas lub tebchaws muaj kev vaammeej; hab ca lub tebchaws tau txais kev ncaaj nceeg.

⁴Thov kuas vaajntxwv txav txim ncaaj rua cov pluag, thov kuas nwg paab cov txomnyem hab muab cov tuabneeg kws tsimtxom puab tsuj ntag rua huv aav.

⁵Thov kuas koj tsaav tuabneeg pehawm koj tsi paub kawg, ib yaam le lub nub hab ib yaam le lub hli pum kev ib tam dlhau rua ib tam moog le.

⁶Thov kuas vaajntxwv zoo le cov naag kws lug ywg tej laj tej teb, hab zoo le kob naag tshauv lug ywg lub tebchaws.

⁷Thov kuas tej kev ncaaj nceeg muaj nyob rua nwg tam, hab thov kuas muaj kev vaammeej tsi tu ib yaam le lub hli ci pum kev.

⁸Nwg yuav kaav saab havtxwv tim nuav moog txug ndlua saab havtxwv tim u.

⁹Cov tuabneeg kws nyob tom taj suabpuam yuav qhau cev hlo pehawm nwg, nwg cov yeebncuab yuav qhau hlo cev dlaa rua huv aav.

¹⁰Cov vaajntxwv kws nyob huv tebchaws Xapees hab huv tej koog povtxwv yuav coj khoom tuaj rua nwg, hab cov vaajntxwv kws nyob huv tebchaws Alanpias hab tebchaws Eti-aupias yuav coj khoom tuaj pub rua nwg.

¹¹Txhua tug vaajntxwv yuav txhus caug pe nwg, hab txhua tsaav tuabneeg yuav ua num rua nwg.

¹²Nwg cawm cov tuabneeg pluag kws thov txug nwg, hab cov tuabneeg txomnyem kws tsi muaj leejtwg paab.

¹³Nwg taabncuab cov kws qaug zug hab cov pluag, nwg cawm cov tuabneeg txomnyem txujsa.

¹⁴Nwg cawm puab dlim ntawm cov tuabneeg tsimtxom hab cov tuabneeg limham; nwg saib puab txujsa tseemceeb.

¹⁵Thov kuas vaajntxwv muaj sa nyob txhab naj moog pua xyoo! Thov kuas luas coj kub huv tebchaws Senpas tuaj pub rua nwg, thov kuas luas thov Vaajtswv paab nwg tsi tseg tsi tu, thov Vaajtswv foom koob moov rua nwg moog le!

¹⁶Thov kuas lub tebchaws ntawd muaj nplej ntsu nplua mag, thov kuas muaj qoobloo puv nkaus sau tej pov roob, tej txiv ntoo kuas muaj ntau ib yaam le peg tebchaws Lenpanoos. Thov kuas muaj tuabneeg nyob puv nkaus huv tej nroog ib yaam le tej nyom tuaj puv nkaus huv tej nraag laj.

¹⁷Vaajntxwv lub npe yuav nyob moog ibtxhis, nwg lub koob meej yuav nyob ntev ib yaam le lub nub. Ca txhua tsaav tuabneeg thov Vaajtswv foom koob moov rua puab ib yaam le nwg tau foom koob moov rua vaajntxwv.

¹⁸Ca le qhuas tug TSWV kws yog cov Yixalayees tug Vaajtswv! Nwg tuab leeg xwb txhaj ua tau tej txujci tseemceeb nuav.

¹⁹Qhuas nwg lub npe kws muaj tshwjchim moog ibtxhis le! Thov kuas nwg tug tshwjchim nyob puv nkaus huv lub nplajteb nuav. Amees! Amees!

²⁰Yexais tug tub Daviv tej lug thov Vaajtswv xaus le nuav lawm xwb.