Read Hmong Njua Phoo Ntawv Nkauj 73 Bible Online

Phoo Ntawv Nkauj 73 - Hmong Njua bible

Phoo Ntawv Nkauj 73

¹Vaajtswv ua zoo kawg nkaus rua cov Yixalayees kws muaj lub sab ncaaj nceeg.

²Tabsis kuv tub tsi tshua muaj sab vaam lawm; kuv kev ntseeg tub pluj yuav taag,

³rua qhov kuv khib cov tuabneeg khaavtheeb, thaus kuv pum has tas, cov tuabneeg sab phem lub neej zoo dlua.

⁴Puab tsi tau tiv kev mob kev nkeeg, puab noj qaab nyob zoo hab puab muaj zug quas npho

⁵Puab tsi tau tiv kev txomnyem le luas tej; hab puab tsi muaj kev ntxhuv sab le lwm tug.

⁶Yog le ntawd, puab txhaj muab kev khaavtheeb lug coj ib yaam le puab coj paug cejdlaab hab muab kev nruj tsiv lug naav ib yaam le naav lub tsho ntev.

⁷Puab lub sab nthuav tej kev phem tawm tuaj, hab puab lub tswvyim npaaj rawv ua kev phem kev qas.

⁸Puab luag lwm tug plig hab has tej lug phem lug qas. Puab khaavtheeb hab tuavhuv tsimtxom luas.

⁹Puab thuam Vaajtswv tug kws nyob sau ntuj hab has lug khaavtheeb ntxhas yuam tej tuabneeg huv nplajteb nuav.

¹⁰Txawm yog Vaajtswv tsaav tuabneeg los ca le yuam kev nrug cov tuabneeg ntawd hab ntseeg puab tej lug heev.

¹¹Puab has tas, “Vaajtswv yeej tsi paub le, tug kws muaj fwjchim luj kawg nkaus los yeej tsi paub zaaj nuav le.”

¹²Cov tuabneeg sab phem yeej los zoo le ntawd, puab muaj txhua yaam nplua mag lawm los puab yimfuab muaj ntau ntxiv.

¹³Qhov kws kuv tswj kuv lub sab kuas ua tau tuabneeg zoo hab tsi ua txhum ntawd, txawm tsi muaj nqes le los?

¹⁴Vaajtswv, koj tau ua rua kuv tiv kev txomnyem taag nub; hab koj rau txim rua kuv txhua taagkig sawv ntxuv.

¹⁵Yog kuv laam tau laam has le ntawd, ntshai kuv tsi coj lub neej zoo le koj tsaav tuabneeg.

¹⁶Zaaj nuav yeej nyuaj kawg le, tabsis kuv muab lug xaav txhij xaav txhua saib zoo le caag, txawm le ntawd los kuv yeej tsi totaub

¹⁷moog txug thaus kuv moog rua huv koj lub Tuamtsev. Thaus ntawd kuv maam paub tseeb txug tej kws yuav lug raug cov tuabneeg sab phem ntawd.

¹⁸Qhov tseemceeb yog koj yuav kuas puab taug txujkev kws nplua nplua hab ua kuas puab qaug puamtsuaj moog.

¹⁹Tuab ntsais muag xwb, puab ca le raug kev puamtsuaj taag. Thaus kawg puab yuav poob moog rua txujkev txomnyem heev.

²⁰Puab lub neej zoo ib yaam le tuabneeg ua npau suav, thaus nwg tsim lug nwg yeej tsi ncu qaab txhua yaam taag lawm. Tug TSWV, thaus koj sawv tseeg lug, cov tuabneeg ntawd yuav pluj ndlais moog.

²¹Thaus kuv chim hab tu sab heev,

²²kuv ruag ib yaam le tug tsaj, kuv yeej tsi totaub tej kws koj ua hlo le.

²³Txawm yog le ntawd los kuv yeej nrug nraim koj ua ke hab koj tuav rawv kuv txhais teg.

²⁴Koj tej lug qhuab ntuag naj nub coj kuv txuj hauv kev, hab txug thaus kawg koj yuav lug tog kuv moog hab pub rua kuv tau ntsejmuag.

²⁵Dlhau koj lawm, tsi muaj lwm yaam kws kuv xaav tau nyob sau ntuj. Yog muaj koj lawm, kuv tsi ntshaw ib yaam dlaabtsi huv nplajteb nuav le.

²⁶Kuv tug zug hab kuv lub sab qaug zug zuj zug lawm. Tabsis Vaajtswv yog kuv tug zug, nwg yog tug kws kuv ntshaw moog ibtxhis.

²⁷Cov tuabneeg kws tso koj tseg yuav pluj taag moog; koj yuav ua kuas cov tuabneeg kws tsi muab sab npuab koj raug puamtsuaj taag.

²⁸Tabsis kuv mas zoo sab kawg, vim kuv nyob ze Vaajtswv; kuv muaj tug TSWV kws yog Vaajtswv ua tug tsomkwm kuv. Hab kuv yuav qha txhua yaam kws nwg ua rua suavdlawg paub.