Read Hmong Njua Phoo Ntawv Nkauj 74 Bible Online

Phoo Ntawv Nkauj 74 - Hmong Njua bible

Phoo Ntawv Nkauj 74

¹Vaajtswv, vim le caag koj muab peb tso tseg le nuav? Koj yuav chim rua koj tsaav tuabneeg moog ibtxhis le los?

²Thov koj ncu ntsoov tsaav tuabneeg kws koj xaiv lug ua koj tug ntau xyoo lug lawm, yog tsaav tuabneeg kws koj tau tso dlim kev ua luas qhev lug ua koj tsaav tuabneeg. Thov ncu ntsoov lub Roob Xi-oos kws koj tau lug nyob ib zag lawm.

³Koj sim moog ncig kuas thoob plawg tej tsev kws puag ntsoog taag ntawd saib; peb cov yeebncuab tuaj muab txhua tsaav yaam kws nyob huv lub Tuamtsev rhuav puamtsuaj taag dlu lug.

⁴Koj cov yeebncuab tuaj qw ua tsuj ua tsaug huv koj lub Tuamtsev; puab tuaj txhus puab tej chij ua cim qha has tas puab kovyeej lawm.

⁵Puab zoo ib yaam le cov tuabneeg txawj ntuv ntoo, puab muab taus ntuv piskag tej ntoo qaug zum zawg povtseg.

⁶Puab nqaa taus hab rauj tuaj tsoo tej txag ntoo tawg taag povtseg.

⁷Puab tuaj lauj koj lub Tuamtsev hab tis suavtawg hlawv kub nyab taag; puab ua rua thaaj chaw kws peb pehawm koj tsi huv lawm.

⁸Puab yeej xaav tuaj tsoo kuas peb tawg mog nyoos; puab tis suavtawg hlawv txhua thaaj chaw kws pehawm Vaajtswv huv lub tebchaws nuav.

⁹Peb tej cim tseemceeb pluj taag lawm tsi tshuav ib tug cev Vaajtswv lug seem nyob le, hab yeej tsi muaj leejtwg paub has tas qhov nuav tseem tshuav ntev le caag.

¹⁰Vaajtswv, yuav ca peb cov yeebncuab luag koj ntev npaum le caag hab? Yuav ca puab txobthuam koj lub npe moog ibtxhis le los?

¹¹Yog vim le caag koj txhaj tsi kaam paab peb le? Vim le caag koj muab koj ob txhais teg zais rua tom koj nrausqaum?

¹²Vaajtswv, koj yeej yog peb tug vaajntxwv thaus chivkeeb lug; koj yeej tau cawm peb dlim ntau zag lug lawm.

¹³Koj siv koj tug zug nchaav muab havtxwv faib ua ob saab, hab koj muab tej zaaj huv havtxwv tej taubhau tsoo ntsoog taag;

¹⁴hab koj muab tug Levi-athas lub taubhau tsoo, hab muab nwg lub cev coj moog rua tej tsaj tom taj suabpuam noj.

¹⁵Koj tsim muaj tej qhovdlej txhawv hab dlej cag ndlwg laub lug; hab koj ua rua tej dlej kws ndlwg qhuav taag huv tuabsi.

¹⁶Koj yog tug kws tsim kuas muaj nruab nub hab mo ntuj; koj muab lub nub hab lub hli tso nyag nyob muaj nyag chaw;

¹⁷koj tau cais kuas muaj nrim rua lub nplajteb nuav; koj teem kuas muaj caij ntuj kub hab muaj caij ntuj no.

¹⁸Tabsis tug TSWV, ncu ntsoov has tas koj cov yeebncuab luag koj plig kawg, puab yog cov tuabneeg kws tsi fwm koj hab txobthuam koj heev.

¹⁹Thov tsi xob ca koj tsaav tuabneeg kws taag kev ca sab poob moog rua puab cov yeebncuab kws sab phem teg; hab tsi xob muab koj tsaav neeg kws pheej raug luas tsimtxom tso tseg!

²⁰Ncu ntsoov tej kws koj tau nrug peb coglug ua ke lawm; rua qhov naj nub muaj kev yuam cai nyob rua txhua ceg kaum kws muaj kev tsaus ntuj nti huv lub tebchaws.

²¹Thov tsi xob ca cov tuabneeg kws raug luas tsimtxom poob ntsejmuag; thov ca cov tuabneeg pluag hab cov tuabneeg txomnyem tau qhuas koj.

²²Vaajtswv, ca le sawv lug has koj rooj plaub! Ncu ntsoov has tas, cov tuabneeg kws tsi fwm koj luag koj plig taag nub le.

²³Ncu ntsoov koj cov yeebncuab tej suab qw kws npautawg vog, koj cov yeebncuab tej suab qw yeej nrov taag nub tsi ntsag le.