Read Hmong Njua Phoo Ntawv Nkauj 77 Bible Online

Phoo Ntawv Nkauj 77 - Hmong Njua bible

Phoo Ntawv Nkauj 77

¹Kuv tsaa suab hlo quaj rua Vaajtswv; kuv tsaa suab hlo quaj rua Vaajtswv, hab nwg nov kuv lub suab quaj.

²Thaus kuv muaj kev ntxhuv sab, kuv thov tug Tswv; kuv tsaa teg thov Vaajtswv ib mos kaaj ntug plawg, tabsis kuv tseem tsi muaj kev kaaj sab le.

³Thaus kuv xaav txug Vaajtswv, kuv ntxhuv sab kawg le; thaus kuv lub sab xaav txug Vaajtswv kuv qaug zug heev.

⁴Nwg tsi pub kuv tsaug zug ib mos kaaj ntug plawg; kuv ntxhuv sab heev kuv has tsi tau lug le.

⁵Kuv xaav txug lub caij lub nyoog kws dlhau moog zuj zug, hab ncu txug ntau xyoo kws tub dlhau lug tau ntev lawm.

⁶Kuv xaav tsheej taag mo, kuv lub sab has tujtawg le nuav rua kuv:

⁷“Tug TSWV txawm tsi leeg yuav peb le los? Nwg txawm yuav tsi txaus sab rua peb ntxiv le lawm los?

⁸Vaajtswv tso peb tseg tsi hlub peb lawm los? Nwg tej lug cog tseg txawm yuav tsi tav le los?

⁹Puas yog Vaajtswv tsi ncu qaab hlub peb lawm? Puas yog nwg txujkev chim hloov txujkev hlub chaw lawm?”

¹⁰Kuv has tas, “Tej yaam kws mob kuv sab tshaaj plawg, zoo le Vaajtswv txawm tsi muaj fwjchim le lawm.”

¹¹Tug TSWV, kuv yuav ncu txug koj tej num kws tseemceeb; Kuv yuav rov ncu txug tej txujci tseemceeb kws koj ua yaav taag lug lawm.

¹²Kuv yuav xaav txug txhua yaam kws koj tau ua taag lug lawm; kuv yuav ua tuab zoo xaav txug koj tej num kws tseemceeb.

¹³Vaajtswv, txhua yaam kws koj ua, yeej yog yaam dlawbhuv; tsi muaj ib tug vaajtswv twg kws muaj fwjchim cuag koj.

¹⁴Koj yog tug Vaajtswv kws ua tau tej txujci tseemceeb; koj qha rua ntau tsaav tuabneeg pum koj lub fwjchim.

¹⁵Koj tau siv koj lub fwjchim cawm koj tsaav tuabneeg kws yog Yakhauj hab Yauxej obtug cov xeebntxwv.

¹⁶Vaajtswv, thaus tej dlej pum dlheev koj puab ntshai koj, hab havtxwv qhov tub tub los yeej ntshai koj tshee nyo.

¹⁷Tej fuab ua kuas muaj naag lug; hab xub nroo nrov nroo ntwg sau nruab ntug tuaj; hab tsaglig xub laim cig lab vog rua txhua qhov.

¹⁸Koj ua rua xub nroo nrov nroo ntwg tuaj, hab tsaglig xub laim cig lab vog thoob nplajteb, ua rua lub nplajteb ua zug koog.

¹⁹Koj moog kev sau tej nthwv dlej kws ndlaas nphau nphwv; koj rhais ruam hlaa pis hlo tej havtxwv tub, tabsis tsi pum koj tug neev taw tsuj qhov twg le.

²⁰Koj coj koj tsaav tuabneeg kev kev ib yaam le tug tswv yug yaaj coj paaj yaaj kws yog Aloos hab Mauxes obtug ua ob tug coj.