Read Hmong Njua Phoo Ntawv Nkauj 80 Bible Online

Phoo Ntawv Nkauj 80 - Hmong Njua bible

Phoo Ntawv Nkauj 80

¹Cov Yixalayees tug Tswv Yug Yaaj, thov koj noog peb tej lug thov; tug thawj kws coj koj paab yaaj, thov noog peb tej suab hu lauj. Koj ca le moog nyob sau lub zwmtxwv sau ob tug qhelunpees.

²Thov qha koj rua xeem Efalayees, xeem Npeenyamees, hab xeem Manaxes. Thov qha koj lub fwjchim rua peb hab lug cawm peb!

³Vaajtswv, thov coj peb rov qaab lug! Thov qha koj txujkev hlub rua peb, peb txhaj le yuav dlim!

⁴Tug TSWV kws yog Vaajtswv tug muaj fwjchim luj kawg nkaus, koj tseem yuav chim rua koj tsaav tuabneeg tej lug thov ntev npaum le caag hab?

⁵Koj muab cov mov kws yog kev quaj ntsuag rua peb noj, hab muab lub khob kws yog cov kua muag rua peb haus lawm.

⁶Koj ca cov tuabneeg kws nyob puagncig peb tuaj tua peb lub tebchaws; peb cov yeebncuab tuaj txob thuam peb kawg le.

⁷Vaajtswv tug muaj fwjchim luj kawg nkaus coj peb rov qaab lug! Thov qha koj txujkev hlub rua peb, peb txhaj yuav dlim!

⁸Koj muab lwm tsaav tuabneeg ntab tsiv moog; hab coj txiv maab nraag tebchaws Iziv lug cog rua huv lub tebchaws nuav.

⁹Koj tu thaaj chaw dlu dlav rua cov txiv maab luj hlub; nrhau caag moog tub hab hlaav moog puv nkaus lub tebchaws.

¹⁰Nwg ua dluab ntxoo tuaj roog tej hauv roob; nwg tej ceg ua dluab ntxoo roog taagnrho tej ntoo cab kws luj sab.

¹¹Nwg tej ceg dlauv moog ti nkaus ntawm ntug Havtxwv Meditelanees hab nthuav moog tis nkaus rua peg tug dlej Efalates.

¹²Vim le caag koj muab tug ntsaa laajkaab kws xov lub vaaj ntawd rhuav lawm? Nwgnuav txhua tug tuabneeg kws dlua kev moog lug txhaj nyag tau tej txiv maab ntawd;

¹³npuateb nkaag lug rua huv vaaj hab tsuj tej txiv maab taag, hab tej tsaj qus lug muab noj taag dlu lug lawm.

¹⁴Vaajtswv tug kws muaj Fwjchim Luj kawg nkaus, ca le rov qaab lug cuag peb! Thov koj tsaa qhovmuag sau ntuj tuaj saib peb; thov koj ca le lug hab cawm koj tsaav tuabneeg!

¹⁵Thov koj ca le lug cawm tsob txiv maab kws koj cog ca, cov txiv maab kws koj tu hlub mog nyoos!

¹⁶Peb cov yeebncuab muab tsob txiv maab ntawd ntuv hab puab tis suavtawg hlawv, thov koj ca le saib puab hab muab puab ua kuas puab puamtsuaj taag!

¹⁷Thov koj tsomkwm hab tiv thaiv tsaav tuabneeg kws koj xaiv tseg, yog tsaav tuabneeg kws koj tau pub kuas muaj zug heev.

¹⁸Peb yuav tsi tsiv tawm ntawm koj moog lawm; thov koj paab kuas peb muaj sa nyob, peb yuav qhuas koj xwb.

¹⁹Tug TSWV kws yog Vaajtswv tug muaj fwjchim luj kawg nkaus, thov coj peb rov qaab lug. Thov qha koj txujkev hlub rua peb, peb txhaj yuav dlim.