Read Hmong Njua Phoo Ntawv Nkauj 81 Bible Online

Phoo Ntawv Nkauj 81 - Hmong Njua bible

Phoo Ntawv Nkauj 81

¹Ca le qw zoo sab rua Vaajtswv tug kws tiv thaiv peb; ca le hu nkauj qhuas Yakhauj tug Vaajtswv!

²Ca le pib ntaus nkauj nogncaas hab nruag npuaj; ca le tshuab raaj hab ntaus nkauj nogncaas.

³Ca le tshuab xyu rua rooj noj rooj haus thaus hli xab hab thaus hli nraa.

⁴Nuav yog cov Yixalayees txuj kevcai, hab yog cov lug kws Yakhauj tug Vaajtswv tau saamfwm kuas ua le ntawd.

⁵Nwg muab txuj kevcai nuav cob rua cov Yixalayees thaus kws nwg tawmtsaam lub tebchaws Iziv. Kuv nov ib lub suab kws kuv tsi paub, lub suab ntawd has tas,

⁶“Kuv tsaws lub nraa nyaav kws nyob sau mej nrausqaum; kuv tso mej dlim ntawm txujkev kws nqaa tej thwvcib nyaav heev.

⁷Thaus mej raug kev txomnyem, mej hu txug kuv, kuv tau cawm mej dlim. Kuv teb mej tej lug thov huv cov naag xub naag cua kws kuv nyob tuaj; kuv tau sim mej sab thaus mej tseem nyob ntawm lub qhov dlej txhawv Melinpas.

⁸Kuv tsaav tuabneeg, mej ca le noog kuv tej lug ntuag; cov Yixalayees, kuv xaav kuas mej noog kuv tej lug!

⁹Mej tsi xob moog pe lwm tug vaajtswv.

¹⁰Kuv yog tug TSWV kws yog mej tug Vaajtswv, kws tau coj mej tsiv nraag tebchaws Iziv lug. Ca le rua ncauj, kuv yuav pub mov rua mej noj.

¹¹“Tabsis kuv tsaav tuabneeg tsi noog kuv tej lug; cov Yixalayees tsi fwm kuv le.

¹²Yog le ntawd, kuv txhaj ca puab ua lawv le puab lub sab tawv hab ua lawv le puab sab xaav.

¹³Kuv xaav kuas kuv tsaav tuabneeg noog kuv lug; hab xaav kuas puab fwm kuv kawg le!

¹⁴Ces kuv yuav ceev nrooj moog ua kuas puab cov yeebncuab swb, hab ua kuas yeej taagnrho puab cov yeebncuab.

¹⁵Cov tuabneeg kws ntxub kuv, yuav ntshai hab txhus caug ndlua ntawm kuv xubndlag; hab kuv yuav rau txim rua puab moog ibtxhis le.

¹⁶Tabsis kuv yuav muab cov mov kws zoo tshaaj plawg rua mej noj hab muab tej zib ntaab kws mej txaus sab heev rua mej noj.”