Read Hmong Njua Phoo Ntawv Nkauj 83 Bible Online

Phoo Ntawv Nkauj 83 - Hmong Njua bible

Phoo Ntawv Nkauj 83

¹Vaajtswv, thov koj tsi xob nyob ntsag tu; tsi xob ua tug tsi paub hab tsi xob nyob tuabywv!

²Ca le saib! Koj tej yeebncuab tub ntxeev sab hab cov kws ntxub koj tub sawv tawmtsaam koj lawm.

³Puab lub sab xaav nraim nkoog ua phem rua koj tsaav tuabneeg; puab ntxeev sab rua tsaav tuabneeg kws koj naj nub tsomkwm.

⁴Puab has tas, “Ca le tuaj peb moog tua puab lub tebchaws kuas puamtsuaj taag; kuas luas txhaj tsi ncu txug tsaav tuabneeg Yixalayees moog ibtxhis le lawm.”

⁵Cov yeebncuab kws pum zoo ua le puab has hab koom sab ua ke tawmtsaam koj yog:

⁶Cov Edoos, cov Yisamayees, cov Mau-am hab cov Hakis,

⁷cov Nkenpas, cov Amoos hab cov Amalej, cov Filitees hab hab cov Tiles.

⁸Cov Axilias los kuj koom teg nrug puab hab ua phoojywg nrug cov Amoos hab cov Mau-am kws yog Lauj cov xeebntxwv.

⁹Thov koj ca le ua rua puab ib yaam le koj ua rua cov Midias, cov Xixelas hab cov Yanpees kws nyob ntawm tug Dlej Kisoos.

¹⁰Koj tau tua puab swb nyob ntawm Edaules, puab tuag hab lwj taag rua huv aav.

¹¹Thov koj tua puab cov thawjcoj ib yaam le koj tua Aules hab Xees; thov koj tua kuas puab cov numtswv swb ib yaam le koj tua Xenpas hab Xamunas,

¹²vim puab khaav has tas, “Peb yuav moog txeeb lub tebchaws kws yog Vaajtswv tug lug ua peb tug.”

¹³Vaajtswv, thov koj muab puab ntab tsiv kuas taag ib yaam le tej moov aav, hab ib yaam le tej quavnyaab kws cua muab ntsawj yaa taag,

¹⁴hab ib yaam le suavtawg kub haav zoov, ib yaam le tej nplaim tawg kws cig laim lag sau tej ncov roob,

¹⁵thov koj tso naag xub naag cua lawv puab tsiv tawm moog, hab tso cua dlaaj cua dlub lug ntsawj ua kuas puab ntshai heev.

¹⁶Tug TSWV, thov koj ua kuas puab raug kev txaajmuag. Hab kuas puab pum koj lub fwjchim.

¹⁷Thov kuas puab swb hab ntshai moog taag ibtxhis le; thov kuas puab tuag ua rhuav plhu ntsuav.

¹⁸Kuas puab paub has tas, koj tuab leeg txhaj yog tug TSWV, hab yog tug muaj fwjchim luj kawg nkaus kws kaav lub qaab ntuj nuav.