Read Hmong Njua Phoo Ntawv Nkauj 86 Bible Online

Phoo Ntawv Nkauj 86 - Hmong Njua bible

Phoo Ntawv Nkauj 86

¹Tug TSWV, thov koj noog hab teb kuv tej lug thov, vim kuv taag kev ca sab hab qaug zug heev lawm.

²Thov cawm kuas kuv dlim Ntawm txujkev tuag, rua qhov kuv yeej fwm koj; thov cawm kuv kws yog koj tug tubkhai, kuv ca sab ntsoov rua koj.

³Koj yog kuv tug Vaajtswv, thov Koj taabncuab kuv; kuv thov ib nub tsaus ntuj ndlais.

⁴Tug TSWV, thov paab kuas koj tug tubkhai tau kev zoo sab, vim kuv tau thov koj lawm.

⁵Koj yeej ua zoo rua peb hab zaam peb lub txim, koj txujkev hlub kws tsi paub kawg muaj rua txhua tug kws thov koj.

⁶Tug TSWV, thov koj noog kuv tej lug thov hab noog kuv lub suab quaj thov paab.

⁷Thaus kuv muaj kev ntxhuv sab kuv hu txug koj, koj yeej teb kuv tej lug thov.

⁸Tug TSWV, tsi muaj dlua lwm tug vaajtswv zoo cuag koj, tsi muaj leejtwg txawj ua tau tej txujci zoo le koj ua.

⁹Txhua tsaav tuabneeg kws koj tsim yuav tuaj txhus caug pehawm koj; puab yuav qhuas koj lub npe kws zoo kawg nkaus.

¹⁰Koj yog tug muaj fwjchim luj hab ua tau tej txujci tseemceeb; koj tuab leeg xwb txhaj yog Vaajtswv.

¹¹Tug TSWV, thov koj qha kuas kuv paub ua lawv le koj lub sab nyam, kuv yuav fwm koj ntawm lub sab ncaaj nceeg; thov pub kuas kuv muaj lub sab dlawb paug pehawm koj.

¹²Tug TSWV kws yog kuv tug Vaajtswv, kuv yuav qhuas koj lub npe kawg sab kawg ntsws; hab kuv yuav tshaajtawm koj lub npe kuas nrov nchaa moog ibtxhis.

¹³Koj txujkev hlub muaj nyob moog tsi paub kawg le! Koj tau cawm kuv dlim ntawm lub qhov tuag lug.

¹⁴Vaajtswv, cov tuabneeg khaavtheeb pheej tuaj tawmtsaam kuv; cov tuabneeg sab phem pheej yuav muab kuv tua povtseg, cov tuabneeg ntawd yog cov kws tsi quavntsej koj le.

¹⁵Tabsis tug TSWV, koj yog tug kws muaj kev taabncuab, hab yog tug Vaajtswv kws muaj kev hlub. Koj ibtxwm muaj lub sab ntev, sab zoo hab ua ncaaj nceeg.

¹⁶Thov koj tig lug cuag kuv hab taabncuab kuv; thov txhawb kuv tug zug hab cawm kuv; rua qhov kuv muaj lub sab dlawb paug pehawm koj ib yaam le koj tug tubkhai kws muab sab npuab koj.

¹⁷Tug TSWV, thov qha koj txujkev ua sab dlawb sab zoo rua kuv; cov tuabneeg kws ntxub kuv yuav raug kev txaajmuag thaus puab pum koj pub kuv muaj kev zoo sab hab paab kuv.