Read Hmong Njua Phoo Ntawv Nkauj 89 Bible Online

Phoo Ntawv Nkauj 89 - Hmong Njua bible

Phoo Ntawv Nkauj 89

¹Tug TSWV, kuv yuav naj nub hu nkauj qhuas koj txujkev hlub kws tsi paub kawg; kuv yuav qha koj txujkev ncaaj nceeg moog ibtxhis.

²Kuv paub has tas, koj txujkev hlub yeej muaj nyob moog ibtxhis, hab koj txujkev ncaaj nceeg nyob ruaj nreeg ib yaam le lub ntuj.

³Koj has tas, “Kuv tau coglug nrug tug tuabneeg kws kuv xaiv lawm; kuv tau coglug rua kuv tug tubkhai Daviv has tas,

⁴‘Koj cov xeebntxwv yuav tau ua vaajntxwv moog le; kuv yuav ceev koj lub zwmtxwv kuas muaj nyob moog ibtxhis.’ ”

⁵Qaum ntuj hu nkauj qhuas tej txujci tseemceeb kws koj ua; tug TSWV, cov tuabneeg dlawbhuv yuav hu nkauj qhuas koj txujkev ncaaj nceeg.

⁶Tug TSWV, nyob sau ntuj yeej tsi muaj leejtwg zoo le koj; cov timtswv ceebtsheej tsi muaj ib tug yuav zoo npaum le koj.

⁷Cov tuabneeg dlawbhuv txhua tug puavleej fwm koj; hab sawv ntawm koj xubndlag huv lub rooj saablaaj.

⁸Tug TSWV kws yog Vaajtswv tug muaj Fwjchim Luj kawg nkaus, tsi muaj lwm tug muaj fwjchim npaum le koj lawm; tug TSWV, koj yeej ncaaj nceeg rua txhua yaam kws koj ua.

⁹Koj kaav taagnrho tej havtxwv kws muaj zug; koj ua rua tej nthwv dlej kws ndlaas ntawd tug hab nyob ntsag tu.

¹⁰Koj muab tug Lahaj kws yog tug zaaj huv havtxwv tsuj nthi hab muab tua kag; koj siv koj tug zug luj zug nchaav ua rua koj cov yeebncuab swb lawm.

¹¹Lub ntuj hab lub nplajteb yog koj tug; koj tsim ib puas tsaav yaam kws muaj nyob huv lub nplajteb nuav.

¹²Koj yog tug tsim saab qaumteb hab saab qaabteb; lub Roob Tanpaus hab lub Roob Helemoos hu nkauj zoo sab qhuas koj.

¹³Ua caag koj muaj fwjchim luj ua luaj! Ua caag koj muaj zug luj zug nchaav ua luaj le!

¹⁴Koj lub tebchaws cog ruaj khov rua ntawm txujkev ncaaj nceeg hab kev tseeb; txhua yaam kws koj ua qha rua peb paub has tas koj yog tug sab zoo hab muaj kev hlub.

¹⁵Cov tuabneeg kws hu nkauj qhuas koj hab cov tuabneeg kws ua lub neej nyob huv qhov kaaj ntawm koj txujkev ua sab dlawb sab zoo mas puab muaj kev zoo sab heev.

¹⁶Vim muaj koj puab txhaj zoo sab taag nub; hab puab qhuas koj txujkev ua sab dlawb sab zoo.

¹⁷Koj paab peb muaj yeej luj kawg le; vim koj txujkev hlub, koj txhaj pub peb kovyeej.

¹⁸Tug TSWV, koj xaiv tug kws tiv thaiv peb; koj yog cov Yixalayees tug Vaajtswv Dlawbhuv kws pub peb muaj vaajntxwv.

¹⁹Tau ntev lug lawm zaaj ywgtoog kws koj has rua koj tug tubkhai kws muab sab npuab koj has tas, “Kuv tau paab ib tug tubrog kws nto npe heev; kuv tau muab lub zwmtxwv cob rua tug kws kuv xaiv ntawm cov pejxeem lug.

²⁰Kuv tau muab roj laub rua sau kuv tug tubkhai Daviv taubhau hab tsaa nwg ua vaajntxwv.

²¹Kuv yuav txhawb nwg tug zug moog le, kuv lub fwjchim yuav ua rua nwg muaj zug heev.

²²Nwg cov yeebncuab yuav kov kov tsi yeej nwg; hab cov tuabneeg sab phem yuav kov tsi yeej nwg.

²³Kuv yuav tsuj ntag nwg cov yeebncuab hab tua txhua tug kws ntxub nwg.

²⁴Kuv yuav hlub nwg hab ua sab zoo rua nwg; kuv yuav paab kuas nwg kovyeej luas moog le.

²⁵Kuv yuav nthuav nwg lub tebchaws kuas dlaav txij ndlua ntawm Havtxwv Meditelanees moog txug ndlua tug Dlej Efalates.

²⁶Nwg yuav has rua kuv tas, ‘Koj yog kuv leej Txiv hab yog kuv tug Vaajtswv; koj yog lub pobzeb kws yog kuv txujkev cawm dlim.’

²⁷Kuv yuav tsaa nwg ua kuv tug tub hlub, nwg yog tug Vaajntxwv kws muaj fwjchim luj dlua lwm tug vaajntxwv.

²⁸Kuv yuav ceev kuv tej lug cog tseg rua nwg moog le, hab tej kws kuv tau nrug nwg sis coglug yuav nyob moog ibtxhis.

²⁹Nwg lub zwmtxwv yuav nyob ruaj khov ib yaam le lub ntuj; hab nwg caajceg yuav ua vaajntxwv moog le.

³⁰“Tabsis yog nwg caajceg tsi fwm kuv tej kevcai, hab tsi ua lub neej lawv le kuv tej lug saamfwm,

³¹hab yog puab tsi ceev kuv tej lug qhuab ntuag, hab tsi khaws kuv tej lug saamfwm ca,

³²ces kuv yuav rau txim rua puab vim puab tej kev txhum; kuv yuav ua kuas puab raug kev txomnyem vim tej kev txhum kws puab ua.

³³Txawm le caag los kuv yuav tsi tso txujkev hlub Daviv tseg lossis yuav ncu ntsoov tej lug kws kuv cog tseg rua nwg lawm.

³⁴Kuv yuav tsi rhuav tej lug kws kuv cog tseg rua nwg, lossis yuav tsi thim tej lug kws kuv cog tseg rua nwg.

³⁵“Kuv tuav kuv lub npe kws dlawbhuv coglug ib zag xwb kaav moog taag ibtxhis; kuv yuav tsi dlaag Daviv ib zag le.

³⁶Nwg yuav muaj xeebntxwv tsi tu moog le hab yog tseem muaj lub nub tawm tuaj, kuv yuav tsomkwm nwg lub tebchaws moog le.

³⁷Nwg lub tebchaws yuav nyob ruaj khov ib yaam le lub hli, ua tug timkhawv tseeb nyob sau nruab ntug.”

³⁸Tabsis koj chim kawg rua tug vaajntxwv kws koj tau xaiv tseg; koj tau tso nwg tseg hab ca nwg nyob qhuav nkuag ca.

³⁹Koj rhuav koj tej lug cog tseg rua koj tug tubkhai, hab muab nwg lub mom kub pov rua huv paag aav.

⁴⁰Koj muab nwg lub nroog tej ntsaa yeej rhuav puag taag hab ca tej chaw faajxwm pob puag taag.

⁴¹Cov tuabneeg kws dlua kev, nyag nwg tej khoom taag; tej tuabneeg zej zog puavleej luag nwg plig.

⁴²Koj pub nwg cov yeebncuab tua yeej nwg lawm; koj ua rua nwg cov yeebncuab muaj kev zoo sab.

⁴³Koj ua kuas nwg tej cuabyeej ua rog siv tsi tau, hab ca nwg cov yeebncuab kovyeej nwg.

⁴⁴Koj tau tshem nwg tug cwj tawm ntawm nwg moog hab muab nwg lub zwmtxwv tsoo qaug rua huv aav lawm.

⁴⁵Koj txav nwg lub noobnyoog kuas tuab lu, hab tsi pub kuas nwg tau ntsejmuag hlo le.

⁴⁶Tug TSWV, koj txawm yuav nraim peb moog ibtxhis le los? Koj txujkev chim kws kub le suavtawg tseem yuav nyob ntev npaum le caag?

⁴⁷Ncu ntsoov has tas, kuv txujsa tuab lu heev; Ncu ntsoov has tas koj tsim peb lug ua tuabneeg xwb!

⁴⁸Leejtwg txhaj yuav nyob ibtxhis tsi txawj tuag? Yuav ua le caag tuabneeg txhaj le tsiv dlim lub qhov ntxaa?

⁴⁹Tug TSWV, koj txujkev hlub thaus u dlua qhov twg lawm? Tej lug kws koj cog tseg rua Daviv nyob qhov twg lawm?

⁵⁰Thov koj ncu ntsoov kuv kws yog koj tug tubkhai kws raug luas thuam heev, kuv tiv tsi taug cov tuabneeg sab phem tej lug tsawm foom le lawm.

⁵¹Tug TSWV, koj cov yeebncuab tau txobthuam tug vaajntxwv kws koj xaiv! Nwg moog txug qhov twg los luas pheej thuam nwg.

⁵²Thov qhuas tug TSWV moog ibtxhis le! Amees! Amees!