Read Hmong Njua Phoo Ntawv Nkauj 9 Bible Online

Phoo Ntawv Nkauj 9 - Hmong Njua bible

Phoo Ntawv Nkauj 9

¹Tug TSWV, kuv ua koj tsaug kawg kuv lub sab; kuv yuav qha txug tej txujci tseemceeb kws koj ua paab kuv lawm.

²Kuv yuav hu nkauj zoo sab vim muaj koj, kuv yuav hu nkauj qhuas koj kws yog Vaajtswv tug muaj Fwjchim Luj kawg nkaus.

³Thaus koj tshwm plawg, kuv cov yeebncuab thim loo rov qaab, puab qaug pawg lug hab tuag taag lawm.

⁴Koj tuaj kuv tog tsaa kuv cai, koj nyob ntawm koj lub zwmtxwv txav txim ncaaj nceeg.

⁵Koj rau txim rua cov tuabneeg kws tsi fwm koj, hab rhuav tshem cov tuabneeg ua phem ua qas hab yuav tsi muaj leejtwg ncu txug puab moog ib txhis le lawm.

⁶Peb cov yeebncuab yuav pluj taag moog ibtxhis, koj muab puab tej nroog rhuav puamtsuaj taag, tsi tshuav ib qho ua chaw ncu txug puab le lawm.

⁷Tabsis tug TSWV ua vaajntxwv moog ibtxhis, nwg tub teeb nwg lub zwmtxwv ua qhov chaw txav txim.

⁸Nwg kaav lub nplajteb ntawm txujkev ncaaj nceeg; nwg txav txim ncaaj nceeg rua txhua tsaav tuabneeg.

⁹Tug TSWV yog lub chaw rua cov tuabneeg kws raug luas tsimtxom nkaum, hab yog lub chaw kaaj sab rua cov tuabneeg kws raug kev nyuaj sab.

¹⁰Tug TSWV, txhua tug kws paub koj, puab yeej ca sab rua koj; koj yeej tsi muab ib tug twg kws lug cuag koj tso tseg le.

¹¹Ca le hu nkauj qhuas tug TSWV kws kaav sau lub roob Xi-oos! Ca le qha tej txujci kws nwg ua rua txhua tsaav tuabneeg paub.

¹²Vaajtswv yeej ncu ntsoov txhua tug kws tiv kev txomnyem; nwg ncu ntsoov puab tej suab quaj, hab nwg rau txim rua cov tuabneeg kws tsimtxom puab.

¹³Tug TSWV, thov hlub kuv lauj! Thov tsaa muag saib tej kev txomnyem kws kuv cov yeeb ncuab ua rua kuv. Tug TSWV, thov cawm kuas kuv dlim ntawm txujkev tuag.

¹⁴Kuv txhaj muaj peevxwm moog sawv taabmeeg cov tuabneeg huv lub nroog Yeluxalees hab qha txhua yaam kws kuv qhuas koj rua puab noog. Kuv yuav zoo sab heev, vim koj cawm kuv dlim lawm.

¹⁵Cov tuabneeg tsi ntseeg Vaajtswv poob rua huv lub qhov kws puab khawb tseg lawm, puab rov maag rooj ntaa npuj kws puab cuab tseg.

¹⁶Tug TSWV qha nwg rua puab paub ntawm txujkev txav txim ncaaj nceeg; hab cov tuabneeg ua phem yuav maag rooj ntaa npuj kws yog puab teg num.

¹⁷Cov tuabneeg sab phem yuav nkaag moog rua huv tubtuag teb, cov ntawd yog cov kws tsi leeg txais yuav Vaajtswv.

¹⁸Cov tuabneeg txomnyem yuav tsi raug luas saib tsi taug moog ntxiv lawm; cov tuabneeg pluag kws taag kev ca sab yuav tsi raug kev tsimtxom moog ntxiv lawm.

¹⁹Tug TSWV, thov koj ca le lug! Tsi xob pub tuabneeg kovyeej koj! Cov tuabneeg kws tsi ntseeg lug sawv taabmeeg koj, hab koj txav txim rua puab.

²⁰Tug TSWV, thov koj ca le ua kuas puab ntshai, ua kuas puab paub has tas, puab yog noobneej xwb.