Read Hmong Njua Phoo Ntawv Nkauj 91 Bible Online

Phoo Ntawv Nkauj 91 - Hmong Njua bible

Phoo Ntawv Nkauj 91

¹Tug kws moog cawm sav rua ntawm tug TSWV, hab tug kws nyob huv tug kws muaj Fwjchim Luj kawg nkaus txujkev tiv thaiv,

²mas tug ntawd txhaj has tau rua tug TSWV has tas, “Koj yog tug tiv thaiv hab tsomkwm kuv. Koj yog kuv tug Vaajtswv; kuv ca sab ntsoov rua koj.”

³Nwg yuav tsi pub koj maag luas lub vuj hlua, hab nwg yuav paab koj dlim ntawm tej kaab mob kev tuag.

⁴Nwg yuav nthuav hlo nwg ob phob tis lug roog koj; nwg yuav tsomkwm koj, koj yuav nyob tso sab plhuav, nwg txujkev ncaaj nceeg yuav tsomkwm hab tiv thaiv koj.

⁵Mo ntuj los koj yuav tsi ntshai kev puamtsuaj lossis tsi ntshai tej xub neevnti kws luas tua nthawv nthaav thaus nruab nub,

⁶lossis tej kaab mob kws lug raug suavdlawg thaus mo ntuj, lossis tej kev puamtsuaj kws tuaj raug suavdlawg thaus nruab nub.

⁷Txawm yog muaj ib txheeb leej tuag nyob ntawm koj ib saab, hab muaj ib vaam leej tuag puagncig koj los yuav tsi muaj xwm dlaabtsi raug koj le.

⁸Koj yuav tsaa qhovmuag saib hab pum luas rau txim rua cov tuabneeg sab phem.

⁹Koj muab tug TSWV ua tug tiv thaiv koj, tug kws muaj Fwjchim Luj kawg nkaus yog tug tsomkwm koj,

¹⁰txhaj yuav tsi muaj kev puamtsuaj lug raug koj, hab kev nruj kev tsiv yuav tsi lug ze koj vaaj koj tsev.

¹¹Vaajtswv yuav khaiv nwg cov timtswv ceebtsheej lug tsomkwm koj, puab yuav tiv thaiv koj txhua qhov kws koj moog.

¹²Puab ob txhais teg yuav fwj koj, tsi pub koj ob txhais kutaw raug pobzeb le.

¹³Koj yuav tsuj pis ntag tsuv ntxhuav hab naab, txawm yog tej tsuv ntxhuav kws nyaum hab tej naab kws muaj taug los koj yuav muab tsuj nthi rua huv koj qaab xibtaws.

¹⁴Vaajtswv has tas, “Kuv yuav cawm cov tuabneeg kws hlub kuv hab yuav tiv thaiv cov tuabneeg kws leeg kuv ua puab tug TSWV.

¹⁵Thaus puab thov txug kuv, kuv yuav teb puab; thaus puab raug kev nyuaj sab, kuv yuav nrug puab nyob; kuv yuav cawm puab kuas dlim hab pub puab tau ntsejmuag.

¹⁶Kuv yuav pub puab muaj sa ntev ua neej nyob hab kuv yuav cawm kuas puab dlim.”