Read Hmong Njua Phoo Ntawv Nkauj 94 Bible Online

Phoo Ntawv Nkauj 94 - Hmong Njua bible

Phoo Ntawv Nkauj 94

¹Tug TSWV, koj yog Vaajtswv tug kws rau txim; thov qha koj txujkev chim rua suavdlawg pum!

²Koj yog tug txav txim rua tuabneeg nplajteb; thov koj sawv hab ua pauj kuas txaus nkaus rua cov tuabneeg khaavtheeb.

³Tug TSWV, cov tuabneeg sab phem yuav zoo sab ntev le caag? Tseem tshuav ntev le caag hab?

⁴Puab yuav has lug phem khaavtheeb ntsuav hab khaav tej kev phem kws puab ua moog ntev le caag?

⁵Tug TSWV, puab caij tsuj koj tsaav tuabneeg hab puab tsimtxom cov tuabneeg kws yog koj tug.

⁶Puab tua cov puj ntsuag hab cov mivnyuas ntsuag, hab puab tua lwm tsaav tuabneeg kws lug nyob huv peb lub tebchaws.

⁷Puab has tas, “Tug TSWV yeej tsi pum peb le; cov Yixalayees tug Vaajtswv tsi paub hlo le.”

⁸Kuv tsaav tuabneeg, ua caag mej yuav ruag ua luaj le? Cov tuabneeg ruag, thaus twg mej maam le ntse?

⁹Vaajtswv yog tug kws tsim peb muaj qhovntsej, nwg tseem tsi nov hab los? Vaajtswv yog tug tsim peb muaj qhovmuag, nwg tseem tsi pum hab los?

¹⁰Vaajtswv qhuab ntuag txhua tsaav tuabneeg, nwg tseem tsi tau rau txim rua puab hab los? Nwg yog xwbfwb rua txhua tug, nwg tseem tsi muaj kev txawj ntse le los?

¹¹Tug TSWV paub tej kws tuabneeg xaav huv sab; nwg paub has tas tej kws tuabneeg xaav tsi muaj qaabhau dlaabtsi.

¹²Tug TSWV, tug tuabneeg kws koj qha hab koj muab koj txuj kevcai cob rua, mas muaj kev kaaj sab lug!

¹³Koj pub tug ntawd tau su nub kws muaj kev ntxhuv sab moog txug nub kws luas khawb tau qhov cuab tug tuabneeg sab phem tsaiv.

¹⁴Tug TSWV yuav tsi tso nwg tsaav tuabneeg tseg; nwg yuav tsi ncaim nwg cov tuabneeg hlo le.

¹⁵Yuav rov muaj kev ua ncaaj nyob huv tej tsev tu plaub, ces cov tuabneeg ncaaj yuav ua ncaaj nceeg moog le.

¹⁶Leejtwg yuav sawv kuv cev moog tawmtsaam cov tuabneeg sab phem? Leejtwg yuav tuaj kuv tog tawmtsaam cov tuabneeg ua phem ua qas?

¹⁷Yog tug TSWV tsi cawm kuv, kuv yuav ca le moog rua huv tubtuag teb.

¹⁸Kuv has tas “Kuv qaug lawm lauj”; tabsis tug TSWV, koj txujkev hlub kws tsi paub kawg paab kuv sawv rov lug.

¹⁹Thaus kuv ntxhuv sab hab ywjfaab ywjfwj, koj nplig kuv lub sab kuas kuv rov muaj kev zoo sab.

²⁰Vaajtswv, koj yeej tsi koom sab nrug tug txav txim tsi ncaaj kws nwg txav txim tsi lawv le txuj cai,

²¹nwg tuavhuv ua tsi ncaaj rua cov tuabneeg zoo hab txav txim tuag rua tug tuabneeg tsi muaj txim.

²²Tabsis tug TSWV tiv thaiv kuv; kuv tug Vaajtswv tsomkwm kuv.

²³Nwg yuav rau txim rua puab, vim tej kev phem kws puab ua hab ua kuas puab puamtsuaj vim puab tej kev txhum; tug TSWV kws yog peb tug Vaajtswv yuav ua kuas puab puamtsuaj.