Read Hmong Njua Phoo Ntawv Nkauj 95 Bible Online

Phoo Ntawv Nkauj 95 - Hmong Njua bible

Phoo Ntawv Nkauj 95

¹Ca le nrug peb qhuas tug TSWV! Peb ca le hu nkauj zoo sab qhuas Vaajtswv tug kws tsomkwm peb!

²Peb ca le lug cuag nwg, ua nwg tsaug hab hu nkauj zoo sab qhuas nwg.

³Rua qhov tug TSWV yog Vaajtswv tug kws muaj fwjchim luj, nwg yog tug Vaajntxwv kws muaj fwjchim luj tshaaj lwm tug vaajtswv.

⁴Nwg kaav taagnrho lub qaab ntuj nuav, txij ndlua huv tej qhov tsua kws t ub tub moog txug sau tej hauv roob sab.

⁵Nwg kaav taagnrho tej havtxwv kws nwg tsim; hab kaav thooj aav kws nwg txhais teg puab.

⁶Ca le lug hab peb khoov ntshis pehawm nwg; peb ca le txhus caug ntawm tug TSWV lub xubndlag, nwg yog tug tsim peb!

⁷Nwg yog peb tug Vaajtswv; peb yog cov tuabneeg kws nwg tsomkwm, peb yog paab yaaj kws nwg pub zaub rua noj. Nub nua ca le noog tej lug kws nwg has:

⁸“Mej tsi xob ua tuabneeg tawv ncauj le mej cov yawmkoob ua thaus nyob nraag taj suabpuam Melinpas hab Maxas.

⁹Thaus nyob nraag puab sim kuv sab, puab pum txhua yaam kws kuv ua paab puab lawm los puab tseem sim kuv sab le ntawd.

¹⁰Plaub caug xyoo ntawd kuv dlhuav cov tuabneeg nuav kawg le, kuv has tas ‘Ua caag puab yuav tsi muab sab npuab kuv hlo le; puab tsi kaam noog kuv tej lug qhuab qha.’

¹¹Chim kuv sab, kuv txhaj has lug txav npluav rua puab has tas, ‘Mej yuav tsi tau moog nyob huv lub tebchaws kws kuv muab rua mej.’ ”