Read Hmong Njua Phoo Ntawv Nkauj 96 Bible Online

Phoo Ntawv Nkauj 96 - Hmong Njua bible

Phoo Ntawv Nkauj 96

¹Ca le hu ib zaaj nkauj tshab qhuas tug TSWV! Tuabneeg thoob nplajteb ca le hu nkauj qhuas tug TSWV!

²Ca le hu nkauj qhuas tug TSWV hab ua nwg tsaug! Naj nub pav nwg txujkev cawm dlim rua suavdlawg noog.

³Ca le pav nwg lub koob lub npe kws nrov nchaa moo lug rua txhua lub tebchaws, pav nwg tej num tseemceeb rua txhua tsaav tuabneeg tau nov; qha nwg teg num kws luj kawg nkaus rua txhua tsaav tuabneeg.

⁴Tug TSWV yog tug kws muaj fwjchim luj, tsimnyog suavdlawg qhuas nwg kawg le; suavdlawg yuavtsum fwm nwg heev dlua fwm tej vaajtswv huv tuabsi.

⁵Lwm tsaav tuabneeg tej vaajtswv tsuas yog mlom xwb. tabsis tug TSWV yog tug tsim lub ntuj.

⁶Nwg lub koob meej hab tug tshwjchim ci ntsaa ab nyob puagncig nwg; nwg lub fwjchim hab kev zoo nkauj nyob puagncig nwg lub Tuamtsev.

⁷Tuabneeg thoob nplajteb, ca le qhuas tug TSWV; ca le qhuas nwg tug tshwjchim hab nwg tug zug.

⁸Ca le qhuas tug TSWV lub npe kws muaj koob muaj meej; ca le nqaa khoom tuaj fij rua huv nwg lub Tuamtsev.

⁹Suavdlawg yuavtsum tu lub sab kuas dlawbhuv moog pehawm tug TSWV; tuabneeg nplajteb, ca le tshee quas nyo ntawm nwg xubndlag!

¹⁰Ca le has rua txhua lub tebchaws has tas, “Tug TSWV yog Vaajntxwv! Lub nplajteb yeej nyob ruaj nreeg tsi txaav chaw le; nwg yuav txav txim ncaaj nceeg rua txhua tsaav tuabneeg.”

¹¹Lub nplajteb hab lub ntuj ca le zoo sab hlo! Havtxwv hab txhua yaam tsaj kws nyob huv havtxwv ca le qw ntshu nrooj;

¹²tej laj teb hab tej qoobloo kws nyob huv tej teb ca le zoo sab; tej ntoo huv haav zoov yuav qw zoo sab

¹³thaus kws tug TSWV lug kaav lub nplajteb nuav. Nwg txujkev ncaaj nceeg hab dlawbhuv yuav kaav tuabneeg nplajteb.