Read Hmong Njua Phoo Ntawv Nkauj 97 Bible Online

Phoo Ntawv Nkauj 97 - Hmong Njua bible

Phoo Ntawv Nkauj 97

¹Tug TSWV yog vaajntxwv! Lub nplajteb ca le zoo sab! Tej koog povtxwv huv havtxwv, mej ca le zoo sab!

²Muaj fuab tsaus nti nyob puasncig nwg; nwg kaav tuabneeg nplajteb ntawm kev ncaaj nceeg hab dlawbhuv.

³Muaj nplaim tawg ua nwg ntej hab kub nwg cov yeebncuab kws nyob puagncig nwg.

⁴Nwg ua kuas tsaglig xub ci pum kev thoob nplajteb; lub nplajteb pum hab ntshai tshee nyo.

⁵Tej hauv roob yaaj le cab ntaab taabmeeg tug TSWV, taabmeeg tug TSWV kws kaav taagnrho lub nplajteb.

⁶Lub ntuj pav nwg txujkev ncaaj nceeg, hab txhua tsaav tuabneeg pum nwg tug tshwjchim kws ci ntsaa ab.

⁷Txhua tug kws pe tej mlom yuav poob ntsejmuag; taagnrho tej vaajtswv yuav txhus caug pehawm tug TSWV.

⁸Tug TSWV, vim koj txujkev txav txim, cov tuabneeg kws nyob huv Xi-oos muaj kev zoo sab heev, hab tej nroog huv tebchaws Yudas los zoo sab kawg le.

⁹Tug TSWV kws muaj Fwjchim Luj luj kawg nkaus, koj yog tug kws kaav taagnrho lub nplajteb nuav; koj yog tug kws muaj fwjchim luj dlua tej vaajtswv huv tuabsi.

¹⁰Tug TSWV hlub cov tuabneeg kws ntxub tej kev phem kev qas; nwg tsomkwm nwg tsaav tuabneeg txujsa; nwg tso puab dlim ntawm cov tuabneeg sab phem txhais teg.

¹¹Qhov kaaj ci rua cov tuabneeg ncaaj nceeg, hab ua rua cov tuabneeg zoo muaj kev zoo sab kawg.

¹²Mej cov kws yog tuabneeg ncaaj nceeg ca le zoo sab, vim txhua yaam kws tug TSWV ua taag lug lawm! Ncu ntsoov txhua yaam kws tug Vaajtswv dlawbhuv ua taag lug lawm, hab ua nwg tsaug.