Read Hmong Njua Phoo Ntawv Nkauj 99 Bible Online

Phoo Ntawv Nkauj 99 - Hmong Njua bible

Phoo Ntawv Nkauj 99

¹Tug TSWV yog Vaajntxwv, hab tej tuabneeg ntshai nwg tshee nyo. Nwg nyob sau nwg lub zwmtxwv ntawm ob tug qhelunpees, hab lub nplajteb ua zug koog.

²Tug TSWV yog tug muaj fwjchim luj nyob huv Xi-oos; nwg yog tug kws kaav txhua lub tebchaws huv tuabsi.

³Txhua tug yuav qhuas nwg lub npe hab lub koob meej kws nrov nchaa moo lug. Nwg tuab leeg yog tug Dlawbhuv!

⁴Vaajntxwv tug kws muaj fwjchim luj, nyam txujkev ncaaj nceeg, koj muab txujkev ncaaj nceeg rua cov Yixalayees; koj coj txujkev ncaaj nceeg hab kev dlawbhuv lug.

⁵Ca le qhuas tug TSWV kws yog peb tug Vaajtswv; ca le pehawm nwg ntawm nwg lub zwmtxwv! Nwg tuab leeg yog tug Dlawbhuv!

⁶Mauxes hab Aloos yog nwg ob tug povthawj, hab Xamuyees tuab leeg yog tug kws thov tug TSWV; puab hu tug TSWV hab nwg teb puab tej lug thov.

⁷Tug TSWV has lug huv tauv fuab tuaj rua puab; puab fwm tej kevcai hab tej lug saamfwm kws nwg muab cob rua puab lawm.

⁸Tug TSWV kws yog peb tug Vaajtswv, koj teb koj tsaav tuabneeg tej lug thov; txawm yog koj tau rau txim rua puab, vim puab tej kev txhum los koj qha rua puab has tas, koj yog tug Vaajtswv kws zaam txim.

⁹Ca le qhuas tug TSWV kws yog peb tug Vaajtswv; hab pehawm nwg ntawm nwg lub roob dlawbhuv! Vim tug TSWV kws yog peb tug Vaajtswv, nwg yog tug Dlawbhuv.