Read Hmong Njua Paajlug 1 Bible Online

Paajlug 1 - Hmong Njua bible

Paajlug 1

¹Tej paajlug nuav yog Vaajntxwv Daviv tug tub Xalumoos kws ua vaajntxwv kaav tsaav tuabneeg Yixalayees tej paajlug.

²Tej nuav yuav paab kuas yug paub has tas lub tswvyim hab tej lug qhuab ntuag zoo le caag, hab yuav paab kuas totaub tej ntsab lug kws tub tub.

³Yuav qha yug paub ua neej ntse ntsuav, paub ua tuabneeg sab dlawb sab zoo, paub ua qhov ncaaj nceeg hab ua lawv kev lawv cai.

⁴Yuav paab tau tug kws tsi thoob tsib to nrog txawj ntse tuaj, hab yuav qha cov tub hluas paub ua neej.

⁵Yuav tsaav tswvyim rua cov tuabneeg kws tub txawj ntse lawm, yuav taw kev rua cov tuabneeg kws kawm ntaub kawm ntawv,

⁶kuas puab paub txhais tej paajlug lub ntsab hab totaub tej zaaj kws cov tuabneeg txawj ntse has.

⁷Tug kws fwm tug TSWV, tug ntawd txhaj yog tug kws muaj kev txawj ntse. Cov tuabneeg ruag nyam thuam lub tswvyim hab tsi kawm txuj kawm ci.

⁸Mivtub, ca le ua tuab zoo noog tej lug kws koj nam hab koj txiv qhuab qha koj.

⁹Nam hab txiv tej lug qha yuav paab kuas koj paub ua lub neej zoo yaam le cev zaam kws ua rua koj zoo nraug.

¹⁰Mivtub, thaus cov tuabneeg sab phem tuaj yum koj moog ua txhum, koj tsi xob nrug puab moog.

¹¹Yog puab has tas, “Ca le nrug peb moog, peb moog tog kev tua tuabneeg! Peb ca le moog nteg tej tuabneeg tsi muaj txim dlaabtsi lug ntaus ua si!

¹²Thaus peb ntsib puab, puab tseem muaj sa nyob cus plawg, tabsis thaus peb moog dlhau lawm, puab yuav tu sav nrho.

¹³Peb yuav moog fuab tau luas tej khoom muaj nqes hab coj tej kws peb fuab tau lug khaws ca puv nkaus rua huv peb tej tsev.

¹⁴Koj ca le nrug peb moog hab koom nrug peb, peb yuav muab tej kws peb moog fuab tau lug ntawd sis faib.”

¹⁵Mivtub, koj tsi xob nrug cov tuabneeg zoo le ntawd ua ke. Koj yuavtsum tsiv tawm ntawm puab moog.

¹⁶Puab cov ntawd tswj tsi tau puab lub sab kuas tsi xob ua txhum. Puab npaaj rawv yuav tua tuabneeg xwb.

¹⁷Yog cuab tsig rua noog pum yeej tsi maag noog ib zag le,

¹⁸tabsis cov tuabneeg kws cuab hlua tog luas tej kev, yog puab cuab hlua tog puab xwb, puab yeej yuav tuag rua puab lub vuj hlua.

¹⁹Kev ua tubsaab los kuj ib yaam le ntawd, cov tuabneeg kws ua nruj ua tsiv rua luas, yog puab txuv puab txujsa.

²⁰Ca le noog! Tswvyim lub suab hu tom tej plawv kev hab tom tej kab tej khw,

²¹hab hu nrov ntxhe ntxhas tom tej roojvaag nroog hab txhua qhov chaw kws muaj tuabneeg tuaj txoos ua ke has tas:

²²“Cov tuabneeg ruag, mej tseem yuav zoo sab ua tuabneeg ruag le mej moog txug nub twg? Mej yuav thuam kev txawj ntse moog txug thaus twg hab? Mej tsi totaub le los?

²³Ca le tig qhovntsej noog thaus kuv ntuag mej, kuv yuav qha tej lug zoo rua mej hab yuav faib kuv tej tswvyim rua mej.

²⁴Kuv tub hu mej hab caw mej lug noog kuv has lawm, tabsis mej tsi tig qhovntsej noog hab tsi quavntsej kuv tej lug.

²⁵Mej tsi khaws kuv tej lug qha ca rua nruab sab, hab tsi kaam ca kuv qhuab ntuag mej.

²⁶Yog le ntawd, thaus mej raug kev nyuaj sab ntxhuv plawv kuv yuav luag mej.

²⁷Thaus mej txhawj ntshai hab kev txomnyem lug qhwv nkaus mej ib yaam le nthwv cua dlaaj cua dlub ntsawj, ua rua mej raug mob ntsaaj lawg hab raug kev txomnyem, kuv yuav tau zoo luag mej.

²⁸Thaus ntawd mej yuav tsaa ncauj hu xaav tau tswvyim, tabsis kuv yuav tsi teb mej. Mej nrhav kuv rua txhua txuj xub ke, tabsis mej yuav nrhav tsi pum kuv nyob qhov twg.

²⁹Mej yeej ibtxwm tsi quavntsej tej kev txawj ntse hab mej pheej tsi kaam noog tug TSWV tej lug le.

³⁰Mej yeej tsi khaws kuv tej lug qha ca, hab thaus kuv qhuab ntuag mej, mej tsi quavntsej kuv tej lug hlo le.

³¹Vim le nuav mej yuav tau sau lawv le tej kws mej tau ua lug lawm, hab mej teg num yuav ua rua mej dlhuav.

³²Tej tuabneeg tsi paub qaabhau tuag tub yog vim puab tsi txais yuav lub tswvyim, hab tej tuabneeg ruag puamtsuaj tub yog vim puab tsi quavntsej kev txawj ntse.

³³Tabsis tug kws noog kuv lug, tug ntawd yuav nyob khov kho hab tso sab plhuav tsi ntshai ib yaam dlaabtsi le.”