Read Hmong Njua Paajlug 10 Bible Online

Paajlug 10 - Hmong Njua bible

Paajlug 10

¹Tej nuav yog Xalumoos tej paajlug: Tug tub kws muaj tswvyim ua rua leej txiv zoo sab heev rua nwg; tug tub kws ruag coj kev ntxhuv sab lug rua nwg nam.

²Tej nyaj txag kws koj tau lug ntawm kev tsi ncaaj nceeg, yuav tsi ua rua koj npluanuj, tabsis tej kws tau lug ntawm kev ncaaj nceeg yuav cawm tau koj txujsa.

³Tug TSWV yuav tsi ca tej tuabneeg ncaaj nceeg tshaib nqhes, tabsis nwg yuav tsi pub cov tuabneeg sab phem tau tej kws puab ntshaw.

⁴Kev tubnkeeg yuav ua rua koj pluag, tabsis kev nquag yuav ua rua koj npluanuj.

⁵Tug kws muaj tswvyim, nwg mob sab sau qoobloo rua thaus tej qoob sav, tabsis tug kws pw thaus lub caij sau qoob yuav raug kev txaajmuag.

⁶Tug tuabneeg kws sab zoo yuav tau txais koob moov. Tabsis tug tuabneeg sab phem has tej lug tsi zoo.

⁷Luas yuav ncu ntsoov tej tuabneeg sab zoo lub koob moog le, tabsis tug tuabneeg sab phem yuav tsi muaj leejtwg ncu txug.

⁸Tug tuabneeg muaj tswvyim khaws luas tej lug qhuab ntuag, tabsis tug tuabneeg ntau ncauj yuav raug puamtsuaj.

⁹Tug tuabneeg ncaaj nceeg tau zoo nyob kaaj sab lug, tabsis tug tuabneeg tsi ncaaj nceeg yuav raug luas nteg.

¹⁰Tug kws zais sab mas ua kuas muaj kev kub ntxhuv, tabsis tug kws ntuag luas taabmeeg, yuav ua kuas muaj kev sis humxeeb.

¹¹Tug tuabneeg sab zoo tej lug yog lub qhovdlej kws cawm tau txujsa, tabsis tug tuabneeg sab phem tog rawv ntxo luas xwb.

¹²Kev ntxub ua kuas muaj teebmeem, tabsis kev hlub ua rua kev cibnyeej pluj moog.

¹³Tej tuabneeg txawj ntse has tej lug kws totaub, tabsis tej tuabneeg ruag yuav raug luas nplawm.

¹⁴Tug tuabneeg muaj tswvyim khaws tej kev txawj ntse ca, tabsis thaus cov tuabneeg ruag has lug, ua rua muaj kev kub ntxhuv.

¹⁵Nyaj txag tsomkwm cov tuabneeg npluanuj; cov pluag raug kev tsimtxom hab puamtsuaj.

¹⁶Nqe zug rua tug kws ua zoo yog txujsa, tabsis tej kws tug ua phem tau, yog kev puamtsuaj.

¹⁷Tug tuabneeg kws ua tuab zoo noog thaus luas qhuab ntuag yuav tau txujsa, tabsis cov tuabneeg kws tsi leeg yuav luas tej lug ntuag yuav raug kev puamtsuaj.

¹⁸Tug tuabneeg kws zais nwg tej kev ntxub rua nruab sab yog ib tug tuabneeg dlaag. Leejtwg ua tuabneeg ntau ncauj tug ntawd yog ib tug tuabneeg ruag.

¹⁹Yog koj ua tuabneeg ntau ncauj, yuav ua rua koj has lug txhum ntau ntxiv. Yog koj ntse, koj tsi xob ua tuabneeg ntau ncauj.

²⁰Tug tuabneeg sab zoo tej lug muaj nqes le tej tseem nyaj; tug tuabneeg sab phem tej kev xaav tsi muaj qaabhau dlaabtsi.

²¹Tug tuabneeg sab zoo tej lug paab tau coob leej, tabsis tug tuabneeg ruag tuag vim nwg tsi txawj xaav.

²²Tub yog tug TSWV foom koob moov rua koj, koj txhaj muaj txag npluanuj. Tsi yog qhov kws koj naj nub khwv ua rua koj npluanuj.

²³Tug kws zoo sab ua txhum yeej yog tuabneeg ruag. Tug tuabneeg txawj ntse txaus sab rua nwg tej tswvyim.

²⁴Cov tuabneeg ncaaj nceeg tau tej kws puab xaav yuav, tabsis tej tuabneeg ua phem tej kev ntshai yuav lug raug puab.

²⁵Cua dlaaj cua dlub ntsawj cov tuabneeg kws ua phem moog povtseg, tabsis cov tuabneeg ncaaj nceeg yuav tau zoo nyob kaaj sab lug.

²⁶Tsi xob khaiv tug tuabneeg tubnkeeg moog ua ib yaam dlaabtsi rua koj. Nwg yuav zoo le cov kua qaub rua koj cov kaugnav lossis tej paa tawg kws ntshawb koj qhovmuag.

²⁷Ua lub neej fwm tug TSWV, koj txhaj yuav muaj txujsa ua neej nyob ntev. Cov tuabneeg sab phem tuag ua ntej puab lub caij nyoog.

²⁸Tej tuabneeg ncaaj nceeg txujkev ca sab coj puab moog rua qhov tau zoo, tabsis cov tuabneeg ua phem, ua neej tsaus ntuj nti tsi pum yaav tom ntej.

²⁹Tug TSWV tsomkwm tej tuabneeg ncaaj nceeg, tabsis nwg rhuav tshem tej tuabneeg kws ua txhum.

³⁰Cov tuabneeg ncaaj nceeg yuav tau nyob huv lub tebchaws, tabsis cov tuabneeg ua phem yuav raug muab ntab tawm.

³¹Cov tuabneeg ncaaj nceeg xaiv tej lug zoo has, tabsis luas yuav txwv tug nplaig kws has lug phem.

³²Cov tuabneeg ncaaj nceeg paub has tej lug kws txaus suavdlawg yuav, tabsis cov tuabneeg sab phem has tej lug kws chob luas sab xwb.