Read Hmong Njua Paajlug 11 Bible Online

Paajlug 11 - Hmong Njua bible

Paajlug 11

¹Tug TSWV ntxub cov tuabneeg kws muab raab teev ntxo lug luj rua luas, nwg txaus sab rua cov tuabneeg kws muab raab teev tsi ntxo lug luj rua luas.

²Tug tuabneeg khaavtheeb yuav poob ntsejmuag. Tabsis tug tuabneeg txawj ntse paub txu fwjchim.

³Txujkev ncaaj nceeg yuav coj tug tuabneeg ua zoo kev. Cov tuabneeg kws tsi ncaaj nceeg yuav raug kev puamtsuaj.

⁴Kev npluanuj yuav tsi muaj qaabhau rua nub kws koj tuag, tabsis kev ncaaj nceeg yuav cawm tau koj txujsa.

⁵Txujkev ncaaj nceeg ua rua tug tuabneeg sab zoo ua lub neej kaaj sab, tabsis tug tuabneeg sab phem tej kev phem yuav ua rua nwg raug kev puamtsuaj.

⁶Txujkev ncaaj nceeg paab tau tug tuabneeg sab ncaaj dlim, tabsis tug tuabneeg sab nkhaus yuav maag lub vuj hlua kws yog nwg txujkev phem.

⁷Thaus tug tuabneeg sab phem tuag, nwg txujkev ca sab taag nrug nwg. Txhua yaam kws nwg ca sab rua yuav tsi muaj qaabhau dlaabtsi.

⁸Cov tuabneeg ncaaj nceeg tau txais kev cawm dlim, cov tuabneeg sab phem yuav raug kev puamtsuaj.

⁹Tug tuabneeg tsi fwm Vaajtswv tej lug ua rua koj raug kev puamtsuaj, tabsis txujkev txawj ntse ntawm tug tuabneeg ncaaj nceeg paab tau koj dlim.

¹⁰Tej tuabneeg huv lub nroog zoo sab thaus cov tuabneeg ncaaj nceeg tau koob moov, hab puab qw zoo sab thaus cov tuabneeg sab phem tuag.

¹¹Thaus cov tuabneeg ncaaj nceeg foom koob moov; lub nroog muaj kev vaammeej; tabsis cov tuabneeg sab phem tej lug ua rua lub nroog raug kev puamtsuaj.

¹²Tug tuabneeg ruag nyam has lug thuam lwm tug. Yog koj ntse, koj tsi xob ua tuabneeg ntau ncauj.

¹³Tsi muaj leejtwg ca sab rua tug tuabneeg ntau ncauj, tabsis koj yeej tso sab tau rua tug kws koj ntseeg sab.

¹⁴Lub tebchaws yuav poob moog yog tsi muaj tug coj. Tabsis yog muaj coob tug tuavxaam yuav ua rua muaj kev tswjfwm ruaj khov.

¹⁵Yog koj tau coglug nrug lwm tug them nuj nqes, koj yuav tau ris cov nqe ntawd. Zoo dlua koj ca le muab tso tseg tsi xob koom teg nrug nwg.

¹⁶Tug quaspuj kws muaj lub sab zoo mas luas yeej fwm nwg, tabsis tug quaspuj kws sab tsi ncaaj yuav poob ntsejmuag. Tug tuabneeg tubnkeeg yeej tsi nrug luas muaj nyaj ib zag le, tabsis tug tuabneeg nquag yuav muaj txag npluanuj.

¹⁷Thaus koj ua sab dlawb sab zoo, yog koj ua zoo rua koj ntaag. Tabsis yog koj ua lub sab nruj tsiv, tej ntawd yuav rov lug raug koj xwb.

¹⁸Tug tuabneeg sab phem tsi tau tej nqe zug zoo le, tabsis yog koj ua kev ncaaj nceeg, koj yuav tau tej nqe zug kws zoo.

¹⁹Tug kws ua lub neej nyob ruaj nreeg rua txujkev ncaaj nceeg yuav muaj txujsa nyob, tabsis tug kws pheej nrhav nrhw txujkev phem yuav tuag moog.

²⁰Tug TSWV ntxub cov tuabneeg kws muaj lub sab limham, tabsis nwg hlub cov tuabneeg kws coj ncaaj nceeg.

²¹Koj yuavtsum paub has tas cov tuabneeg ua phem ua qas yuav raug txim, tabsis cov tuabneeg ncaaj nceeg yuav tsiv dlim.

²²Tug quaspuj zoo nkauj kws tsi muaj tswvyim, zoo le lub khawb kub kws muab dlai rua ntawm npua taubntswg ntaag.

²³Tej kws cov tuabneeg zoo xaav yuav, yeej ibtxwm xaus rua yaam zoo, thaus cov tuabneeg sab phem tau yaam kws puab ntshaw, tsuas yog kev npautawg.

²⁴Muaj qee leej siv puab tej nyaj txag lawm laub lug, puab tseem muaj txag npluanuj. Tabsis muaj ibtxha mas cuamkhum kawg los puab pluag kawg le.

²⁵Ua tuabneeg sab dlawb sab zoo, koj lub neej txhaj yuav vaammeej. Paab lwm tug, luas txhaj yuav paab koj.

²⁶Tej tuabneeg tsawm foom tug kws sau qoob lug tseg ca tog muag kuas tau nqe ntau, tabsis luas qhuas tug kws muag pheej yig.

²⁷Tug tuabneeg kws nrhav yaam zoo, yuav tau txais yaam zoo, tabsis tug tuabneeg kws nrhav yaam phem, yuav tau txais yaam phem.

²⁸Cov tuabneeg kws puab tso sab rua puab txujkev npluanuj, yuav poob ib yaam le tej nplooj thaus lub caij nplooj ntoos zeeg, tabsis cov tuabneeg ncaaj nceeg yuav vaammeej ib yaam le tej nplooj thaus lub caij nplooj ntoos hlaav.

²⁹Tug tuabneeg kws pheej tsim teebmeem rua nwg tsev tuabneeg, thaus kawg nwg yuav tsi muaj ib yaam dlaabtsi le. Cov tuabneeg ruag yuav tau ua cov tuabneeg txawj ntse qhev moog le.

³⁰Kev ncaaj nceeg pub txujsa, tabsis kev nruj tsiv rhu txujsa moog.

³¹Cov tuabneeg zoo yeej tau txais nqe zug huv nplajteb nuav, koj yuavtsum paub has tas cov tuabneeg ua phem hab cov tuabneeg txhum yuav raug txim.