Read Hmong Njua Paajlug 12 Bible Online

Paajlug 12 - Hmong Njua bible

Paajlug 12

¹Tug tuabneeg kws nyam kev txawj ntse, nwg xaav kuas luas qha nwg thaus nwg ua txhum. Tug tuabneeg kws tsi nyam kev qhuab ntuag, nwg yog tuabneeg ruag.

²Tug TSWV txaus sab rua cov tuabneeg ua zoo, tabsis nwg rau txim rua cov tuabneeg kws nyam ua phem ua qas.

³Cov tuabneeg ua phem yeej nyob tsi muaj chaw, tabsis cov tuabneeg ncaaj nceeg nyob ruaj khov kho.

⁴Tug quaspuj tsimtxaj yog lub mom yeebkoob rua nwg tug quasyawg ntoo, tabsis tug quaspuj kws coj kev txaajmuag lug rua nwg tug quasyawg, zoo nkaus le cov kua paug kws nyob huv tug quasyawg cov pobtxhaa.

⁵Cov tuabneeg ncaaj nceeg yeej ua ncaaj nceeg rua koj. Tabsis Cov tuabneeg sab phem xaav dlaag ntxag koj xwb.

⁶Cov tuabneeg sab phem tej lug tua tuabneeg tuag, tabsis cov tuabneeg ncaaj nceeg tej lug paab tau lwm tug kws raug kev txomnyem nyuaj sab dlim.

⁷Cov tuabneeg sab phem qaug hab puamtsuaj moog, puab yuav tsi muaj xeebntxwv tseg le, tabsis cov tuabneeg ncaaj nceeg tej xeebntxwv yuav nyob ruaj khov.

⁸Yog koj txawj ntse, luas yuav qhuas koj. Yog koj ruag, tuabneeg yuav saib tsi taug koj.

⁹Tug tuabneeg kws luas saib tsi tseemceeb dlaabtsi, tabsis nwg muaj tubkhai, zoo dlua tug tuabneeg khaavtheeb kws tsi muaj noj tsi muaj haus.

¹⁰Tug tuabneeg sab zoo yeej tu nwg tej tsaj txhu zoo, tabsis cov tuabneeg sab phem yeej tsimtxom puab tej tsaj txhu.

¹¹Tug tuabneeg nquag ua laj ua teb, muaj noj nplua mag, tabsis tug tuabneeg ruag muab nwg lub sijhawm siv tsi muaj nqes.

¹²Txhua yaam kws cov tuabneeg sab phem xaav tau, yog nrhav kev ua phem ua qas xwb, tabsis tug tuabneeg ncaaj nceeg nyob ruaj khov.

¹³Tug tuabneeg sab phem tej lug rov ua lub vuj hlua soo nwg, tabsis tug tuabneeg ncaaj nceeg yuav tsiv dlim ntawm tej teebmeem.

¹⁴Koj yuav tau txais nqe zug lawv le tej lug kws koj has hab tej num kws koj ua. Koj yuav tau txais lawv le koj tau ua lug lawm.

¹⁵Cov tuabneeg ruag xaav has tas, puab yog tug kws has yog xwb. Tabsis cov tuabneeg kws noog luas tej lug qhuab ntuag, yog tuabneeg txawj ntse.

¹⁶Thaus tug tuabneeg ruag chim, nwg ua rua luas paub taamsim ntawd ntaag. Tug tuabneeg ntse nyaj taug tej kws luas ua saib tsi taug nwg.

¹⁷Tug tuabneeg ncaaj nceeg ua timkhawv tseeb, tabsis tug tuabneeg dlaag ua timkhawv tsi ncaaj.

¹⁸Tej lug tsi zoo chob luas sab ib yaam le raab ntaaj, tabsis lu lug zoo nplig tau luas lub sab.

¹⁹Tug tuabneeg kws has lug dlaag yuav ua neej nyob tsi ntev, tabsis tug tuabneeg kws has lug tseeb yuav muaj sa nyob ntev.

²⁰Cov tuabneeg kws tuavhuv ua kev phem, puab yog tuabneeg dlaag ntxag, tabsis cov tuabneeg ua zoo yuav tau kev kaaj sab lug.

²¹Tsi muaj kev phem lug raug cov tuabneeg ncaaj nceeg, tabsis cov tuabneeg sab phem yuav raug kev txomnyem.

²²Tug TSWV ntxub cov tuabneeg has lug dlaag, tabsis nwg txaus sab rua cov tuabneeg kws has lug tseeb.

²³Cov tuabneeg txawj ntse muab tej kws puab paub khaws ca rua nruab sab, tabsis cov tuabneeg ruag muab txujkev ruag qha rua suavdlawg paub.

²⁴Kev nquag yuav ua rua koj muaj fwjchim; kev tubnkeeg yuav ua rua koj moog ua luas qhev.

²⁵Kev txhawjxeeb ua rua koj kev zoo sab pluj moog, tabsis tej lug zoo yuav txhawb tau koj tug zug.

²⁶Tug tuabneeg ncaaj nceeg coj nwg tug phoojywg moog rua txujkev zoo, tabsis tug tuabneeg sab phem coj moog rua txujkev puamtsuaj.

²⁷Yog koj ua tuabneeg tubnkeeg, koj yuav tsi tau dlaabtsi, tabsis yog koj nquag ua num, koj yuav tau txais koob moov.

²⁸Kev ncaaj nceeg yog txujkev kws tau txujsa; kev ua phem yog txujkev tuag.