Read Hmong Njua Paajlug 13 Bible Online

Paajlug 13 - Hmong Njua bible

Paajlug 13

¹Tug tub kws txawj ntse noog thaus nwg txiv qhuab ntuag nwg, tabsis tug kws muab hlub yeej tsi kaam leeg nwg tej kev txhum.

²Tug tuabneeg sab zoo yuav tau nqe zug, vim tej lug kws nwg has, tabsis cov tuabneeg dlaag ntxag nrhav nrhw ua kev phem.

³Tug tuabneeg kws tswj tau nwg lub qhovncauj, yuav ceev tau nwg txujsa. Tug tuabneeg ntau ncauj yuav raug kev puamtsuaj.

⁴Tug tuabneeg tubnkeeg, ntshaw npaum le caag los nwg yeej tsi tau tej ntawd ib zag le. Tug tuabneeg nquag yuav tau txhua yaam lawv le nwg lub sab xaav.

⁵Cov tuabneeg ncaaj nceeg ntxub txujkev dlaag, tabsis cov tuabneeg sab phem yuav txaajmuag hab poob ntsejmuag.

⁶Kev ncaaj nceeg tsomkwm tug tuabneeg kws tsi muaj txim txhum; kev txhum ua rua tug tuabneeg ua phem raug puamtsuaj.

⁷Muaj ibtxha ua le yog tuabneeg npluanuj, tabsis puab tsi muaj dlaabtsi le. Muaj ibtxha ua le puab yog tuabneeg pluag, tabsis puab yog tuabneeg muaj txag npluanuj.

⁸Tug tuabneeg npluanuj siv nyaj txag lug cawm nwg txujsa, tabsis tsi muaj leejtwg ua phem rua tug tuabneeg pluag.

⁹Cov tuabneeg ncaaj nceeg zoo le lub teeb ci pum kev laam lug, cov tuabneeg sab phem zoo le lub teeb kws tub muab tshuab tuag lawm.

¹⁰Tug tuabneeg muab hlub tsuas tsim kuas muaj kev kub ntxhuv. Tug tuabneeg kws thov luas paab tswvyim txhaj yog tuabneeg ntse.

¹¹Tej nyaj kws mej tau lug yoojyim, yuav nyob tsi ntev. Tabsis tej nyaj kws mej siv dlaag zug khwv tau lug yuav nyob ruaj.

¹²Thaus koj taag kev ca sab, mob koj sab kawg le, tabsis thaus tau kag lawm, ua rua koj zoo sab kawg.

¹³Yog koj tsi kaam yuav luas tej lug ntuag, ces koj yuav raug teebmeem. Coj lawv le tej lug qha, koj txhaj ua neej kaaj sab.

¹⁴Cov tuabneeg txawj ntse tej lug qhuab qha yog lub qhovdlej cawm txujsa; tej lug ntawd yuav paab koj thaus koj raug kev txhawjxeeb.

¹⁵Luas yuav fwm tug tuabneeg txawj ntse, tabsis cov tuabneeg kws luas tsi ca sab rua, taabtom taug txujkev puamtsuaj.

¹⁶Cov tuabneeg txawj ntse yuav ua yaam twg, puab xub xaav ua ntej maam le ua, tabsis cov tuabneeg ruag, ca le khaav puab tej kev ruag rua suavdlawg noog.

¹⁷Tug tuabneeg xaa xuv tsi ncaaj, tsim kuas muaj kev kub ntxhuv, tabsis tug kws xaa xuv ncaaj yuav ua rua suavdlawg kaaj sab lug.

¹⁸Tug kws tsi kaam kawm txawj kawm ntse yuav pluag hab txaajmuag. Tug kws khaws luas tej lug ntuag ca rua nruab sab, luas yuav fwm.

¹⁹Yog yug tau yaam kws yug xaav yuav, mas zoo yug sab heev! Cov tuabneeg ruag tsi kaam tso puab txujkev phem kev qas tseg le.

²⁰Yog koj nrug cov tuabneeg txawj ntse ua ke, koj txhaj yuav txawj ntse. Yog koj ua phoojywg nrug cov tuabneeg ruag, koj yuav raug kev puamtsuaj.

²¹Teebmeem lawv cov tuabneeg txhum qaab rua txhua txujkev, tabsis cov tuabneeg ncaaj nceeg yuav tau tej nqe zug zoo.

²²Tug tuabneeg sab zoo, nwg yuav muaj nyaj txag tseg rua nwg tej xeebntxwv, tabsis cov tuabneeg txhum tej nyaj txag yuav muab tseg ca rua cov tuabneeg ncaaj nceeg yuav.

²³Tug tuabneeg pluag ua tau qoobloo ntau huv nwg dlaim teb, tabsis cov tuabneeg tsi ncaaj tuaj txeeb taag lawm.

²⁴Yog koj tsi qhuab qha koj tug tub, ces yog koj tsi hlub nwg. Yog koj hlub nwg, koj yeej yuav ntuag nwg.

²⁵Cov tuabneeg ncaaj nceeg muaj noj nplua mag, tabsis cov tuabneeg sab phem tau kev tshaib nqhes moog le.