Read Hmong Njua Paajlug 14 Bible Online

Paajlug 14 - Hmong Njua bible

Paajlug 14

¹Cov quaspuj kws muaj tswvyim tuav tau puab lub cuab lub yig nyob ruaj ntseg, tabsis cov quaspuj ruag muab puab lub cuab lub yig rhuav povtseg.

²Tug tuabneeg ncaaj nceeg yeej paub ntshai tug TSWV. Tabsis tug tuabneeg tsi ncaaj nceeg, nwg tuam mom tug TSWV.

³Tug tuabneeg ruag yeej khaavtheeb hab ntau ncauj, tabsis tug tuabneeg txawj ntse tej lug yuav tiv thaiv nwg.

⁴Yog tsi muaj nyuj laij teb koj yuav tsi tau qoobloo, tabsis yog muaj nyuj laij teb, koj yuav tau qoobloo puv txhaab.

⁵Tug tuabneeg kws ua timkhawv tseeb, nwg yeej tsi dlaag; tabsis tug tuabneeg kws ua timkhawv tsi tseeb, nwg yeej has lug dlaag.

⁶Cov tuabneeg khaavtheeb yeej nrhav tsi tau kev txawj ntse le, tabsis cov tuabneeg ntse kawm tau yoojyim heev.

⁷Txaav kuas dleb ntawm cov tuabneeg ruag; puab yeej tsi muaj ib yaam dlaabtsi qha rua koj le.

⁸Vim le caag tug tuabneeg ntse txhaj ntse? Rua qhov nwg paub yaam kws nwg yuav ua. Vim le caag tug tuabneeg ruag txhaj le ruag? Rua qhov nwg xaav has tas nwg paub lawm.

⁹Cov tuabneeg ruag ua txhum los puab yeej tsi quavntsej; tabsis cov tuabneeg ua zoo txawj thov kuas Vaajtswv zaam txim.

¹⁰Koj tej kev zoo sab los yog koj le, koj tej kev ab sab los yeej yog koj le. Tsi muaj leejtwg nrug koj muaj feem.

¹¹Tug tuabneeg sab phem lub tsev raug puamtsuaj, tabsis tug tuabneeg ncaaj nceeg lub tsev yuav nyob ruaj nreeg ca.

¹²Muaj ib txujkev kws tuabneeg xaav has tas yog txuj zoo, tabsis txuj ntawd coj moog raug kev pluj kev tuag.

¹³Lub ncauj luag tabsis lub sab quaj ntsuag, thaus kev zoo sab dlhau lawm, kev nyuaj sab tseem nyob le qub.

¹⁴Cov tuabneeg sab phem yuav tau txais tej kws puab tau ua lawm. Cov tuabneeg sab zoo yuav tau txais tej nqe zug zoo kws puab ua.

¹⁵Tug tuabneeg ruag ntseeg txhua yaam. Tabsis cov tuabneeg ntse ua tuab zoo xaav puab maam le ua.

¹⁶Cov tuabneeg muaj tswvyim fwm tug TSWV hab txaav dleb ntawm tej kev phem, tabsis cov tuabneeg ruag tsi paub ceevfaaj, puab laam tau laam ua.

¹⁷Cov tuabneeg kws chim sai, mas ua tej yaam kws ruag kawg nkaus le; cov tuabneeg ntse ua taug sab ntev.

¹⁸Cov tuabneeg ruag tau sau tej kev ruag kws puab ua, tabsis cov tuabneeg ntse tau txais lub koob meej zoo.

¹⁹Cov tuabneeg ua phem yuav txhus caug pe cov tuabneeg ncaaj nceeg, hab cov tuabneeg sab phem yuav sawv ntawm roojvaag hawm cov tuabneeg ncaaj nceeg.

²⁰Tug tuabneeg pluag yeej tsi muaj leejtwg nyam, txawm yog tej tuabneeg zej zog los yeej tsi nyam nwg; tabsis tug npluanuj muaj phoojywg coob.

²¹Yog koj xaav tau kev zoo sab, ca le ua sab dlawb paug rua tug pluag; yog koj txobthuam lwm tug ces yog koj ua txhum.

²²Yog koj ua qhov zoo, luas yuav ca sab hab fwm koj; yog koj tuav tswvyim ua phem, ces yog koj ua txhum lawm.

²³Ua tuabneeg nquag koj lub neej txhaj le muaj nplua mag. Yog koj nyob thaam ntau, koj yuav ua tuabneeg pluag.

²⁴Kev txawj ntse yog lub mom yeebkoob rua cov tuabneeg txawj ntse, tabsis kev ruag yog txuj saw rua cov tuabneeg ruag.

²⁵Tug kws ua timkhawv tseeb cawm tau suavdlawg txujsa; tabsis tug kws ua timkhawv tsi tseeb, yog nwg ntxeev sab rua lwm tug.

²⁶Fwm tug TSWV koj txhaj muaj chaw ca sab, hab koj cov xeebntxwv txhaj tau chaw vaamkhom.

²⁷Koj puas xaav zaam kuas dlhau txujkev tuag? Kev fwm tug TSWV yog lub qhovdlej cawm txujsa.

²⁸Tug vaajntxwv kws muaj pejxeem coob, nwg yeej muaj fwjchim luj dlua. Yog tsi muaj cov pejxeem ntawd, nwg yeej tsi muaj fwjchim dlaabtsi le.

²⁹Yog koj ua tau sab ntev, koj txhaj yog tug tuabneeg txawj ntse, tabsis yog koj ua tug tuabneeg chim sai, ces qha has tas koj yog tuabneeg ruag.

³⁰Lub sab kws kaaj nrig ua rua lub cev tsi muaj mob, tabsis kev khib zoo le lub mob.

³¹Yog koj caij tsuj cov tuabneeg pluag, ces yog koj saib tsi taug Vaajtswv tug kws tsim puab. Tabsis kev ua sab dlawb paug rua cov pluag yog kev qhuas Vaajtswv.

³²Cov tuabneeg sab phem tej kev ua phem ua qas yuav coj kev puamtsuaj lug raug puab; tabsis cov tuabneeg sab zoo tej kev ncaaj nceeg yuav tiv thaiv puab.

³³Lub tswvyim nyob huv tug tuabneeg txawj ntse; tabsis tug ruag paub tsi txug lub tswvyim hlo le.

³⁴Kev ncaaj nceeg ua rua lub tebchaws vaammeej, kev txhum ua rua lub tebchaws raug txaajmuag.

³⁵Vaajntxwv txaus sab rua cov numtswv kws txawj ntse, tabsis nwg rau txim rua cov kws ua rua lub tebchaws raug txaajmuag.