Read Hmong Njua Paajlug 15 Bible Online

Paajlug 15 - Hmong Njua bible

Paajlug 15

¹Lu lug mog lug muas ua rua kev chim pluj moog, tabsis lu lug nruj tsiv ua rua kev chim tawm tuaj.

²Thaus cov tuabneeg txawj ntse has lug, puab has tej lug ntse ntsuav, tabsis cov tuabneeg ruag has lug tsi muaj hauvpaug hauvntsis.

³Tug TSWV pum txhua yaam xwmtxheej kws muaj nyob txhua qhov, nwg saib ntsoov peb, thaus peb ua zoo lossis thaus peb ua phem.

⁴Tug nplaig kws has lug zoo yog tsob tshuaj kws cawm txujsa; tabsis tug nplaig kws has lug phem ua rua luas ntsawv sab.

⁵Tug tuabneeg ruag yeej tsi quavntsej leej txiv tej lug qha, tug tuabneeg ntse yeej khaws leej txiv tej lug ntuag.

⁶Tej tuabneeg ncaaj nceeg txuag tau puab tej nyaj txag, tabsis tej tuabneeg sab phem tej nyaj txag yuav pluj moog taag thaus puab ntsib kev txomnyem.

⁷Kev txawj ntse yog lug ntawm cov tuabneeg muaj tswvyim, tsi yog lug ntawm cov tuabneeg ruag.

⁸Tug TSWV txaus sab rua cov tuabneeg sab zoo tej lug thov, tabsis nwg ntxub tej khoom fij kws cov tuabneeg sab phem coj tuaj fij.

⁹Tug TSWV ntxub tej num kws cov tuabneeg sab phem ua, tabsis nwg txaus sab rua cov tuabneeg kws ua ncaaj nceeg.

¹⁰Yog koj ua txhum, koj yuav raug txim nyaav. Yog koj tsi ca luas ntuag koj, koj yuav tuag.

¹¹Txawm yog tubtuag teb los yeej txwv tsi tau tsi pub tug TSWV paub has tas, huv muaj dlaabtsi le. Yog le ntawd tuabneeg yuav ua le caag zais tau nwg tej lug xaav tsi pub Vaajtswv paub?

¹²Cov tuabneeg kws thuam lwm tug tsi nyam kuas luas ntuag; puab yeej tsi thov kuas cov tuabneeg txawj ntse qhuab ntuag puab.

¹³Thaus tuabneeg zoo sab, puab lub ntsejmuag luag ntxhi, tabsis thaus puab ntxhuv sab, puab lub ntsejmuag mluag mlob.

¹⁴Cov tuabneeg txawj ntse xaav kawm txujci ntxiv, tabsis cov tuabneeg ruag tsi quavntsej kawm dlaabtsi le.

¹⁵Tug tuabneeg pluag ua neej tiv kev txomnyem ntsuav, tabsis tug tuabneeg kws muaj noj muaj haus naj nub muaj kev zoo sab.

¹⁶Ua tuabneeg pluag es paub ntshai tug TSWV zoo dlua le ua tuabneeg npluanuj, tabsis muaj teebmeem.

¹⁷Noj zaub tsuag nyob nrug kev sib hlub zoo dlua le noj nqaj nyob nrug kev sib ntxub.

¹⁸Tej lug phem ua rua muaj kev sis caav sis tshe, tabsis ua sab ntev muaj kev sis humxeeb.

¹⁹Tug tuabneeg tubnkeeg txuj hauv kev tuaj xuavpaug faab nyo, tabsis tug tuabneeg sab ncaaj txuj hauv kev dlaav fo.

²⁰Tug tub txawj ntse ua rua nwg txiv zoo sab heev. Tsuas yog tug ruag txhaj saib tsi taug nwg nam xwb.

²¹Cov tuabneeg ruag zoo sab heev rua puab tej kev ruag, tabsis cov tuabneeg ntse ua dlaabtsi los yog qhov tseeb.

²²Khaws luas tej tswvyim kuas zoo, koj txhaj yuav vaammeej. Yog tsi tau tswvyim paab, koj ua num tsi tav.

²³Lu lug teb zoo, ua rua luas zoo sab, lub sijhawm kws yug has tau lu lug zoo, ua rua yug kaaj sab.

²⁴Txujkev kws cov tuabneeg txawj ntse taug, coj moog tau txujsa, tsi yog coj moog rua huv tubtuag teb.

²⁵Tug TSWV yuav rhuav tshem cov tuabneeg muab hlub tej vaaj tse, tabsis nwg yuav tsomkwm cov puj ntsuag tej teej tug.

²⁶Tug TSWV ntxub lub sab kws xaav phem, tabsis nwg txaus sab rua tej lug mog lug muas.

²⁷Tej paajlaum kws tau lug ntawm kev tsi ncaaj nceeg, yuav ua rua koj tsev tuabneeg tau kev kub ntxhuv. Tsi xob yuav tej nyaj kws luas coj tuaj xab, koj txhaj muaj sa nyob ntev.

²⁸Cov tuabneeg sab zoo ua tuab zoo xaav ua ntej nwg teb luas. Cov tuabneeg sab phem maaj nrooj teb luas, tabsis ua kuas muaj teebmeem xwb.

²⁹Thaus cov tuabneeg ncaaj nceeg thov, tug TSWV yeej noog, tabsis nwg tsi quavntsej cov tuabneeg txhum tej lug thov.

³⁰Ntsejmuag luag ntxhi ua rua koj zoo sab, hab nov xuv zoo ua rua koj kaaj sab lug.

³¹Yog koj ua tuab zoo noog thaus luas ntuag koj, koj txhaj yog tug ntse.

³²Yog koj tsi kawm, ces yog koj rhuav koj xwb. Yog koj khaws luas tej lug qhuab ntuag, koj txhaj yuav txawj ntse.

³³Fwm tug TSWV yog kev kawm txawj kawm ntse ntaag. Koj yuavtsum txu fwjchim luas txhaj fwm koj.