Read Hmong Njua Paajlug 16 Bible Online

Paajlug 16 - Hmong Njua bible

Paajlug 16

¹Peb yog cov kws npaaj sab, tabsis thaus kawg Vaajtswv yog tug ua kuas tav.

²Koj xaav has tas txhua yaam kws koj ua puavleej yog, tabsis tug TSWV paub tej kws koj ua.

³Tso koj teg num rua tug TSWV ua tug coj, koj txhaj yuav ua tau teg num ntawd tav.

⁴Txhua yaam kws tug TSWV tsim, nyag yeej muaj nyag txujmoo; cov tuabneeg sab phem txujmoo yog kev puamtsuaj.

⁵Tug TSWV ntxub txhua tug kws khaavtheeb, nwg yuav tsi pub puab tsiv dlim txujkev txav txim le.

⁶Ca le ua zoo hab ua ncaaj nceeg, Vaajtswv txhaj yuav zaam koj lub txim. Yuavtsum fwm tug TSWV koj txhaj dlim ntawm txujkev phem.

⁷Thaus tug TSWV txaus sab rua mej lawm, nwg yuav ua kuas mej tej yeebncuab nrug mej sis raug zoo.

⁸Ua ncaaj nceeg tau tsawg, zoo dlua le ua tsi ncaaj tau ntau.

⁹Koj yog tug npaaj sab ua, tabsis Vaajtswv yog tug coj txuj hauv kev.

¹⁰Vaajtswv pub fwjchim rua vaajntxwv; nwg txhaj paub txav txim ncaaj nceeg.

¹¹Tug TSWV xaav kuas muab raab teev tsi ntxo hab lub kawm kws txwm lug luj, hab txhua yaam kws mej muag, mej yuavtsum ua ncaaj.

¹²Tej vaajntxwv tsi tsimnyog ua kev phem kev qas, rua qhov lub zwmtxwv yog qhov chaw ncaaj nceeg.

¹³Vaajntxwv xaav nov tej lug tseeb hab txaus sab rua cov tuabneeg kws has tej lug tseeb ntawd.

¹⁴Tug tuabneeg muaj tswvyim nrhav kev ua rua vaajntxwv zoo sab. Thaus vaajntxwv chim lawm, muaj qee leej yuav tuag.

¹⁵Thaus vaajntxwv ua lub ntsejmuag luag ntxhi, ua rua suavdlawg muaj txujsa; nwg txujkev zoo sab zoo le tauv fuab kws coj kob naag tshab lug.

¹⁶Tau tswvyim hab kev txawj ntse, zoo dlua le tau nyaj hab kub.

¹⁷Txujkev kws cov tuabneeg ncaaj nceeg taug yog txuj kws zaam tej kev phem kev qas. Ua tuab zoo saib txujkev kws koj yuav moog ntawd, txhaj yuav txuag tau koj txujsa.

¹⁸Kev khaavtheeb coj moog rua txujkev puamtsuaj, hab kev muab hlub yuav poob ntsejmuag.

¹⁹Ua tuabneeg txomnyem hab txu fwjchim zoo dlua le ua tuabneeg nruj tsiv hab moog nrug cov tuabneeg tubsaab sis faib khoom.

²⁰Khaws tej lug qhuab ntuag nuav ca, koj lub neej txhaj yuav vaammeej. Ca sab rua tug TSWV koj txhaj yuav kaaj sab lug.

²¹Tug tuabneeg txawj ntse yog tug kws thoob tsib to nrog. Nwg tej lug mog lug muas ua rua coob leej ntau tug fwm hab txaus sab.

²²Tswvyim yog lub qhovdlej cawm txujsa rua tug tuabneeg txawj ntse, tabsis kev ruag yuav rau txim rua cov tuabneeg ruag.

²³Cov tuabneeg txawj ntse xub xaav ua ntej maam le has, puab has yaam twg yeej txaus luas yuav.

²⁴Tej lug mog lug muas qaab zib le zib ntaab, hab zoo le hauv tshuaj kuab muaj tsuas rua koj lub cev.

²⁵Muaj ib txujkev kws tuabneeg xaav has tas yog txuj zoo, tabsis txuj ntawd coj moog raug kev pluj kev tuag.

²⁶Tuabneeg pheej khwv vim yog lub ncauj yuav noj; tuabneeg ua num nyaav rua qhov xaav kuas lub plaab tsau.

²⁷Cov tuabneeg sab phem nrhav kev ua phem rua lwm tug, tej lug kws puab has los mob luas cuag suavtawg kub.

²⁸Cov tuabneeg sab phem nyam taug xaiv, puab tsim kev kub ntxhuv hab ua kuas tej phoojywg tawg paab tawg pawg.

²⁹Cov tuabneeg limham ntxag puab tej phoojywg hab coj moog raug txujkev puamtsuaj.

³⁰Txaav dleb ntawm cov tuabneeg kws pheej ntxhi hab rov kaum muag saib koj, puab yeej xaav ua tej yaam phem lawm ntaag.

³¹Ua neej nyob ntev yog nqe zug ntawm txujkev ncaaj nceeg. Ua neej nyob laug plaubhau dlawb yog lub mom yeebkoob.

³²Ua tau sab ntev zoo dlua le muaj zug. Koj tswj tau koj lub sab, zoo dlua le koj ntaus yeej ib lub nroog.

³³Tuabneeg rhu ntawv xaav paub saib muaj xwm dlaabtsi tshwmsim, tabsis Vaajtswv yog tug txav txim sab.