Read Hmong Njua Paajlug 18 Bible Online

Paajlug 18 - Hmong Njua bible

Paajlug 18

¹Cov tuabneeg kws nrug tsi tau luas ua phoojywg, puab tsuas pum puab zoo xwb, puab tsi pum tej kws suavdlawg pum has tas yog qhov zoo.

²Tug tuabneeg ruag tsi quavntsej kev txawj ntse hlo le, tabsis nwg khaav has tas nwg yog tug muaj tswvyim.

³Kev txhum hab kev txaajmuag moog ua ke. Yog koj poob ntsejmuag, ces koj raug thuam.

⁴Tug tuabneeg muaj tswvyim tej lug tub ib yaam le havtxwv, hab zoo le tug dlej cag kws ndlwg ntshab si.

⁵Tsi tsimnyog tsaa tug tuabneeg ua txhum txuj cai, hab tsi tsimnyog rau txim rua tug tuabneeg ncaaj nceeg.

⁶Tug tuabneeg ruag ua rua muaj kev sis caav sis tshe, hab nwg twv ntxhas qhov ntaus.

⁷Tug tuabneeg ruag tej lug, rov ua rua nwg raug kev puamtsuaj; nwg tej lug rov ua lub vuj hlua khi nwg.

⁸Tej lug kws has luas plig zoo has kawg le, suavdlawg txhaj nyam has ua luaj!

⁹Tug tuabneeg tubnkeeg zoo ib yaam le tug tuabneeg kws ua kuas muaj kev puamtsuaj.

¹⁰Tug TSWV zoo le lub chaw faajxwm kws ruaj khov heev hab yog qhov chaw cawm sav kws cov tuabneeg ncaaj nceeg moog vaamkhom.

¹¹Cov tuabneeg npluanuj xaav has tas puab tej nyaj txag tiv thaiv tau puab ib yaam le tug ntsaa yeej kws sab hab ruaj khov thaiv puagncig lub nroog.

¹²Tug kws tsi txu fwjchim, yuav tsi muaj leejtwg fwm nwg. Cov tuabneeg kws khaavtheeb yuav raug kev puamtsuaj.

¹³Ua tuab zoo noog ua ntej tsaiv koj maam teb. Yog koj tsi ua tuab zoo noog, ces koj yog tug tuabneeg ruag hab raug luas thuam ntaag.

¹⁴Ua neej nyob koj nyaj taug kev mob, tabsis tsi muaj leejtwg tiv taug txujkev nyuaj sab.

¹⁵Cov tuabneeg ntse nrhav kev txawj ntse hab muab sab rau kawm.

¹⁶Yog koj xaav moog cuag ib tug tuabneeg tseemceeb, ca le nqaa khoom moog pub rua nwg, ces koj yuav moog cuag tau nwg.

¹⁷Tug yeejkom kws xub peev lug huv tsev tu plaub, zoo le nwg muaj cai, tabsis ca txug thaus tug pemkom peev lug taag tsaiv.

¹⁸Yog muaj ob tug tuabneeg kws muaj cai sis luag sim kom moog rua huv tsev tu plaub, yuav tau rhu ntawv kuas muaj tug yeej tug swb.

¹⁹Paab koj tug kwvtij, nwg txhaj yuav tiv thaiv koj ib yaam le tug ntsaa yeej kws thaiv lub nroog, tabsis yog koj nrug nwg sis tshe, nwg yuav kaw qhovrooj tsi pub koj moog huv nwg tsev.

²⁰Koj yuav tau txais lawv le tej lug kws koj tau has lawm.

²¹Tej lug kws koj has cawm tau txujsa lossis txuv txujsa. Yog le ntawd, koj yuav tau sau lawv le tej lug kws koj has.

²²Tug kws yuav tau quaspuj ces yog tau yaam kws zoo, hab tau txais koob moov zoo lug ntawm Vaajtswv.

²³Tug tuabneeg txomnyem has tej lug kws zoo xwb, tabsis tug tuabneeg npluanuj teb nyaum kawg le.

²⁴Muaj ibtxha phoojywg kaav tsi ntev, tabsis qee leej phoojywg tseem sis raug zoo dlua tej kwvtij txheeb.