Read Hmong Njua Paajlug 19 Bible Online

Paajlug 19 - Hmong Njua bible

Paajlug 19

¹Tug tuabneeg txomnyem, tabsis muaj kev ncaaj nceeg, zoo dlua le ua tug tuabneeg ruag kws pheej has lug dlaag.

²Tug tuabneeg sab kub, tabsis tsi muaj kev txawj ntse, tsi zoo dlaabtsi. Tug kws tsi ua sab ntev yuav ua rua nwg raug teebmeem.

³Muaj ibtxha raug kev puamtsuaj vim puab teg num ruag hab puab lam txim rua tug TSWV.

⁴Cov tuabneeg npluanuj muaj phoojywg coob zuj zug, tabsis cov tuabneeg txomnyem tej phoojywg tso puab tseg.

⁵Tug kws ua timkhawv tsi tseeb huv tsev tu plaub, nwg yuav raug txim hab tsiv tsi dlim le.

⁶Txhua tug nyam tug tuabneeg sab dlawb sab zoo; hab txhua tug xaav ua phoojywg rua tug tuabneeg kws muab khoom pub dlawb tau rua lwm tug.

⁷Txawm yog tug tuabneeg txomnyem tej kwvtij kag los tub tsi nyam nwg, yog le ntawd nwg txhaj tsi muaj phoojywg! Txawm yog nwg xaav nrug luas ua phoojywg los luas tsi kaam le.

⁸Ca le txaus sab rua koj hab rau sab kawm kev txawj ntse, hab cim ntsoov tej kws koj tau kawm lawm ca rua nruab sab koj lub neej txhaj yuav vaammeej.

⁹Tug kws ua timkhawv tsi tseeb huv tsev tu plaub yeej yuav raug txim, hab tug kws has lug dlaag yuav raug puamtsuaj.

¹⁰Cov tuabneeg ruag tsi tsimnyog nyob tej vaaj tse zoo, hab tej tubqhe tsi tsimnyog kaav tej numtswv.

¹¹Yog koj txawj xaav, koj yuavtsum tswj kuas tau koj txujkev chim. Txawm yog luas ua tsi yog rua koj los puamchawj, koj ua le ntawd zoo tshaaj.

¹²Vaajntxwv txujkev chim zoo le tug tsuv ntxhuav nyooj, tabsis qhov kws nwg txaus sab zoo le kob naag rua tej nroj tsuag.

¹³Tug tub kws ruag yuav ua rua nwg txiv raug kev puamtsuaj. Tug quaspuj kws ywg taug zoo le lub tsev kws xaw naag.

¹⁴Vaaj tse hab nyaj txag yog nam hab txiv tseg ua qubtxeeg qubteg rua tug tub, tabsis tug quaspuj kws paub taab yog tug TSWV muab rua nwg xwb.

¹⁵Ua tuabneeg tubnkeeg tau zoo pw, tabsis yuav tsi muaj noj tsi muaj haus.

¹⁶Fwm tug TSWV txuj kevcai koj txhaj yuav muaj sa ua neej nyob ntev. Yog koj tsi quavntsej Vaajtswv tej kevcai koj yuav raug kev pluj kev tuag.

¹⁷Thaus koj muab rua tug pluag, yog koj qev rua tug TSWV ntaag, tug TSWV yuav them rov rua koj.

¹⁸Cob qha koj tej mivnyuas thaus puab tseem yau, puab txhaj kawm tau. Yog koj tsi qhuab qha puab, ces yog koj nrug puab rhuav puab lub neej.

¹⁹Yog leejtwg pheej npautawg sai, ca nwg ris nwg lub txim ntawd. Yog koj paab nwg ib zag lawm, lwm zag koj yuav rov tau paab nwg dlua hab.

²⁰Yog koj khaws luas tej lug qhuab ntuag, hab muab sab rau kawm, muaj ib nub koj yuav txawj ntse.

²¹Tuabneeg xaav ntau yaam huv lub sab yuav ua, tabsis yuav yog hum tug TSWV sab txhaj ua tau.

²²Ua tuabneeg sab hlub, ces poob ntsejmuag; ua tuabneeg txomnyem zoo dlua ua tuabneeg dlaag.

²³Koj yuavtsum fwm tug TSWV koj txhaj muaj sa ua neej nyob ntev, muaj kev txaus sab hab tsi raug xwm phem dlaabtsi.

²⁴Tug tuabneeg tubnkeeg cev dlav moog has mov huv lub taig los tub ceeblaaj nqaa lug rua ntawm qhovncauj.

²⁵Qhov kws rau txim rua tug tuabneeg kws thuam lwm tug ntawd, yuav ua rua tug tuabneeg kws tsi paub kawm tau kev txawj ntse. Yog koj txawj ntse, thaus luas qhuab ntuag koj, koj yuav kawm tau.

²⁶Tug kws ntxeev sab rua nwg txiv, hab ntab nwg nam tawm huv tsev moog, yog tug tub kws luas has tsi zoo hab txaajmuag.

²⁷Mivtub, yog koj tso kev kawm tseg, ces tsi ntev koj yuav tsi ncu tej kws koj tub paub lawm.

²⁸Tug kws ua timkhawv tsi tseeb ntxo lwm tug, yog tug tuabneeg tsi ncaaj nceeg. Tej tuabneeg sab phem yeej nyam kev phem kev qas.

²⁹Tug tuabneeg ruag kws khaavtheeb yeej yuav maag nplawm xwb.