Read Hmong Njua Paajlug 2 Bible Online

Paajlug 2 - Hmong Njua bible

Paajlug 2

¹Mivtub, koj ca le khaws nkaus kuv tej lug qha rua nruab sab hab cim ntsoov tej kws kuv kuas koj ua.

²Yuavtsum ua tuab zoo noog cov tuabneeg txawj ntse tej lug hab muab sab rau noog kuas totaub zoo.

³Ca le kub sab lug nrhav kev txawj ntse hab thov, koj txhaj yuav totaub.

⁴Koj ca le muab sab rau nrhav tswvyim ib yaam le nrhav tej qhov nyaj qhov kub kws nyob nraim nkoog.

⁵Yog koj ua le nuav koj yuav paub fwm tug TSWV hab yuav paub tseeb has tas, Vaajtswv yog tug zoo le caag.

⁶Tug TSWV yog tug kws pub tswvyim rua tuabneeg, tej kev txawj kev ntse hab kev totaub puavleej yog nwg pub xwb.

⁷Nwg tiv thaiv hab paab cov tuabneeg ncaaj nceeg.

⁸Nwg tsomkwm cov tuabneeg kws ua ncaaj rua lwm tug, hab nwg tsomkwm cov tuabneeg kws muab sab npuab nwg.

⁹Yog koj noog kuv lug koj yuav paub qhov tseeb, paub qhov ncaaj nceeg, paub ua lawv le kevcai, hab paub ua koj lub neej.

¹⁰Koj yuav ua tug tuabneeg muaj tswvyim hab tej kws koj paub ntawd yuav ua rua koj zoo sab.

¹¹Tej kws koj totaub hab tej kws koj paub txhij paub txhua yuav tsomkwm koj

¹²hab tiv thaiv kuas koj txhaj tsi yuam kev moog ua txhum. Hab tej ntawd yuav kaav rawv tsi pub koj moog ti cov tuabneeg kws laam tau laam has lug kuas muaj kev kub ntxhuv.

¹³Cov tuabneeg kws tso txujkev ncaaj nceeg tseg maub nuag moog rua txujkev phem.

¹⁴Puab nyam ua txhum hab txaus sab moog ua tej kev phem kev qas kws tsi muaj qaabhau.

¹⁵Puab yog cov tuabneeg sab phem sab nkhaus, yeej tsi muaj leejtwg yuav ca sab tau rua puab le.

¹⁶Koj yuav tau tsiv kuas dlim ntawm tug quaspuj kws has lug mog lug muas ntxag kuas luas tej yuam kev ua txhum,

¹⁷nwg ua tsi ncaaj rua nwg tug quasyawg hab nwg tsi ncu qaab txug nwg tej lug cog tseg rua Vaajtswv lawm.

¹⁸Yog koj moog rua huv nwg tsev, ces yog koj taug kev moog rua txujkev tuag ntaag. Qhov kws koj moog rua huv nwg tsev tub yog moog rua huv tubtuag teb lawm.

¹⁹Tug kws moog rua huv tug quaspuj ntawd tsev, yeej tsi tau rov qaab lug le lawm. Nwg yuav tsi tau rov qaab lug taug txujkev kws muaj txujsa ib zag le.

²⁰Yog le ntawd koj yuavtsum xyum ua koj lub neej lawv le tug txivneej kws ua zoo hab ua lub neej ncaaj nceeg.

²¹Cov tuabneeg kws ncaaj nceeg hab ua zoo, yuav tau nyob huv lub tebchaws.

²²Tabsis Vaajtswv yuav muab tej tuabneeg sab phem tshem tawm huv lub tebchaws ntawd moog hab muab tej tuabneeg txhum rhu tawm ib yaam le dlob nroj povtseg ntaag.