Read Hmong Njua Paajlug 20 Bible Online

Paajlug 20 - Hmong Njua bible

Paajlug 20

¹Haus cawv ntau yuav ua rua koj vwm hab qw lom vaab vaab, tsuas yog tug tuabneeg ruag txhaj quav cawv xwb.

²Thaus vaajntxwv chim, koj yuav ntshai ib yaam le koj ntshai tsuv ntxhuav nyooj; ua rua nwg npautawg ces yog yug rov tua yug.

³Tug ruag ua kuas muaj kev sis caav sis tshe. Tug kws txaav dleb ntawm tej ntawd, yuav tsi poob ntsejmuag.

⁴Tug tswv teb kws nkeeg laij nwg thaaj teb rua lub caij laij teb yuav tsi muaj qoob nrug luas sau.

⁵Tej kws tuabneeg lub sab xaav, zoo le cov dlej kws nyob huv lub qhov tshij tub tub, tabsis tug kws muaj tswvyim yuav muab qha rua suavdlawg paub.

⁶Txhua tug nyag taug nyag khaav has tas nwg yog tug ncaaj nceeg, tabsis yog yuav nrhav tug tuabneeg ncaaj nceeg tag mas ceeblaaj nrhav tau!

⁷Cov mivnyuas kws tau koob moov, tub yog leej txiv ua ncaaj hab ua zoo.

⁸Vaajntxwv nyob ntawm lub rooj txav txim, nwg pum hab paub txhua tug tej kev phem.

⁹Puas muaj leejtwg has tau has tas, nwg lub sab ncaaj nceeg hab nwg tsi muaj txhum?

¹⁰Tug TSWV ntxub cov tuabneeg kws muab raab teev ntxo lug luj, hab muab lub kawm kws tsi txwm lug yeem.

¹¹Txawm yog ib tug mivnyuas los nwg yeej ua nwg tug yaam ntxwv rua koj paub has tas nwg nyam le caag; koj yuav paub has tas nwg ua ncaaj hab ua zoo.

¹²Tug TSWV yeej pub rua peb muaj qhovmuag pum kev, hab muaj qhovntsej nov lug.

¹³Yog koj siv sijhawm pw ntau, koj yuav ua tuabneeg pluag. Rau sab ntso ua num koj txhaj yuav muaj noj muaj haus nplua mag.

¹⁴Tug kws tuaj yuav khoom ywg has tas luas muag kim hwv, tabsis thaus nwg tawm lawm nwg khaav has tas, nwg khom tau tug nqe pheej yig kawg le.

¹⁵Yog koj paub has tej lug kws zoo, tseem zoo tshaaj kub lossis tej hlaws muaj nqes.

¹⁶Yog tug tuabneeg ruag moog coglug them lwm tug tej nuj nqes, yuav tau kuas muab nwg tej qhov txhua chaw moog ntaus nqe ua ntej.

¹⁷Tej kws koj tau lug ntawm kev tsi ncaaj nceeg, yuav txaus koj sab ib yaam le tej zaub mov kws qaab heev, tabsis tsi ntev yuav zoo le tej xuabzeb nyob huv koj qhovncauj.

¹⁸Khaws luas tej lug ntuag tuab zoo ca, koj txhaj le yuav vaammeej. Yog tsi tau tuav tswvyim ua ntej, tsi xob rawm moog ntaus rog.

¹⁹Tug tuabneeg taug xaiv yeej tsi paub zais lug. Tsi xob nrug tej tuabneeg ntau ncauj ua ke.

²⁰Yog koj tshev koj nam koj txiv, koj txujsa yuav tu ib yaam le lub teeb kws tuag thaus tsaus ntuj nti.

²¹Tej nyaj txag kws koj khwv tau lug yoojyim, yuav pluj moog yoojyim ib yaam nkaus.

²²Tsi xob ua pauj rua tej kws luas ua txhum rua koj. Ca sab rua tug TSWV, nwg yuav paab koj.

²³Tug TSWV ntxub cov tuabneeg kws muab raab teev ntxo coj lug luj ntxo luas tug.

²⁴Tug TSWV yog tug kws coj peb txuj hauv kev, leejtwg txhaj yuav paub nwg lub neej yaav tom ntej?

²⁵Ua tuab zoo xaav ua ntej tsaiv maam coglug muab khoom fij rua Vaajtswv. Nyob tsaam koj yuav khauvxwm tom qaab.

²⁶Tug vaajntxwv kws ntse yeej paub tug tuabneeg kws ua txhum, hab yuav rau txim rua nwg tsi zaam hlo le.

²⁷Tug TSWV paub peb tej kev xaav kws nyob nraim nkoog huv peb lub sab, peb tsi muaj cuabkaav zais tau tej ntawd.

²⁸Tug vaajntxwv yuav tau kaav tebchaws nyob ntev, yog tug kws muaj kev hlub, muaj sab zoo hab kaav ncaaj nceeg.

²⁹Peb qhuas cov hluas tug zug hab fwm cov laug kws plaubhau dlawb paug.

³⁰Raug ntaus hab raug nplawm, ua rua peb hloov tau peb lub sab hab ua lub neej zoo.