Read Hmong Njua Paajlug 21 Bible Online

Paajlug 21 - Hmong Njua bible

Paajlug 21

¹Tug TSWV tswj vaajntxwv lub sab yoojyim ib yaam le nwg tswj tug dlej.

²Koj yuav xaav has tas txhua yaam kws koj ua puavleej yog, tabsis tug TSWV yuav txav txim lawv le tej kws koj ua lawm.

³Ua ncaaj ua nceeg hab ua zoo, txaus tug TSWV sab dlua coj tej khoom tuaj fij rua nwg.

⁴Lub qhovmuag kws qauj quas leg hab lub sab kws khaavtheeb, yog kev txhum.

⁵Nquag hab ua tuab zoo npaaj, koj txhaj muaj nplua mag, yog koj laam tau laam ua, koj yuav muaj tsi txaus.

⁶Tej nyaj kws tau lug ntawm kev tsi ncaaj nceeg, tsi ntev yuav pluj moog, tej nyaj ntawd yuav coj koj moog raug kev pluj kev tuag.

⁷Cov tuabneeg sab phem tej kev phem ua rua puab raug kev puamtsuaj, rua qhov puab ua tsi ncaaj.

⁸Cov tuabneeg txhum taug txujkev nkhaus, cov tuabneeg kws tsi muaj txim txhum ua qhov zoo.

⁹Nyob sau ruv tsev zoo dlua nrug tug quaspuj kws ywg taug nyob ua ke huv tsev.

¹⁰Cov tuabneeg sab phem nrhav nrhw txujkev ua phem. Puab tsi taabncuab leejtwg le.

¹¹Thaus tug tuabneeg khaavtheeb raug txim, ua rua tug tuabneeg ruag ntse tuaj. Tug tuabneeg txawj ntse kawm tau tej kws luas qha nwg.

¹²Vaajtswv yog tug kws ncaaj nceeg paub txhua yaam kws nyob huv tug tuabneeg sab phem tej tsev, hab nwg ua kuas puab raug kev puamtsuaj.

¹³Yog koj ntsaws qhovntsej tsi kaam noog cov tuabneeg pluag lub suab quaj thov, thaus koj quaj thov luas paab yuav tsi muaj leejtwg nov.

¹⁴Yog muaj leejtwg chim rua koj, ca le muab ib yaam khoom moog pub rua nwg, ua rua nwg txujkev chim pluj moog.

¹⁵Thaus muaj txujkev ncaaj nceeg, yog kev zoo sab rua cov tuabneeg ncaaj nceeg, tabsis cov tuabneeg sab phem taag kev ca sab.

¹⁶Txhua tug kws tso txujkev ua zoo tseg, txujkev tuag nyob tog rawv puab.

¹⁷Tug kws nyam kev lomzem yuav pluag; tug kws nyam quav cawv yuav tsi nrug luas muaj nyaj.

¹⁸Qhov kws cov tuabneeg sab phem ua phem rua cov tuabneeg ncaaj nceeg, yog puab lob kev txomnyem rov rua puab ris.

¹⁹Moog nyob tom taj suabpuam zoo dlua le nrug tug quaspuj kws tsawm taug, ywg taug nyob ua ib tse.

²⁰Cov tuabneeg txawj ntse yeej ua neej npluanuj hab muaj zoo vaaj zoo tsev nyob, tabsis cov tuabneeg ruag khwv tau nyaj npaum le caag, puab muab siv taagnrho.

²¹Ua sab dlawb sab zoo hab ua ncaaj ua nceeg, koj txhaj muaj sa nyob ntev; hab luas txhaj yuav fwm hab nyam koj.

²²Tug thawj tubrog kws txawj ntse muaj peevxwm txeeb tau lub nroog kws muaj cov tubrog muaj zug heev tiv thaiv, hab rhuav tau tug ntsaa yeej kws puab tso sab rua.

²³Yog koj tsi xaav raug teebmeem, koj yuavtsum ceevfaaj tej lug kws koj has.

²⁴Qha tug tuabneeg muaj plhus rua kuv, hab kuv yuav qha tug tuabneeg kws muab hlub, khaavtheeb hab tsi txawj xaav rua koj.

²⁵Tug tuabneeg tubnkeeg kws tsi kaam moog ua num, yog nwg rov muab nwg tua povtseg;

²⁶hab tej kws nwg ua, nwg tsuas xaav has tas saib yuav tau dlaabtsi. Tug tuabneeg ncaaj nceeg pub tau txhua yaam rua luas ntawm lub sab dlawb paug.

²⁷Tug TSWV ntxub tej khoom theej txhoj kws cov tuabneeg sab phem coj tuaj fij rua nwg, qhov kws nwg ntxub tshaaj yog puab tsi ua lug ntawm lub sab dlawb paug.

²⁸Tug tuabneeg dlaag tej lug timkhawv yeej tsi txaus ntseeg, tabsis tug tuabneeg kws ua tuab zoo xaav tej lug yuav tau.

²⁹Cov tuabneeg ncaaj nceeg ua tuab zoo xaav rua tej kws puab ua, tabsis cov tuabneeg sab phem ua txuj ua le puab yog tug zoo heev.

³⁰Yog tug TSWV tawmtsaam koj lawm, tuabneeg lub tswvyim, txujkev txawj ntse hab kev totaub yeej paab tsi tau koj le.

³¹Koj yog tug npaaj tej neeg kuas txhij moog ntaus rog, tabsis tug TSWV yog tug paab koj kuas yeej.