Read Hmong Njua Paajlug 22 Bible Online

Paajlug 22 - Hmong Njua bible

Paajlug 22

¹Yog koj yuav xaiv yuav lub koob meej zoo lossis kev npluanuj, koj ca le xaiv yuav lub koob meej txhaj le zoo.

²Tug npluanuj hab tug pluag qhov kws zoo sis thooj yog le nuav: obtug puavleej yog tug TSWV tsim huv tuabsi.

³Tug tuabneeg paub qaabhau pum tej xwm kws yuav lug raug nwg, nwg txawm zaam kev lawm, tabsis tug tuabneeg ruag too hauv li moog rua qhov ntawd, thaus kws tau chaw ti nwg maam le xeevxwm.

⁴Txu koj lub fwjchim hab fwm tug TSWV, koj txhaj yuav muaj txag npluanuj, muaj koob meej, hab muaj sa ua neej nyob ntev.

⁵Yog koj khauvxwm koj txujsa, tsi xob moog ze tej vuj hlua kws luas cuab tog cov tuabneeg sab phem txuj hauv kev.

⁶Qha mivnyuas kuas paub ua nwg lub neej, nwg yuav ncu ntsoov tej lug ntawd moog taag nwg simneej.

⁷Cov tuabneeg pluag yeej ua cov tuabneeg npluanuj qhev. Txais luas nyaj ces yog ua luas qhev.

⁸Yog koj tseb tej kws tsi ncaaj nceeg, koj yuav tau sau kev puamtsuaj, hab qhov kws koj ua limham rua lwm tug yuav kawg moog.

⁹Ua tuabneeg sab dlawb sab zoo hab pub koj tej zaub mov rua cov tuabneeg pluag noj. Koj txhaj yuav tau koob moov.

¹⁰Ntab cov tuabneeg khaavtheeb tawm moog, txhaj tsi muaj kev sis caav sis tshe lossis kev xyaav luas npe tsi zoo ntxiv lawm.

¹¹Yog koj muaj lub sab dlawb sab zoo hab has lug mog lug muas, ces vaajntxwv yuav yog koj tug phoojywg.

¹²Tug TSWV tsomkwm tej lug tseeb, tabsis nwg rhuav tshem tej lug dlaag.

¹³Tug tuabneeg tubnkeeg nyob huv tsev xwb, nwg has tas yog tawm moog nrau zoov tsuv ntxhuav yuav tum.

¹⁴Kev ua nkauj ua nraug yog lub vuj hlua. Lub vuj hlua ntawd yuav maag cov tuabneeg kws tug TSWV chim rua lawm.

¹⁵Tej mivnyuas yau yeej los ua le tej tuabneeg kws tsi paub qaabhau, tabsis raab nplawm yuav qha kuas puab paub coj tug yaam ntxwv zoo.

¹⁶Yog koj muab khoom pub rua cov tuabneeg npluanuj lossis quab yuam cov tuabneeg pluag kuas koj npluanuj, ces koj yuav ua tuabneeg txomnyem.

¹⁷Ua tuab zoo noog, kuv yuav qha koj saib tej tuabneeg txawj ntse has le caag. Rau sab ntso kawm puab tej lug qhuab qha nuav,

¹⁸yog koj ncu tau tej lug ntawd hab has tau txhua lu, yuav ua rua koj zoo sab heev.

¹⁹Kuv xaav kuas koj muab koj txujkev ca sab tso plhuav rua tug TSWV; vim le ntawd kuv txhaj muab tej lug nuav lug qha rua koj paub.

²⁰Kuv sau tau peb caug nqai lug txawj ntse rua koj. Cov lug nuav yog kev txawj ntse hab lug tuavxaam kws zoo heev,

²¹hab yuav qha rua koj paub has tas qhov twg yog qhov tseeb. Ces koj txhaj moog nrhav tau tej lug tseeb lug teb cov kws xaa koj moog.

²²Tsi xob moog txeeb cov tuabneeg pluag tug, vim puab has tsi taug, tsi xob moog txeeb cov tuabneeg kws tsi muaj leejtwg paab tug huv tsev tu plaub.

²³Tug TSWV yuav ua tug has puab tej plaub hab txuv txhua tug kws txuv puab txujsa lawm.

²⁴Tsi xob ua phoojywg nrug cov tuabneeg kws sab ceev hab ua nruj ua tsiv.

²⁵Nyob tsaam koj moog xyum ua le puab hab hloov tsi tau le lawm.

²⁶Tsi xob coglug them lwm tug tej nuj nqes.

²⁷Yog koj them tsi taug, txawm yog koj lub txaaj pw los luas yuav tuaj nqaa moog.

²⁸Tsi xob txaav tug nrimteb qub kws koj yawmkoob tau tu tseg lawm.

²⁹Koj puas pum cov tuabneeg kws yog kws txawj hab ua tau puab teg num zoo? Puab yuav tau ua num rua vaajntxwv, tsi yog ua rua tej pejxeem.