Read Hmong Njua Paajlug 23 Bible Online

Paajlug 23 - Hmong Njua bible

Paajlug 23

¹Thaus koj nrug ib tug tuabneeg tseemceeb noj mov ua ke, ncu ntsoov has tas nwg yog leejtwg.

²Yog koj qaab lus heev, yuavtsum tswj koj kev noj hab kev haus.

³Tsi xob zoo sab rua tej zaub mov qaab qaab kws nwg rau lug; tej zag yog nwg muab lug sim koj xwb.

⁴Yuavtsum ua tuabneeg ntse, tsi xob ca nyaj txag yuam tau koj ua qhev,

⁵rua qhov tuab ntsais muag xwb, koj tej nyaj txag yuav pluj taag, ib yaam le tug dlaav kws muaj tis yaa.

⁶Tsi xob nrug tug tuabneeg cuamkhum noj mov sau nwg lub rooj lossis zoo sab rua tej zaub mov qaab qaab kws nwg rau lug.

⁷Nwg yuav hu has tas, “Ca le lug noj,” tabsis nwg lub ncauj laam hu xwb, nwg lub sab tsi yog le ntawd.

⁸Koj yuav ntuav tej kws koj noj lawm tawm, hab tej lug zoo kws koj has los yuav tsi muaj qaabhau.

⁹Tsi xob ntuag tug tuabneeg ruag. Nwg yuav muab koj tej lug saib tsi muaj qaabhau.

¹⁰Tsi xob txaav tug nrimteb qub kws tu tseg lawm lossis txeeb cov mivnyuas ntsuag tej aav.

¹¹Tug TSWV kws muaj fwjchim yuav tuaj puab tog hab paab puab ua ncauj ua lug tawmtsaam koj.

¹²Muab sab rau kawm tej kws koj tug xwbfwb qha hab khaws txhua yaam ntawd ca.

¹³Tsi xob muab kev qhuab qha mivnyuas tso tseg. Koj nplawm nwg xwb, nwg yeej tsi tuag.

¹⁴Yog koj nplawm nwg, yuav cawm tau nwg dlim ntawm txujkev puamtsuaj.

¹⁵Mivtub, yog koj ua ib tug tuabneeg txawj ntse, mas kuv yuav zoo sab kawg le.

¹⁶Kuv yuav txaus sab thaus kuv nov koj has tej lug kws ntse ntsuav.

¹⁷Tsi xob khib rua tej tuabneeg txhum. Ca le fwm tug TSWV, nwg yuav coj koj lub neej.

¹⁸Yog koj ua le ntawd koj lub neej yaav tom ntej yuav kaaj sab lug.

¹⁹Mivtub, ua tuab zoo noog, koj yuavtsum ntse hab muab sab rau ua koj lub neej tag tag.

²⁰Tsi xob moog koom nrug cov tuabneeg kws nyam haus cawv lossis noj ntau haus ntau ua ke.

²¹Cov tuabneeg quav cawv hab sab hlub yuav pluag. Yog mej noj taag pw xwb, tsi ntev mej yuav naav khaub hlaab.

²²Noog koj txiv tej lug, yog tsi muaj nwg yeej tsi muaj koj. Thaus koj nam laug lawm, koj yuavtsum pauj nwg txaj ntsig.

²³Qhov tseeb, tswvyim, kawm txawj kawm ntse hab lub sab thoob tsib to nrog, yog tej kws muaj nqes heev, tsimnyog muab khaws ca, tsi xob muab muag moog.

²⁴Leej txiv kws muaj tug tub ncaaj nceeg, muaj kev zoo sab heev. Tug tub kws muaj kev txawj ntse yuav ua rua leej txiv tau koob meej.

²⁵Koj yuavtsum ua kuas koj nam koj txiv tau ntsejmuag. Ca le ua rua koj nam muaj kev zoo sab.

²⁶Mivtub, ua tuab zoo noog kuv tej lug, hab xyum ua lawv le kuv lub neej.

²⁷Cov namndlav hab cov quaspuj kws ntxag hluas nraug yog lub vuj hlua kws coj moog rua txujkev tuag.

²⁸Puab zuv rawv tog koj ib yaam le tej tubsaab, hab puab ntxag tau ntau leej txivneej moog ua tuabneeg tsi ncaaj nceeg lawm.

²⁹Mej sim coj tug tuabneeg kws nyam haus cawv ntau, hab nyam muab yaam nuav yaam u lug tim cawv haus tuaj rua kuv, kuv yuav qha nwg tej kev txomnyem hab kev lwj sab rua nwg paub. Tug kws haus cawv pheej tsim kev kub ntxhuv hab pheej ywg le nuav le u. Nwg ob lub qhovmuag nce ntshaav lab ploog hab nwg tej nqaj dloog ntsuab xab, vim haus cawv nkaus xwb.

³¹Tsi xob pub cawv ntxag tau koj, txawm yog cawv yuav lab ntshab si, pum dluab nyob zoj huv lub khob, hab yoojyim nqog los xij.

³²Yog koj haus, thaus kaaj ntug, koj yuav nov mob taug leeg cuag le naab muaj taug tum.

³³Kev phem yuav tshwm rua koj qhovmuag pum, hab yuav ua rua koj xaav tsi tawm lossis tsi paub yuav has le caag,

³⁴yuav zoo le koj pw ua tug ntaab yeeg huv plawv havtxwv hab nyob sau lub nkoj tug hauv ncej kws dlai dlaim ntaub ntaus cua.

³⁵Ces koj yuav has tas, “Kuv tub raug luas ntaus, kuv raug luas nplawm lawm, tabsis kuv tsi ncu qaab taag lawm. Vim le caag kuv txhaj tsi sawv? Kuv tseem yuav haus ntxiv hab.”