Read Hmong Njua Paajlug 24 Bible Online

Paajlug 24 - Hmong Njua bible

Paajlug 24

¹Tsi xob khib rua cov tuabneeg ua phem ua qas, hab tsi xob nrug puab ua phoojywg.

²Rua qhov puab lub sab xaav ua limham hab puab lub ncauj has tej lug tsi zoo.

³Tug kws muaj tswvyim hab txawj ntse, nwg lub tsev yuav nyob ruaj khov.

⁴Yog muaj kev txawj ntse, ces muaj tej rooj tog kws zoo nkauj hab muaj nqes nyob huv tsev.

⁵Muaj tswvyim zoo dlua muaj zug, kev txawj ntse tseemceeb dlua tug dlaag zug.

⁶Mej yuavtsum npaaj tswvyim kuas zoo ua ntej mej maam le moog ntaus rog, yog muaj ntau tug tuav tswvyim, mej yimfuab yuav kovyeej.

⁷Cov tuabneeg txawj ntse has tej lug kws tub tub, ua rua tug tuabneeg ruag tsi totaub. Thaus sis thaam txug tej yaam tseemceeb, tug ruag tsi muaj lug has le.

⁸Yog koj pheej nrhav tswvyim ua phem xwb, luas yuav hu koj has tas, tug tuabneeg thaab plaub.

⁹Txhua yaam kws tug tuabneeg ruag xaav puavleej yog kev txhum. Suavdlawg ntxub tug tuabneeg kws pheej thuam lwm tug.

¹⁰Yog koj qaug zug thaus raug kev ntxhuv sab, ces yog koj sab yau hwv.

¹¹Tsi xob ua xyem xyaav, ca le paab tug tuabneeg tsi muaj txhum kws luas yuav coj moog tua povtseg.

¹²Koj yuav has tas, “Tsi yog kuv feem xyuam,” tabsis Vaajtswv paub hab yuav txav txim lawv le koj ua. Nwg saib ntsoov koj, nwg yeej paub koj lub sab. Hab nwg yuav muab nqe zug rua koj lawv le tej kws koj ua lawm.

¹³Mivtub, ca le noj zib ntaab; rua qhov zib ntaab yog yaam zoo. Cov zib ntaab kws ndlwg ntawm dlaim tsev ntaab lug qaab zib rua koj tug nplaig,

¹⁴koj yuav paub has tas tswvyim zoo ib yaam le ntawd rua koj txujsa. Yog koj tau tswvyim, koj lub neej yaav tom ntej yuav kaaj sab lug.

¹⁵Tsi xob ua le tug tuabneeg sab phem kws pheej nrhav tswvyim moog nyag lossis rhuav tug tuabneeg ncaaj nceeg tej vaaj tse.

¹⁶Tug tuabneeg ncaaj nceeg qaug pistsawg zag los nwg yeej sawv tau, tabsis kev puamtsuaj rhuav tshem cov tuabneeg ua phem.

¹⁷Tsi xob zoo sab thaus koj tug yeebncuab raug kev puamtsuaj, hab tsi xob zoo sab thaus nwg dlawm qaug lawm.

¹⁸Yog koj nyos koj tug yeebncuab, tug TSWV yeej yuav paub, nwg tsi nyam koj ua le ntawd, hab tej zag nwg yuav tsi rau txim rua koj tug yeebncuab.

¹⁹Tsi xob nyuaj sab rua cov tuabneeg sab phem, tsi xob khib tej kws puab ua.

²⁰Tug tuabneeg ua phem yeej tsi muaj kev ca sab rua yaav tom ntej hab puab lub neej tsaus ntuj nti.

²¹Kuv tug mivtub, koj yuavtsum fwm tug TSWV hab fwm vaajntxwv. Tsi xob koom nrug cov tuabneeg kws ntxeev sab tawmtsaam tug TSWV hab vaajntxwv hlo le;

²²cov tuabneeg kws ua le ntawd yuav raug kev puamtsuaj sai. Koj puas paub has tas Vaajtswv lossis vaajntxwv yuav tso kev puamtsuaj lug raug koj nyaav npaum le caag?

²³Tej lug nuav yog tug tuabneeg txawj ntse has: Qhov kws txhobtxwm txav txim tsi ncaaj rua luas, yog koj ua tsi yog lawm.

²⁴Yog tug txav txim phua lub txim tsi txhum rua tug tuabneeg txhum, nwg yuav raug luas foom hab ntxub.

²⁵Tabsis tug kws txav txim rua tug tuabneeg ua txhum, tug ntawd lub neej yuav vaammeej.

²⁶Tug kws muab lu lug tseeb lug teb luas, qha has tas nwg yog phoojywg zoo.

²⁷Tsi xob maaj ua koj lub tsev hab tsim koj tsev tuabneeg ua ntej koj npaaj tau thaaj teb hab txhua yaam txhij tsaiv.

²⁸Tsi xob ua timkhawv tsi tseeb tawmtsaam lwm tug kws tsi tau ua txhum lossis has tej lug kws ntxag luas yuam kev.

²⁹Tsi xob has tas, “Kuv yuav ua rua nwg ib yaam le nwg tau ua rua kuv lawm. Kuv yuav pauj tej kws nwg ua rua kuv lawm rov rua nwg!”

³⁰Kuv moog ncig thoob plawg tug tuabneeg ruag, hab tug tuabneeg tubnkeeg tej laj teb hab tej vaaj txiv maab huv tuabsi lawm.

³¹Muaj xuavpaug hab nroj faab puv nkaus dlaim teb. Tej ntsaa zeb kws xov ncig dlaim teb puavleej pob taag rua huv aav.

³²Kuv saib tej nuav, kuv muab xaav, mas kuv kawm tau tej yaam zoo ntawm zaaj nuav:

³³Moog pw ib plag, hab tsaug ib tsig zug tsaiv. Khawm teg su ib plag tsaiv,

³⁴tabsis thaus koj tseem taabtom pw tsaug zug, kev txomnyem yuav lug raug koj, ib yaam le tubsaab nqaa rawv qws tuaj fuab koj lub neej ntaag.