Read Hmong Njua Paajlug 25 Bible Online

Paajlug 25 - Hmong Njua bible

Paajlug 25

¹Ntawm nuav yog Xalumoos tej paajlug kws has ntxiv, yog cov Yudas tug Vaajntxwv Hexekiyas tej numtswv muab sau ca rua huv tsev tu plaub tseg.

²Peb fwm Vaajtswv rua qhov nwg npog txhua yaam ca, peb fwm tej vaajntxwv rua qhov puab tshawb txhua yaam tawm.

³Koj yeej tsi paub txug vaajntxwv lub sab xaav ib zag le, nwg xaav tau dlaav tshaaj peb, lub ntuj sab hab havtxwv tub npaum le caag, nwg yeej xaav dlhau peb dleb npaum le ntawd.

⁴Cais tej quav hlau tawm ntawm cov tseem nyaj moog txhaj le nchuav tau tej taig nyaj zoo nkauj.

⁵Tsi xob pub cov tuavxaam sab phem nyob ze vaajntxwv hab nwg cov numtswv, vaajntxwv txhaj tswj tau lub tebchaws ncaaj nceeg.

⁶Thaus koj sawv taabmeeg ntawm vaajntxwv, tsi xob ua txuj khaav le koj yog tug tuabneeg tseemceeb.

⁷Ca luas caw koj moog nyob lub chaw sab, zoo dlua le luas ntab koj sawv hab muab lub chaw ntawd rua lwm tug kws tseemceeb dlua koj nyob.

⁸Tej yaam kws koj paub tsi tseeb, tsi xob maaj moog ua timkhawv rua huv tsev tu plaub. Nyob tsaam muaj lwm tug timkhawv pum qhov tseeb dlua koj, thaus ntawd koj yuav ua le caag?

⁹Yog koj hab koj tej phoojywg zej zog muaj tej lug tsi sis humxeeb, meb ca le sis has meb kuas taag, tsi xob muab nthuav tawm.

¹⁰Yog tsi ua le ntawd ces luas tej yuav paub has tas, koj yog ib tug kws tsi zais tej lug tseemceeb ca, ces koj yuav txaajmuag moog le.

¹¹Lu lug zoo kws has rua lub sijhawm tsimnyog has, zoo le tej kub kws muab vuam txaij nraug zeeg rua ntawm lub taig nyaj.

¹²Tug kws txaus sab noog tug tuabneeg kws tub pum dlua ua dlua lug lawm tej lug ntuag, muaj nqes dlua tej nplhaib lossis tej saw kws tseem kub.

¹³Tug tuabneeg xaa xuv kws ncaaj ua rua tug kws khaiv nwg moog lub sab kaaj ib yaam le haus cov dlej txag thaus lub caij sau qoob.

¹⁴Cov tuabneeg kws coglug tseg has tas, yuav muab yaam nuav yaam u rua luas, tabsis tsi muab, mas zoo ib yaam le tauv fuab hab nthwv cua kws tsi muaj naag.

¹⁵Ua sab ntev txhaj yuav ntxag tau tej numtswv; has tej lug zoo ua rua luas lub sab muas.

¹⁶Tsi xob noj zib ntaab ntau dlhau, yog noj ntau yuav ua rua koj ntuav.

¹⁷Tsi xob naj nub moog cov zog huv koj tej phoojywg nruab ze, nyob tsaam nwg nkeeg nrug koj nyob hab ntxub koj.

¹⁸Tej lug kom tsi tseeb, zoo ib yaam le tug qws lossis raab ntaaj lossis xibxub vug kws ntse zuag plag.

¹⁹Ca sab rua tug tuabneeg tsi ncaaj thaus muaj kev ntxhuv sab, ces zoo le tug tuabneeg luv nav xo mov lossis tug tuabneeg tu taw moog kev.

²⁰Hu nkauj rua tug tuabneeg nyuaj sab noog ces zoo le ib tug tuabneeg hle rig tsho tiv no lossis zoo le nphoo ntsev rua qhov txhaab.

²¹Yog koj tug yeebncuab tshaib plaab, muab mov rua nwg noj; yog nwg nqhes dlej, muab dlej rua nwg haus.

²²Yog koj ua le ntawd nwg yuav txaajmuag, tug TSWV txhaj yuav muab nqe zug rua koj.

²³Cov cua kws tuaj saab qaumteb tuaj coj naag lug le caag, tug tuabneeg taug xaiv ua rua muaj kev chim le ntawd.

²⁴Nyob sau ruv tsev zoo dlua le nrug tug quaspuj kws ywg taug nyob ua ke huv tsev.

²⁵Xuv zoo tuaj lub tebchaws dleb tuaj, zoo le koj haus cov dlej txag thaus koj nqhes dlej qaa qhuav qhawv.

²⁶Tug tuabneeg ncaaj nceeg kws ca tug tuabneeg sab phem coj nwg moog ua kev phem kev qas, ces zoo le lub qhovdlej txhawv kws nru lossis lub qhov tshij kws muaj tshuaj lom nyob huv.

²⁷Noj zib ntaab ntau yuav tsi zoo rua koj, hab qhov kws ca luas qhuas koj ntau los yuav tsi zoo ib yaam nkaus.

²⁸Yog koj tswj tsi tau koj kev chim, ces koj tsi muaj kev paabcuam ib yaam le lub nroog kws tsi muaj ntsaa yeej thaiv hab qheb lug rua yeebncuab tuaj ntaus ntaag.