Read Hmong Njua Paajlug 26 Bible Online

Paajlug 26 - Hmong Njua bible

Paajlug 26

¹Qhuas tug tuabneeg ruag tsi muaj qaabhau ib yaam le lug dlaus rua thaus ntuj qhua lossis lug naag rua lub caij sau qoob.

²Lu lug foom phem tsi mob koj qhov twg le, tshwj has tas yog koj yeej tau ua txhum lawm. Tej lug ntawd zoo le tej noog kws yaa lug, tabsis tsi tsaws qhov twg le.

³Muab paas lug nplawm neeg hab muab xauv lug saam neeg luav, yuav muab hlua tawv nplawm tug tuabneeg kws tsi noog lug.

⁴Yog koj teb tug tuabneeg ruag tej lug nug, ces yog koj ruag ib yaam le nwg.

⁵Muab tej lug ruag teb rua tug tuabneeg ruag tej lug nug, kuas nwg txhaj paub has tas, nwg tsi ntse le nwg xaav.

⁶Yog koj ca tug tuabneeg ruag xaa xuv, ib yaam le yog koj txav koj txhais kutaw povtseg, hab yog koj tsub kev ntxhuv sab ntxiv rua koj.

⁷Tug tuabneeg ruag has paajlug ces tsuas zoo le tug tuabneeg cegtawv moog kev.

⁸Qhuas tug tuabneeg ruag, ces zoo ib yaam le muab ib lub pobzeb khi rua ntawm txuj zeg hlua.

⁹Tug tuabneeg ruag has paajlug, ces zoo ib yaam le tug tuabneeg qaug cawv dlig saus ntawm nwg txhais teg.

¹⁰Tug kws ndlav tug tuabneeg ruag lossis tug tuabneeg quav cawv ua nwg tub zug, ces zoo ib yaam le tug tuabneeg kws tua neevnti tsi saib qaabhau kws tua raug lwm tug.

¹¹Tug tuabneeg ruag kws pheej ua tej yaam ruag taag los rov ua dlua, ces zoo ib yaam le tug dlev kws rov noj dlev cov ntuav.

¹²Tug tuabneeg ruag kws ruag kawg le, tseem zoo dlua tug kws nwg xaav has tas nwg ntse heev, tabsis nwg tub tsi ntse.

¹³Vim le caag tug tuabneeg tubnkeeg txhaj tsi tawm huv tsev moog saab nrau? Yog nwg ntshai dlaabtsi? Puas yog ntshai tsuv ntxhuav?

¹⁴Tug tuabneeg tubnkeeg pw dlaa luj luam sau txaaj, zoo ib yaam le dlaim txag qhovrooj kws qoj moog qoj lug.

¹⁵Tug tuabneeg tubnkeeg cev dlav moog has mov huv taig los tub ceeblaaj nqaa lug rua ntawm qhovncauj.

¹⁶Tug tuabneeg tubnkeeg xaav has tas, nwg ntse dlua xyaa tug txivneej muaj tswvyim kws teb tau luas tej lug.

¹⁷Tug tuabneeg kws moog raus teg rua luas tej lug sis tshe kws tsi yog nwg cig tsug, ces zoo ib yaam le tug dlev dlha, hab yug ntsab dlev nploojntseg.

¹⁸Tug kws ntxag kuas lwm tug yuam kev, hab has tas yog nwg tso dlaag xwb, tug ntawd zoo ib yaam le tug tuabneeg vwm kws moog kov tej cuabyeej txuv txujsa ntaag.

²⁰Yog tsi muaj tawg, suavtawg kuj tuag; yog tsi muaj tug tuabneeg nkawg lug xaiv, ces yeej tsi muaj kev sis caav sis tshe.

²¹Thee ua kuas suavtawg caj, tawg ua kuas nplaim tawg cig, hab tug tuabneeg kws ua kuas muaj teebmeem ua rua kev sis caav sis tshe luj tuaj.

²²Tej lug kws has luas plig, zoo has kawg le! Suavdlawg txhaj nyam has ua luaj!

²³Tug tuabneeg kws ncauj zoo tabsis sab phem, mas zoo ib yaam le lub hub kws muab vuam saab nrau kuas ci xwb.

²⁴Tug tuabneeg ntsejmuag ncaaj sab nkhaus ntxub luas, tabsis tseem ua txuj qhuas luas.

²⁵Txawm yog nwg has lug zoo los tsi xob ntseeg, rua qhov nwg lub sab puv nkaus kev ntxub ntxaug.

²⁶Txawm yog nwg zais qhov kws nwg ntxub luas los suavdlawg yeej paub tej kev phem kws nwg ua.

²⁷Tug tuabneeg kws khawb qhov cuab luas kev, yog nwg cuab nwg xwb. Leejtwg cuab yej yuav rov tais nwg teg.

²⁸Yog koj ntxub tug twg koj txhaj dlaag kuas nwg raug mob. Tug tuabneeg ncauj zoo sab phem, yuav raug kev puamtsuaj.