Read Hmong Njua Paajlug 27 Bible Online

Paajlug 27 - Hmong Njua bible

Paajlug 27

¹Tsi xob khaav rua pigkig. Koj tub tsi paub has tas, thaus tseem tsi tau txug pigkig yuav muaj xwm dlaabtsi.

²Ca lwm tug hab tej qhua qhuas koj, koj tsi xob rov qhuas koj.

³Tej kev nyuaj sab kws cov tuabneeg ruag rhawv muaj, nyaav dlua pobzeb hab xuabzeb.

⁴Kev chim yog kev nruj tsiv hab kev puamtsuaj, tabsis txujkev khib tseem phem heev dlua.

⁵Taabmeeg sis qha zoo dlua le ca nwg xaav has tas, koj tsi quavntsej nwg.

⁶Koj tug phoojywg ua rua koj mob sab tsi txug txij twg; tabsis thaus koj tug yeebncuab cev teg puag koj xubpwg, yuavtsum ceevfaaj.

⁷Thaus koj tsau plaab, txawm yog zib ntaab los tsi xaav noj lawm; tabsis thaus koj tshaib plaab, txawm yog noj zaub mov ab los yeej qaab zib.

⁸Tug tuabneeg kws ncaim nwg lub tsev moog dleb lawm, zoo ib yaam le tug noog kws nrug dleb ntawm nwg lub zeg.

⁹Roj hab tshuaj tsw qaab ua rua koj txaus sab heev, tabsis kev nyuaj sab ua rua kev kaaj sab pluj moog.

¹⁰Tsi xob tso koj tej phoojywg lossis koj txiv tej phoojywg tseg. Thaus koj raug kev nyuaj sab, tsi xob moog cuag koj cov kwvtij kws nyob dleb, tej phoojywg zej zog kws nyob ze tseem paab tau dlua koj cov kwvtij kws nyob dleb.

¹¹Mivtub, ca le ua tuabneeg ntse, kuv txhaj yuav zoo sab; kuv txhaj muaj lug teb tej tuabneeg kws saib tsi taug kuv.

¹²Tug tuabneeg paub qaabhau pum tej xwm kws yuav lug raug nwg, nwg txawm tshuv kev lawm, tabsis tug tuabneeg ruag too hauv li moog rua qhov ntawd, thaus nwg tau chaw ti nwg maam le xeevxwm.

¹³Yog tug tuabneeg ruag moog coglug them lwm tug tej nuj nqes, yuav tau kuas nwg muab nwg tej qhov txhua chaw moog ntaus nqe ua ntej.

¹⁴Yog koj moog tsaa koj tug phoojywg thaus sawv ntxuv, ces zoo ib yaam le koj moog tshev nwg ntaag.

¹⁵Tug quaspuj kws ywg taug zoo ib yaam le dlej naag nrug tujtauv.

¹⁶Koj yuav txwv tsi tau nwg kuas tsi xob ywg ib yaam le koj txwv tsi tau cua lossis muab phoov teg cug roj.

¹⁷Muab hlau huv hlau le caag, tej tuabneeg ib leeg kawm ntawm ib leeg ib yaam le ntawd.

¹⁸Tu koj tej txiv ncuav pas kuas zoo koj txhaj tau noj. Tug tubkhai kws tu nwg tug tswv zoo yuav tau txais lug qhuas.

¹⁹Koj pum koj tug dluab huv dlej le caag, koj lub sab xaav le caag, ces koj teg num zoo le ntawd.

²⁰Txujkev tuag txhaws tsi paub puv le caag, tuabneeg txujkev ntshaw tsi paub txaus ib yaam le ntawd.

²¹Nyaj hab kub muab suavtawg sim, kev qhuas sim tuabneeg lub sab.

²²Txawm yog koj yuav muab tug tuabneeg ruag ntaus tshuav tuag los nwg tseem ruag nwg le qub.

²³Saib koj tej yaaj tej nyuj kuas zoo,

²⁴rua qhov kev npluanuj tsi nyob moog ibtxhis. Txawm yog txhua tsaav tuabneeg los yeej tsi nyob moog ibtxhis.

²⁵Thaus koj sau tej zaub nyuj hab hlais tej nyom peg ntaav toj taag lawm, tej zaub tub pib hlaav mog nyoos tuaj lawm.

²⁶Koj muab tej plaub yaaj lug xaws rig tsho naav hab muab tej nyaj kws koj muag tshis moog yuav teb.

²⁷Dlua le tej tshis kws seem ca tsu kua mig yug koj hab koj tsev tuabneeg, hab koj tej ntxhais qhev kuas muaj noj muaj haus tsi tu.