Read Hmong Njua Paajlug 28 Bible Online

Paajlug 28 - Hmong Njua bible

Paajlug 28

¹Cov tuabneeg sab phem tsiv thaus tsi muaj tuabneeg caum nteg puab, tabsis cov tuabneeg ncaaj ua sab tawv qhawv ib yaam le tsuv ntxhuav.

²Thaus muaj kev ntxeev num ntxeev tswv nyob huv lub tebchaws, yuav muaj ntau tug numtswv lug kaav. Tabsis thaus tug thawjcoj kws txawj ntse lug kaav, lub tebchaws yuav nyob ruaj khov.

³Tug muaj fwjchim kws tsimtxom cov tuabneeg pluag, zoo ib yaam le kob tuamtsaam naag kws lug ntaus tej qoobloo tuag taag.

⁴Yog koj tsi ua lawv le kevcai, ces koj yog tug tuaj cov tuabneeg sab phem tog, tabsis yog koj fwm txuj kevcai, ces yog koj tawmtsaam cov tuabneeg sab phem.

⁵Cov tuabneeg sab phem tsi paub txujkev ncaaj nceeg, tabsis cov tuabneeg kws fwm tug TSWV totaub zoo.

⁶Ua tuabneeg txomnyem, tabsis ncaaj nceeg zoo dlua le ua tuabneeg npluanuj, tabsis tsi ncaaj nceeg.

⁷Tug tub kws fwm kevcai yog tug txawj ntse. Tug kws ua phoojywg nrug tug tuabneeg tsi tsimtxaj, ua rua nwg txiv poob ntsejmuag.

⁸Yog koj tsub paajlaum ntau rua luas them kuas koj npluanuj, koj tej nyaj txag yuav muab rua tug kws hlub cov tuabneeg pluag.

⁹Yog koj tsi ua lawv le txuj kevcai, Vaajtswv yuav ntxub hab dlhuav koj tej lug thov.

¹⁰Yog koj ntxag tug tuabneeg ncaaj nceeg ua kev txhum, ces yog koj cuab hlua rov maag koj. Tug kws tsi ua txhum yuav tau nqe zug.

¹¹Tug tuabneeg npluanuj ibtxwm xaav has tas nwg txhaj ntse, tabsis tug tuabneeg pluag kws muaj tswvyim tseem paub tug npluanuj lub qai heev dlua.

¹²Thaus tug tuabneeg sab zoo tau ua tug luj kaav, txhua tug zoo sab, tabsis thaus tug tuabneeg sab phem ua tug kaav, tej pejxeem tsiv moog nkaum taag.

¹³Yog koj pheej npog koj tej kev txhum tseg, koj lub neej yuav tsi vaammeej. Yog koj leeg hab tso plhuav tej kev txhum tseg, Vaajtswv yuav taabncuab koj.

¹⁴Naj nub noog tug TSWV lug koj txhaj ua neej kaaj sab lug. Yog koj ua tuabneeg tawv ncauj, koj yuav raug kev puamtsuaj.

¹⁵Tug tuabneeg sab phem kws tswjfwm cov tuabneeg pluag, nwg zoo ib yaam le tug tsuv ntxhuav kws nyooj quas lawg lossis tug dlais kws yuav sis tug.

¹⁶Tug thawjtswj kws tsi muaj tswvyim tsimtxom pejxeem heev. Tug kws ntxub txujkev tsi ncaaj nceeg, nwg yuav tau ua tug tswjfwm moog ntev.

¹⁷Tug kws muaj txim tua tuabneeg, yog nwg taabtom khawb qhov ntxaa rua nwg. Tsi xob cheem nwg hlo le.

¹⁸Ua tuabneeg ncaaj nceeg, koj txhaj yuav nyob kaaj sab lug. Yog koj ua tsi ncaaj, ces tsi nwm koj yuav qaug.

¹⁹Tug kws rau sab ntso ua laj ua teb yuav muaj noj nplua mag. Tabsis tug kws pheej moog xyub num ua dlog ua dlig, yuav ua tuabneeg pluag moog le.

²⁰Cov tuabneeg kws muaj lub sab ncaaj yuav tau txais lub neej kaaj sab. Tabsis yog koj xaav npluanuj sai, koj yuav raug txim ntaag.

²¹Xaiv ntsejmuag yog ua tsi ncaaj. Tabsis muaj tej tug txav txim tsi ncaaj, vim nwg tau mivntsiv nyaj xab.

²²Cov tuabneeg cuamkhum, xaav kuas npluanuj sai, puab tub tsi paub has tas thaus twg kev txomnyem yuav lug raug puab.

²³Tug kws ntuag ib tug tuabneeg twg, mas tom qaab ntawd nwg yuav zoo sab heev dlua le tug kws thuam.

²⁴Yog leejtwg xaav has tas nyag nwg nam nwg txiv tug los tsi txhum, tug ntawd yeej zoo ib yaam le tug kws ibtxwm ua tubsaab lug lawm.

²⁵Tug tuabneeg sab hlub ua kuas muaj kev kub ntxhuv, tabsis tug kws ca sab rua tug TSWV, nwg lub neej yuav vaammeej.

²⁶Tug kws ua lawv le nwg lub sab xaav xwb, yog tuabneeg ruag. Tug kws ua lawv le cov tuabneeg txawj ntse tej lug qha, nwg yuav tau nyob kaaj sab lug.

²⁷Tug kws pub rua cov pluag yuav muaj noj tsi tu. Yog koj tsi pum cov tuabneeg pluag, tuabneeg coob leej yuav foom phem rua koj.

²⁸Thaus tug tuabneeg sab phem lug tswjfwm, tej pejxeem tsiv nkaum. Tabsis thaus puab poob fwjchim lawm cov tuabneeg ncaaj nceeg yuav lug kaav.