Read Hmong Njua Paajlug 29 Bible Online

Paajlug 29 - Hmong Njua bible

Paajlug 29

¹Tug kws tsi yuav luas tej lug ntuag, nwg lub neej yuav puamtsuaj hab tsi muaj nub zoo ntxiv le lawm.

²Thaus cov tuabneeg ncaaj nceeg lug ua numtswv kaav, tej pejxeem zoo sab kawg, tabsis thaus cov tuabneeg sab phem lug ua numtswv kaav, tej pejxeem tau kev quaj ntsuag.

³Tug tub kws muaj tswvyim, leej txiv yuav txaus sab heev rua nwg. Tug kws muab nyaj txag moog siv rua tej namndlav, ces yog muab nyaj povtseg ntaag.

⁴Thaus vaajntxwv tswjfwm ncaaj nceeg, lub tebchaws yuav nyob ruaj khov kho, tabsis thaus nwg muab nyaj txag saib hlub, nwg yuav ua rua lub tebchaws puamtsuaj.

⁵Yog koj ua txuj qhuas tej phoojywg, ces yog koj rov cuab hlua tog koj kev.

⁶Cov tuabneeg sab phem txujkev txhum yuav rov lug raug puab, tabsis cov tuabneeg ncaaj nceeg yuav hu nkauj hab muaj kev kaaj sab lug.

⁷Tug tuabneeg ncaaj nceeg yeej ua ncaaj rua cov tuabneeg pluag, tabsis cov tuabneeg sab phem tsi quavntsej txug le.

⁸Cov tuabneeg kws thuam lwm tug, yog cov kws ua rua lub nroog muaj kev kub ntxhuv, tabsis cov tuabneeg ntse ua rua lub nroog nyob sis humxeeb.

⁹Thaus tug tuabneeg ntse ua plaub nrug tug tuabneeg ruag, tug tuabneeg ruag tsuas yog luag, qw hab tshev phem xwb.

¹⁰Cov tuabneeg kws nyam ua kuas luas nqaj ndluag ntshaav nrug, ntxub tug tuabneeg sab ncaaj, tabsis cov tuabneeg ua ncaaj yuav tiv thaiv tug ntawd txujsa.

¹¹Cov tuabneeg ruag chim hab npautawg sai, tabsis cov tuabneeg thoob tsib to nrog ua taug sab ntev hab muab txujkev chim npog tseg.

¹²Tug thawjcoj kws nyam noog tej lug fi xuv tsi tseeb, nwg cov numtswv yuav ua tuabneeg dlaag.

¹³Qhov kws tug tuabneeg pluag hab tug kws tsimtxom tug tuabneeg pluag zoo ib yaam yog le nuav: tug TSWV pub obtug muaj qhovmuag ib yaam nkaus.

¹⁴Yog vaajntxwv txav txim ncaaj nceeg rua cov tuabneeg pluag, nwg yuav tau tswjfwm moog ntev.

¹⁵Kev qhuab ntuag hab nplawm mivnyuas yuav ua rua tug mivnyuas tsimtxaj. Yog ca mivnyuas ua ywj sab, nwg yuav ua rua leej nam raug kev txaajmuag.

¹⁶Thaus cov tuabneeg sab phem tau lug ua tug tswjfwm, kev kub ntxhuv yuav luj tuaj. Tabsis cov tuabneeg ncaaj nceeg yuav pum cov tuabneeg sab phem raug kev puamtsuaj.

¹⁷Qhuab ntuag koj tej mivnyuas, puab txhaj yuav ua rua koj zoo sab. Puab txhaj tsi ua rua koj raug kev txaajmuag.

¹⁸Lub tebchaws kws tsi ca Vaajtswv ua tug coj. Lub tebchaws ntawd tsi muaj kev tswjfwm zoo. Tug tuabneeg kws muaj kev kaaj sab yog tug kws coj lawv le Vaajtswv txuj kevcai.

¹⁹Tug tubkhai kws koj ntuag ntawm lub ncauj xwb, nwg tsi noog, nwg yeej paub, tabsis nwg tsi ua le koj has.

²⁰Ca sab rua tug tuabneeg ruag zoo dlua le ca sab rua tug tuabneeg kws has lug tsi xaav tom ntej tom qaab.

²¹Yog koj muab txhua yaam rua koj tug tubkhai lawv le nwg xaav tau thaus nwg tseem hluas lug, muaj ib nub nwg yuav txeeb taagnrho tej kws koj muaj huv tuabsi.

²²Cov tuabneeg kws npautawg sai ua kuas muaj kev sis caav sis tshe hab kub ntxhuv.

²³Kev khaavtheeb yuav ua rua koj poob ntsejmuag, tabsis yog koj txu fwjchim, luas yuav fwm koj.

²⁴Tug tuabneeg tubsaab tug kwvluag yog nwg tug yeebncuab kws phem tshaaj plawg. Yog nwg qha qhov tseeb nyob huv tsev tu plaub, nwg yuav raug tsimtxom, yog nwg tsi qha tseeb Vaajtswv yuav foom phem rua nwg.

²⁵Kev ntshai luas ces yog lub vuj hlua cuab tog koj kev, tabsis yog koj ca sab rua tug TSWV, koj yuav kaaj sab lug.

²⁶Txhua tug xaav kuas tug thawjcoj txaus sab rua nwg, tabsis tsuas yog tug TSWV txhaj muab tau kev ncaaj nceeg.

²⁷Cov tuabneeg ncaaj nceeg ntxub cov kws tsi ncaaj nceeg, hab cov tuabneeg sab phem ntxub cov kws ua zoo.