Read Hmong Njua Paajlug 3 Bible Online

Paajlug 3 - Hmong Njua bible

Paajlug 3

¹Mivtub, koj tsi xob muab kuv tej lug qhuab qha tso tseg. Ncu ntsoov tej lug kws kuv qha rua koj lawm.

²Kuv tej lug qhuab qha yuav ntxiv noobnyoog rua koj, kuas koj muaj sa nyob ntev hab tau kev kaaj sab lug.

³Tsi xob muab txujkev ua zoo hab kev ncaaj nceeg tso tseg. Muab tej ntawd lug coj ntawm koj cejdlaab. Muab tej ntawd sau rua huv koj lub sab.

⁴Yog koj ua le nuav, Vaajtswv hab tuabneeg yuav txaus sab rua koj.

⁵Ca sab rua tug TSWV kuas kawg koj lub sab lub ntsws. Tsi xob ca sab rua koj tej kev txawj ntse.

⁶Txhua yaam kws koj ua koj yuavtsum ncu ntsoov tug TSWV, nwg txhaj yuav coj koj taug txujkev kws tseeb.

⁷Tsi xob xaav has tas koj yog tug ntse tshaaj. Ca le fwm tug TSWV hab tsi xob moog ua kev txhum.

⁸Yog koj ua le nuav, tej ntawd yuav zoo ib yaam le hauv tshuaj kuab muaj tsuas kws khu tau koj tej qhov txhaab hab ua rua koj tej mob zoo zuj zug.

⁹Koj yuavtsum fwm tug TSWV hab muab tej qoobloo zoo kawg nkaus kws koj khwv tau huv koj dlaim teb coj moog fij rua nwg.

¹⁰Yog koj ua le ntawd, koj yuav muaj qoobloo puv txhaab, hab koj yuav muaj cawv txiv maab ntau heev tsi muaj hub ntim taag.

¹¹Mivtub, thaus tug TSWV qhuab ntuag koj, ua tuab zoo noog, hab khaws nkaus nwg tej lug rua nruab sab, kuas koj txhaj paub ceevfaaj.

¹²Tug TSWV qhuab ntuag tug kws nwg hlub, ib yaam le leej txiv qhuab ntuag tug tub kws nwg ca sab rua.

¹³Tug kws muaj tswvyim hab totaub txhua tsaav yaam yeej nyob kaaj sab lug.

¹⁴Lub tswvyim tseemceeb dlua nyaj, nwg muaj nqes rua koj tshaaj tej kub.

¹⁵Tswvyim muaj nqes tshaaj tej saw kub; tej kws koj ntshaw tsi muaj ib yaam dlaabtsi yuav pev tau lub tswvyim ntawd le.

¹⁶Lub tswvyim paab tau rua koj muaj sa nyob ntev, ua rua koj muaj txag npluanuj hab muaj koob muaj meej.

¹⁷Lub tswvyim muaj peevxwm paab tau koj ua lub neej txaus sab hab coj koj ua neej tshaav ntuj nrig.

¹⁸Cov tuabneeg kws muaj tswvyim yeej ua neej nyob kaaj sab lug. Lub tswvyim yuav ua rua puab muaj sa nyob cus plawg.

¹⁹Tug TSWV lub tswvyim tsim lub nplajteb nuav; nwg txujkev txawj ntse muab lub ntuj teeb nyob muaj chaw.

²⁰Nwg lub tswvyim ua rua tej dlej txawj ndlwg tawm lug, hab tej fuab txhaj ua tau naag lug rua huv nplajteb nuav.

²¹Mivtub, tuav rawv koj lub tswvyim hab kev txawj ntse ca. Tsi xob ca tej ntawd tsiv tawm ntawm koj moog.

²²Tej tswvyim ntawd yuav ua rua koj muaj sa nyob, txaus sab hab ua neej nyob kaaj sab lug.

²³Koj yuav taug kev kaaj sab lug hab tsi raug teebmeem ib zag le.

²⁴Thaus koj moog pw los koj yuav tsi ntshai, hab koj yuav tau zoo pw tsaug zug ib mos kaaj ntug.

²⁵Koj yuav tsi txhawj txug tej kev puamtsuaj kws lug ntawm tej tuabneeg sab phem, ib yaam le cua dlaaj cua dlub ntsawj kws koj nwm tsi txug.

²⁶Tug TSWV yuav pub koj tau zoo nyob kaaj sab lug. Nwg yuav tsi ca koj moog maag lub vuj hlua.

²⁷Yog muaj tej yaam kws koj paab tau lwm tug, ca le paab tsi xob muab khaws ca.

²⁸Yog koj muaj txawm peem kws yuav paab tau tej phoojywg zej zog, ca le paab tsi xob kuas nwg tog txug pigkig tsaiv.

²⁹Tsi xob ua ib yaam dlaabtsi rua tej phoojywg zej zog kws nyob ntawm koj tog tsev tu sab, nwg yeej ca sab ntsoov rua koj xwb.

³⁰Tsi xob nrug leejtwg sis caav tej yaam kws tsi muaj qaabhau, yog nwg tsi tau ua ib qhov phem rua koj.

³¹Tsi xob khib rua tej tuabneeg kws ua phem lossis tsi xob xyum ua le puab ua,

³²rua qhov tug TSWV ntxub tej tuabneeg kws ua phem ua qas, tabsis nwg txaus sab rua cov tuabneeg ncaaj nceeg.

³³Tug TSWV foom phem rua tsev tuabneeg kws ua limham, tabsis nwg foom koob moov rua tsev tuabneeg kws ua ncaaj nceeg.

³⁴Nwg luag cov tuabneeg khaavtheeb plig, tabsis nwg hlub cov kws txu fwjchim.

³⁵Cov tuabneeg txawj ntse yuav tau koob meej zoo, tabsis cov tuabneeg ruag yuav poob ntsejmuag.