Read Hmong Njua Paajlug 30 Bible Online

Paajlug 30 - Hmong Njua bible

Paajlug 30

¹Ntawm nuav yog Yakes tug tub Ankus tej lug tseemceeb: “Vaajtswv tsi nrug kuv nyob, Vaajtswv tsi nrug kuv nyob, hab tsi muaj leejtwg paab kuv.

²Kuv ruag ib yaam le tug tsaj, kuv tsi muaj kev txawj ntse le tuabneeg muaj.

³Kuv yeej ibtxwm tsi tau kawm dlua kev txawj ntse, hab kuv yeej tsi paub has tas muaj Vaajtswv.

⁴Leejtwg tau nce moog sau ntuj hab nqeg rov qaab lug? Leejtwg nteg tau cua rua huv nwg lub xibteg? Lossis muab ib dlaim ntaub lug qhwv tau dlej? Lossis muab tej nrim aav nplajteb lug sis lu ua ke? Yog koj paub, nwg yog leejtwg? Leejtwg yog nwg tug tub?

⁵“Vaajtswv yeej ceev tej lug kws nwg tau cog tseg. Nwg zoo ib yaam le dlaim hlau thaiv nav ntaaj rua txhua tug kws nrhav txujkev paabcuam.

⁶Tsi xob ntxiv ib lu lug rua tug TSWV tej lug, nyob tsaam nwg tshev koj, hab nwg yuav paub has tas koj yog tug tuabneeg dlaag.”

⁷Vaajtswv, thov koj pub kuv muaj ob yaam nuav ua ntej kuv tuag:

⁸tsi xob pub kuv ua ib tug tuabneeg dlaag, hab tsi xob ca kuv npluanuj dlhau lossis pluag dlhau. Pub kuas kuv muaj txaus noj txaus haus xwb.

⁹Yog kuv muaj ntau dlhau lawm, ntshai kuv yuav has tas, kuv tsi vaamkhom koj. Tabsis yog kuv pluag dlhau lawm, tej zag kuv yuav moog ua tubsaab hab ua rua kuv tug Vaajtswv txaajmuag.

¹⁰Tsi xob nkaug ib tug tubkhai twg rua nwg tug tswv hlo le. Nyob tsaam koj yuav raug foom tsi zoo hab tau ris lub txim ntawd.

¹¹Muaj tej tuabneeg foom tsi zoo rua puab txiv hab tsi ncu puab nam tej txaj ntsig.

¹²Muaj tej tug xaav has tas puab yog tuabneeg ncaaj nceeg, tabsis puab ua phem ua qas kawg le.

¹³Muaj tej tug xaav has tas puab txhaj yog tuabneeg zoo xwb, ua le caag puab yuav xaav has tas puab zoo tshaaj lwm tug!

¹⁴Muaj tej tug tuabneeg limham moog fuab cov pluag hab cov txomnyem tug, qhov ntawd yog cov tuabneeg sab phem kev nrhav noj nrhav haus.

¹⁵Muaj ib tug maum peeb muaj ob tug mivnyuas, obtug npe hu ua “Muab rua kuv!” Muaj plaub yaam kws pheej tsi txaus sab le:

¹⁶tubtuag teb, tug quaspuj kws muaj tsi taug mivnyuas, aav qhuav xaav tau dlej naag, hab suavtawg kub toj tua tsi tau.

¹⁷Tug tuabneeg kws luag nwg txiv plig lossis tuam mom nwg nam thaus nwg nam laug lawm, nwg yuav raug dlaav npoj noj lossis uab laag yuav tho nwg ob lub qhovmuag.

¹⁸Muaj plaub yaam kws ua rua kuv xaav tsi thoob hab tsi totaub, tej ntawd yog le nuav:

¹⁹tug dlaav yaa tau sau nruab ntug, tug naab ndlaug tau sau pobzeb, lub nkoj dlha tau ntaa yeeg sau nplaim dlej, hab quaspuj quasyawg txawj sis nyam.

²⁰Tug quaspuj kws tsi ncaaj yog le nuav: nwg ua txhum kev nkauj kev nraug taag, nwg moog dlaa dlej hab has tas, “Kuv yeej tsi tau ua txhum dlaabtsi.”

²¹Nyob huv nplajteb nuav muaj plaub yaam kws ua rua tuabneeg tsi txaus sab:

²²tug qhev tau lug ua vaajntxwv, tug tuabneeg ruag muaj txhua yaam noj,

²³tug quaspuj kws txhua tug ntxub tau quasyawg yuav, hab tug ntxhais qhev tau lug nyob nwg tug nam tsaavcuab chaw.

²⁴Muaj plaub yaam tsaj kws miv heev nyob huv nplajteb nuav, tabsis ntse kawg le:

²⁵Ntsaum: puab tsi muaj zug, tabsis thaus lub caij ntuj qhua puab sau tej khoom noj lug ca ntau khaws tseg.

²⁶Ntximtsua: puab kuj tsi muaj zug hab tabsis puab ua puab tej zeg rua huv tej qhov tsua.

²⁷Kooj: puab tsi muaj vaajntxwv kaav, tabsis puab yaa ua ke tsheej paab.

²⁸Naab qaa tsav: koj nteg tau tuavhuv koj xibteg, tabsis nwg tseem tau nyob huv vaajntxwv lub loog.

²⁹Muaj plaub yaam kws thaus puab moog kev, mas zoo saib kawg le yog:

³⁰tug tsuv ntxhuav muaj zug tshaaj lwm yaam tsaj huv tuabsi hab tsi ntshai dlaabtsi le;

³¹tug laug tshis, hab tug lauv qab cooj kws moog kev khov kho, hab tej vaajntxwv kws sawv ntawm nwg tsoom pejxeem hauv ntej.

³²Yog koj ruag dlhau es ua tuabneeg khaavtheeb hab tuav tswvyim ua phem, ca le tseg hab ua tuab zoo xaav!

³³Yog koj nyoj mig nyuj, ces koj tau roj mig. Yog koj ntaus luas caajntswg, ces luas qhovntswg lug ntshaav. Hab yog koj moog thaab kev chim, koj yuav raug kev kub ntxhuv.